Европэм дзюдомкIэ и Кубок къыдэхыгъэнымкIэ Санкт-Петербург зэIукIэгъухэр щыкIуагъэх. Илъэс 21-м нэс зыныбжьхэр медальхэм якъыдэхын фэбэнагъэх. Урысыем иныбжьыкIэ хэшыпыкIыгъэ командэ хэтхэу Адыгэ Республикэм илIыкIохэр зэнэкъокъум хэлэжьагъэх.
Мерэм Дамир килограмм 55-м нэс къэзыщэчырэмэ алырэгъум ащыIукIагъ. Финалым хэхьагъэу дышъэ медалыр къыхьыщтэу тигъэгугъэщтыгъ, ау апэрэ такъикъхэм хэукъоныгъэу ышIыгъэхэр пэрыохъу къыфэхъугъэх. Джыракъые нарт шъаом тыжьын медалыр къыфагъэшъошагъ.
ПэшIо Алый кг 55-рэ къэзыщэчырэмэ янэкъокъугъ, ящэнэрэ чIыпIэр къыдихыгъ. Щыгъущэ Амир, кг 66-рэ, медаль къыдихыгъэп, арэу щытми, иIэпэIэсэныгъэ зэрэхигъахъорэр зэнэкъокъум къыщылъэгъуагъ.
— Европэм дзюдомкIэ и Кубок хэгъэгу 23-рэ фэбэнагъ, — къытиIуагъ Адыгэ къэралыгъо университетым физкультурэмрэ дзюдомрэкIэ и Институт итренер-кIэлэегъаджэу Нэпсэу Бислъан. — Санкт-Петербург дэгъоу къыщытпэгъокIыгъэх. Ленинград хэкум тилъэпкъэгъоу щыпсэухэрэр, Адыгэ Хасэм хэтхэр тибэнакIохэм къаIукIагъэх, зэIукIэгъухэр зэрэкIуагъэхэм еплъыгъэх, тиспортсменхэм бэрэ Iэгу къафытеуагъэх. Санкт-Петербург тыкIоным фэшI IэпыIэгъу къытфэхъугъэхэм гъэзетымкIи «тхьашъуегъэпсэу» ятэIожьы.
ТибэнакIохэм ятренерхэу Акъущэ Бислъан, Хьакурынэ Дамир, Нэпсэу Бислъан къызэрэтаIуагъэу, Урысыем иныбжьыкIэхэм яхэшыпыкIыгъэ командэ Адыгеим щыщ кIалэхэр хэтых, Европэм изэнэкъокъу зыфагъэхьазыры. Гъогу зытехьэхэкIэ республикэм ибыракъ зыдаштэныр шэнышIу афэхъугъ.
Сурэтым итхэр: Хьакурынэ Дамир, ПэшIо Алый, Мерэм Дамир, Нэпсэу Бислъан.