Лъэпкъ искусствэр лъагэу зыIэтырэмэ ащыщ Адыгэ Республикэм и Къэралыгъо орэдыIо-къэшъокIо ансамблэу «Ислъамыер». Купыр зызэхащагъэр илъэс 25-рэ зэрэхъугъэм фэгъэхьыгъэ концертэу республикэ филармонием щыкIуагъэм лъэпкъхэр зэфищагъэх.
Адыгеим икъалэхэм, районхэм, республикэм игъунэгъу шъолъырхэм, Израиль, Тыркуем, Сирием, нэмыкIхэм пчыхьэзэхахьэм щытлъэгъугъэх.
— «Ислъамыем» гъогогъуитIо тикъуаджэу Кфар-Камэ сыщеплъыгъ, — къеIуатэ Абрэдж Наташэ. — СиIахьылхэр сигъусэхэу концертым сеплъыщт. «Ислъамыер» Израиль ис адыгэхэм лъэшэу агу рехьы.
Адыгэ Республикэм изаслуженнэ артистэу, «Ислъамыем» ипщынаоу Мышъэ Андзаур иIахьылхэр Тэхъутэмыкъуае къикIыгъэх. Джэджэхьаблэ щыщхэр купышхо мэхъух. Кощхьаблэхэм, Улапэ щыпсэухэрэм къытаIуагъэм къыхэдгъэщырэр «Ислъамыер» дунаим цIэрыIо зэрэщыхъугъэм зэрэрыгушхохэрэр ары.
ЛIышъхьэр къафэгушIуагъ
Адыгэ Республикэм и ЛIышъхьэу ТхьакIущынэ Аслъан «Ислъамыер» илъэс 25-рэ зэрэхъугъэм фэшI фэгушIуагъ. Адыгэхэм ямузыкальнэ искусствэ ифольклор ансамблэр къыпкъырыкIызэ, культурэм щылъыкIотагъ, республикэм ынапэ зыгъэдахэрэмэ зэу ахалъытэ.
ТхьакIущынэ Аслъан къызэриIуагъэу, орэдышъор зэхэугуфыкIыгъэу, къашъохэр дахэу гъэпсыгъэхэу, орэдыIохэм макъэхэр агъэжъынчхэзэ, «Ислъамыер» зэлъашIэ хъугъэ. Мыекъуапэ, Улапэ, Джэджэхьаблэ, Москва е Лондон концертыр къыщетымэ, сыдигъуи IэгутеошхокIэ итворчествэ уасэ къыфашIы. Адыгэ культурэм икъэухъумэн, илъыгъэкIотэн ансамблэм иIахьышIу хешIыхьэ.
Республикэм и ЛIышъхьэ «Ислъамыем» идирижер шъхьаIэу Оздиел (Лъэцэр) Светланэ —Адыгэ Республикэм инароднэ артистк», оркестрэм хэтэу Надежда Лобода «Адыгэ Республикэм изаслуженнэ артистк» зыфиIорэ щытхъуцIэхэр афиусыгъэх, бгъэхалъхьэхэр аритыжьхэзэ афэгушIуагъ.
Адыгеим и Парламент идепутатэу Пэнэшъу Къэплъан, республикэм культурэмкIэ иминистрэу Къулэ Мыхьамэт, Къэбэртэе-Бэлъкъарым и Къэралыгъо академическэ къэшъокIо ансамблэу «Кабардинкэм» ихудожественнэ пащэу, Адыгеим изаслуженнэ артистэу Iэтэбые Игорь «Ислъамыем» иартистхэм, иIофышIэхэм къафэгушIуагъэх, щытхъу тхылъхэр къаратыжьыгъэх. Дунэе Артиадэм имедаль композиторэу Нэхэе Аслъан къыфагъэшъошагъ — искусствэм ылъэныкъокIэ гъэхъагъэу ышIыгъэм фэшI.
Концертыр
Ижъырэ адыгэ орэдхэу «Сэрмафэр», Хьатх я КъокIасэ фэгъэхьыгъэр, фэшъхьафхэри «Ислъамыем» ирепертуар бэшIагъэу хэтых. ОрэдыIохэм япчъагъэ зэрэхэхъуагъэр къыдэтлъытэзэ, произведениехэм тигуапэу тядэIу. Рапсодиеу «Хьагъэуджым изэфакIор» Урысыем изаслуженнэ артисткэу ХъокIо Сусанэ къыхедзэ. Пщынаоу Лъэцэр Светланэ искусствэм нахь куоу гукIэ хэхьанымкIэ, исэнаущыгъэ къызэIуихынымкIэ «Хьагъэуджым изэфакIо» лъэуж хэхыгъэ къыгъэнагъ.
Пэсэрэ орэдхэм «ЩырытIымыр» къахэтэгъэщы — икъэIуакIэ къызэрыкIоу зэрэщымытым пае, «Гощэгъэгъым игъыбзэ» рэхьатэу уедэIун умылъэкIыщтэу тэлъытэ. Мэкъэ лъагэкIэ ХъокIо Сусанэ къызыхидзэкIэ, къэIуакIэу ыгъэфедэрэр лъэпкъ гупшысэм шъхьарэкIы, дунэе музыкальнэ искусствэм пытэу хэуцуагъэу олъытэ. Ащ фэдэ произведениер къэIотэгъуаеу щыт, ау артистхэм яIэпэIэсэныгъэ узэриумэхъырэр къызыдэплъытэкIэ, гум къихьэрэр «Ислъамыер» ансамблэ къызэрыкIоу зэрэщымытыр ары.
Нэхэе Аслъан пчыхьэзэхахьэм къыщиIуагъ «Ислъамыер» зэхащэным, зыпкъ иуцоным фэшI Хъот Заур, Пэнэшъу Руслъан, Нэхэе Тэмарэ, нэмыкIхэм яIахьышIу зэрэхашIыхьагъэр. Республикэм и ЛIышъхьэу ТхьакIущынэ Аслъан, Правительствэр ансамблэм IэпыIэгъу къыфэхъу.
Фильмэр тырахы
Пчыхьэзэхахьэр зэрэкIуагъэм фэгъэхьыгъэ фильмэр агъэхьазыры. Ерэкъо Бишер ащ нахь фэгъэзагъ. Фильмэр дунаим къыщагъэлъэгъощт. Б. Ерэкъом къызэрэхигъэщыгъэу, «Ислъамыем» искусствэм лъагъоу къыщыхихыгъэр зыми фэдэп. Лъэпкъ фольклорым тапэкIи Iоф дэшIэгъэн зэрэфаер зэхэщакIохэм зыдашIэжьы.
Орэдымрэ къашъомрэ «Ислъамыем» щызэгъусэх. Адыгеим изаслуженнэ артисткэу Лъэустэнджэл Рузанэрэ Пшызэ изаслуженнэ артистэу Сихъу Руслъанрэ къашъоу «Ислъамыер» къызэрашIырэм, тилъэпкъ шъуашэхэм ядэхагъэ уяплъызэ, адыгэмэ яискусствэ егъашIи дунаим зэрэщымыкIодыщтым унаIэ теодзэ.
МэщбэшIэ Исхьакъ игущыIэхэм атехыгъэ орэдхэм уядэIу зыхъукIэ, артистхэу Къумыкъу Щамсудинэ, Шымырзэ Казбек, Хъуажъ Асыет, нэмыкIхэм ясэнаущыгъэ уегъэгушхо. Дер Абир, Агъыржьэнэкъо Саныет, Уджыхъу Руслъан, МэщбэшIэ Саидэ, фэшъхьафхэм гущыIэ фабэ къафатIо тшIоигъу. Орэдым псэ къыпагъакIэ, уядэIу пшIоигъо уашIы. Произведениешхоу «КъолэнымкIэ» концертыр къызаухым, залым чIэсыгъэхэр чIэкIыжьынхэм дэгуIэщтыгъэхэп, артистхэм, зэхэщакIохэм Iэгу къафытеощтыгъэх. «Ислъамыер» къашъомрэ орэдымрэ зэгъусэхэу искусствэр зикIасэхэм икIэрыкIэу къафэуджыгъ.
ТхэкIо цIэрыIоу МэщбэшIэ Исхьакъ «Ислъамыем» къытегущыIагъ. Адыгэхэр егъашIи дунаим тетынхэмкIэ, нэмыкI лъэпкъхэм ахэмыкIуакIэхэу псэунхэмкIэ Урысыем и Правительствэ ишIухьафтын къызыфагъэшъошэгъэ «Ислъамыем» иорэдхэмкIи, икъашъохэмкIи шIушIэгъэ ин иIэу ылъытагъ. Адыгэ Республикэм ия 25-рэ илъэс фэгъэхьыгъэ Iофтхьабзэхэм «Ислъамыер» ахэлэжьэщт, бжыхьэм юбилей концертыр Москва къыщитыщт.
ЕмтIылъ Нурбый.
Сурэтхэр Алексей Гусевымрэ ЕмтIылъ Нурбыйрэ тырахыгъэх.