Урысые «Народнэ фронтым» ишъолъыр къутамэу Адыгэ Республикэм щыIэм псауныгъэм икъэухъумэнкIэ къулыкъум иорганизациехэм медицинэ IэпыIэгъур цIыфхэм зэрарагъэгъотырэм фэгъэхьыгъэ уплъэкIун ышIыгъ. Ащ «общественникхэр» ыгъэрэзагъэхэп ыкIи зэфэхьысыжьхэр Адыгеим псауныгъэр къэухъумэгъэнымкIэ и Министерствэ фагъэхьыгъэх.
Мыекъопэ районым ит псэупIэ чыжьэхэм адэт фельдшер-мамыку IэзапIэхэм яIофшIэн зэрагъэцакIэрэр зэрагъэлъэгъугъ. ЗэрагъэунэфыгъэмкIэ, ахэм фельдшерхэр зыIумытхэри ахэтых. Тхылъэу апылъхэмкIэ пунктхэм Iоф ашIэ, ау IэпыIэгъу къыпфэхъун зымылъэкIыщт санитаркэхэр ары ныIэп ащылажьэ-хэрэр. ЦIыфхэм къызэраIуагъэмкIэ, Iоф зэрашIэн фэе графикэу пылъагъэр агъэцакIэрэп, IэзэпIитIумэ ар апылъэгъахэп. КъекIокIырэ диагностическэ комплексыр электричествэм пагъэнэнымкIэ гумэкIыгъохэри щыIэх. ПсэупIэхэм адэсхэм анахь къяхьылъэкIыхэрэм ащыщ Iэзэгъу уцхэр зэрагъэгъотыным фэшI район гупчэм зэрэкIонхэ фаер. Автобусхэм якIони «Народнэ фронтым» илIыкIохэр зымыгъэрэзагъэхэм ащыщ, сыда пIомэ анахь къапэблэгъэ сымэджэщым нэсырэ автобусыр мафэм зэ макIо. Ащ къыхэкIэу цIыфхэр врачым дэжь нэсынхэ алъэкIырэп.
Мыхэм ыкIи нэмыкI гумэкIыгъохэм атегущыIагъэх «Народнэ фронтым» илIыкIохэр, псауныгъэр къэухъумэгъэнымкIэ министрэм ыкIи Мыекъопэ районым ипащэ цIыфхэм зызаIуагъакIэм. ГъэцэкIэкIо къулыкъум иIофышIэхэр ахэм ягумэкIыгъохэм зэрядэIугъэхэм имызакъоу, а щыкIагъэхэр дэгъэзыжьыгъэнхэм пае шIэгъэн фаехэри Iофтхьабзэм щызэхафыгъэх.
«Народнэ фронтым» хэтхэм къызэраIуагъэмкIэ, гумэкIыгъор щыIэ зыкIэхъугъэр, медицинэ IэпыIэгъур цIыфхэм зэрарагъэгъотырэм пащэхэр лъымыплъагъэхэмэ е мыщ Iоф щызышIэхэрэм икъу фэдизэу шIэныгъэ аIэкIэмылъмэ Адыгэ Республикэм псауныгъэр къэухъумэгъэнымкIэ и Министерствэ джырэ уахътэ щызэхафыщт.
— Дэо тхылъхэр щыIэхэ зэрэхъугъэм къыхэкIэу, медицинэ фэIо-фашIэхэр цIыфхэм зэрарагъэгъотырэм нахьышIум ылъэныкъокIэ охътэ кIэкIым къыкIоцI зэхъокIыныгъэхэр фэшIыгъэнхэ фае, — къыIуагъ Урысые «Народнэ фронтым» ишъолъыр къутамэу Адыгэ Республикэм щыIэм итхьамэтэгъоу Бэгъ Альберт.
Зэхэсыгъом икIэухым Адыгеим псауныгъэр къэухъумэгъэнымкIэ иминистрэу Мэрэтыкъо Рустем игущыIэ къызэрэщыхигъэщыгъэмкIэ, бэ темышIэу гумэкIыгъохэр дагъэзыжьыщтых. Агъэкощырэ аптекэхэр агъэпсынхэр пшъэрылъэу зыфагъэуцужьыгъэхэм ащыщ. Фельдшер-мамыку IэзапIэхэм уахътэу Iоф зыщашIэщтымрэ АР-м псауныгъэр къэухъумэгъэнымкIэ и Министерствэ «илиние плъыр» ителефонрэ къытыратхэщтых. Медицинэм иIофышIэу зыщыкIэхэрэри зэрагъэгъотыным джащ фэдэу дэлэжьэщтых. Мыекъопэ районым иадминистрацие илIыкIохэм электричествэм ыкIи транспортыр псэупIэм къызэрэдэмыхьэрэм япхыгъэ гумэкIыгъохэм Iоф адашIэнэу зэхэсыгъом къекIолIагъэхэр къагъэгугъагъэх. «Народнэ фронтым» хэтхэм къызэраIуагъэмкIэ, къихьащт мазэм джыри цIыфхэм заIуагъэкIэщт, IофшIэнхэр зэрэкIохэрэр зэрагъэлъэ-гъущт.
Гъонэжьыкъо Сэтэнай.