ЧIыопс паркэу «ТхьакIышху» зыфиIорэм иIофышIэхэм машIом зызэрэщыуухъумэщтыр, ар зэрэбгъэкIосэжьыщтыр Мыекъопэ къэралыгъо технологическэ университетым чIэсхэм ыкIи Дахъо игурыт еджапIэ икIэлэеджакIохэм къафаIотагъ. Мэлылъфэгъум и 15-р экологие шIэныгъэхэм я Мафэу зэрагъэнэфагъэм мы Iофтхьабзэр къыдыхэлъытагъэу зэхащагъ.
Паркым зыщызыгъэпсэфы зышIоигъоу машIо зышIырэ пстэуми шапхъэу щыIэхэр джыри зэ агу къагъэкIыжьыгъэх.
— МашIом нахь зыкъиштэным ищынагъо зыщыIэ уахътэр къэблэгъагъ. Республикэм имэзхэр анахьэу Мыекъопэ районым зэритхэм къыхэкIэу, мыщ машIом зыщиушъомбгъун ылъэкIыщт. «ТхьакIышху» зыфиIорэ паркыр къушъхьэлъэ чIыпIэу зэрэщытым пае усакъын фае, — къыIуагъ мыщ иинспекторэу Нэшъулъэщэ Муслим. — Джырэ уахътэ, гъатхэм, чIыопсым икъэущыжьыгъом, мы чIыпIэхэр зызыгъэпсэфы зышIоигъохэмкIэ дэхэ дэдэх. Ащ къыхэкIэу, ныбжьыкIэхэм шапхъэхэр джыри зэ агу къэдгъэкIыжьынхэр типшъэрылъ шъхьаIэхэм ащыщ.
ЧIыопс паркэу «ТхьакIышху» зыфиIорэм иIофышIэхэм машIор мэзым къыщыхъугъэмэ, зэрагъэкIосэжьын фаер икIэлэеджакIохэм арагъэлъэгъугъ. МашIом зимыушъомбгъуным пае анахьэу анаIэ зытырагъэтын фэе лъэныкъохэр къафаIотагъэх. Ахэм къызэраIуагъэмкIэ, машIо зышIынэу мурад зиIэхэр хэушъхьафыкIыгъэ чIыпIэхэм ашIокIынхэу щытэп. Ау ащ фэдэ щымыIэ зыхъукIэ, ар зэкIамыгъанэзэ, зыщашIыщт чIыпIэр дэгъоу аукъэбзын фае. Зызыгъэпсэфырэ цIыфхэм машIор амыгъэкIосэжьэу IукIыжьыхэ хъущтэп. Мыхэр ыкIи нэмыкI шапхъэхэу анахьэу ныбжьыкIэхэм анаIэ зытырагъэтын фаехэр къафаIотагъэх.
МашIом зыкъиштагъэмэ, зэрэбгъэкIосэжьын плъэкIыщт Iэмэ-псымэ зэфэшъхьафхэр къарагъэлъэгъугъэх, ахэр зэрэбгъэфедэщтхэр къафаIотагъ. ХэушъхьафыкIыгъэ пкъыгъохэр умыIыгъхэу машIом зыкъиштагъэмэ, ащ игъэкIосэжьынкIэ чъыг къутэмэ цIынэхэр зэрэбгъэфедэщтхэр ныбжьыкIэхэм агурагъэIуагъ.
Iофтхьабзэм къыдыхэлъытагъэу тыкъэзыуцухьэрэ чIыопсым и Дунэе фондэу «Российский Кавказ» зыфиIорэм ишъолъыр къутамэ ипресс-къулыкъу азиат леопардхэм афэгъэхьыгъэ къэбархэмрэ видеокъэгъэлъэгъонхэмрэ ныбжьыкIэхэм къаригъэлъэгъугъэх.
Вячеслав Мороз къызэриIуагъэмкIэ, джырэ уахътэ яIофшIэн мы псэушъхьэм нахь фэгъэзагъ. ГухэкI нахь мышIэми, тишъолъыр ар икIодыкIыжьыпагъ, тимэзхэм ащыпсэужьырэп. Псэушъхьэ дахэм икъэухъумэн ыкIи тишъолъыр ащ къегъэгъэзэжьыгъэным фэгъэхьыгъэу кIэлэеджакIохэми, хьакIэу Iофтхьабзэм къыщызэрэугъоигъэхэми къафиIотагъ. Азиат леопардым уемыкIуалIэу, ищырхэм уиягъэ ямыгъэкIымэ, къыптебэнэщтэп. Ежьыри амалэу иIэмкIэ цIыфхэм защиухъумэщт.
Iофтхьабзэм къекIолIагъэхэм кIэухым зэдаштагъ ыпшъэкIэ зигугъу къэтшIыгъэ шапхъэхэр зекIо кIорэ цIыфхэм агу къэкIыжьэу, ахэр агъэцакIэхэ зыхъукIэ, зыгъэпсэфыгъо уахътэр зэрифэшъуашэм фэдэу зэрагъэкIощтыр, шIукIэ агу къызэринэжьыщтыр ыкIи чIыопсыми зэрар зэрэрамыхыжьыщтыр.
Гъонэжьыкъо Сэтэнай.