ПенсиехэмкIэ фондым и ГъэIорышIапIэу къалэу Мыекъуапэ щыIэм испециалистхэр къэралыгъо бюджет гъэсэныгъэ учреждениеу Адыгэ Республикэм и Адыгэ кIэлэегъэджэ колледжэу Хъ. Андырхъуаем ыцIэ зыхьырэм икIэлэегъаджэхэм мэлылъфэгъум и 12-м аIукIэгъагъэх. Ар зэхащэгъагъ ГъэIорышIапIэм пенсиехэр афэгъэуцугъэнхэмкIэ ыкIи къафэлъытэжьыгъэнхэмкIэ иотдел ипащэу Роза Сеумянрэ клиент къулыкъум ипащэ игуадзэу Наталья Башлыковамрэ.
Къэзэрэугъоигъэхэм апашъхьэ апэу къыщыгущыIагъ Роза Сеумян. Ащ къыIотагъ Урысыем пенсиехэр щятыгъэнхэр зэрэщызэхэщэгъэ шIыкIэр ыкIи анахьэу анаIэ тыраригъэдзагъ пенсиехэм яхьылIэгъэ хэбзэгъэуцугъэм мы илъэсым зэхъокIыныгъэу фэхъугъэхэм. Джащ фэдэу кIэлэегъаджэхэм къафаIотагъ пенсие ягъэгъэуцугъэным фэшI ищыкIэгъэ документхэр зэрэбгъэхьазырыщтхэ, Iоф зышIэн зымылъэкIыщт цIыфхэм яфэIо-фашIэхэр зэрафагъэцакIэхэрэм пае компенсационнэ тынхэр зэраратыхэрэ шIыкIэр, федеральнэ социальнэ ахъщэ тын хэгъэхъожьыр (ФСД) зэрафагъэуцурэр, ПФР-м исайт «Страховать ашIыгъэ цIыфым иунэе кабинет» зыфиIоу иIэм уихьэзэ уипенсие счет изытет зыщыбгъэгъозэн зэрэплъэкIыщтыр.
ЗэIукIэгъум нэмыкI темэхэми щалъыIэсыгъэх. ГущыIэм пае, пенсием нахь кIасэу укIоныр нахь федэу зэрэщытыр къафаIотагъ.
— Шапхъэхэм зэрагъэнафэрэмкIэ, уныбжькIэ пенсием узынэсыгъэм ыуж илъэс заулэ тешIагъэу страховой пенсие ябгъэгъэуцунэу зызафэбгъазэкIэ, страховой пенсиер нахьыбэ мэхъу. Уныбжь къызысыгъэм ыуж пенсие ягъэгъэуцугъэныр зэрэзэкIэпхьэгъэ илъэс пэпчъ телъытагъэу пенсие коэффициентхэр нахьыбэ мэхъух, — хигъэунэфыкIыгъ Роза Сеумян.
КIэлэегъаджэхэм апашъхьэ къыщыгущыIэзэ, Наталья Башлыковам хигъэунэфыкIыгъ цIыфыр зэреджэгъэ илъэсхэр, къызэсымаджэми къэралыгъо социальнэ страхованиемкIэ пособие зэрэратыгъэ пIалъэр, джащ фэдэу илъэс къэс отпуск зыщыIэгъэ пIалъэр IофшIэным ехьылIэгъэ стажым зэрэхалъытэхэрэр. Джащ фэдэу сабый къызэрэфэхъущтым ыкIи къызэрэфэхъугъэм ехьы-лIэгъэ отпускэу аратырэри кIэлэегъэджэ IофшIэнымкIэ стажэу яIэм халъытэ.
ЗэIукIэгъум хэлэжьагъэхэм упчIэхэри къатыгъэх, яеплъыкIэхэри къаIуагъэх. ЗэIукIэгъум изэхэщакIохэм упчIэ пстэуми джэуапхэр IупкIэу аратыжьых.
Зэпыугъо фэмыхъоу аратыщтыгъэх
Гъэтхапэм пенсиехэр афэгъэуцугъэнхэр, къафэлъытэжьыгъэнхэр, пенсиехэмрэ пособиехэмрэ ятыгъэнхэр ПенсиехэмкIэ фондым и Къутамэу Адыгэ Республикэм щыIэм ипIалъэм ехъулIэу ыкIи икъоу зэшIуихыщтыгъэх. Адыгеим изы район горэми пенсиехэмрэ пособиехэмрэ ятыгъэнхэм зэпыугъо щыфэхъугъэп.
2016-рэ илъэсым имэлылъфэгъу и 1-м ехъулIэу зэрэщытыгъэмкIэ, Адыгеим щыпсэухэрэ нэбгырэ мини 125-м ехъурэмэ пенсиехэмрэ пособиехэмрэ ПенсиехэмкIэ фондым имылъку къыхэкIызэ аратыгъэх. А пчъагъэр зэкIэ республикэм щыпсэухэрэм япроцент 27,8-рэ мэхъу. Гъэтхапэм зэкIэмкIи ахэм ясчетхэм сомэ миллиардрэ миллион 642,8-рэ арагъэхьагъ.
Электроннэ сервисхэм ренэу ахегъахъо
ПенсиехэмкIэ фондым цIыфхэм къэбархэр алъыгъэIэсыгъэнхэмкIэ, джащ фэдэу ПенсиехэмкIэ фондым укIонэу имыщыкIагъэу зыгъэпсырэ фэIо-фашIэхэмкIэ сервисэу ыгъэфедэхэрэм ренэу ахегъахъо. ФэIо-фашIэхэри, сервисхэри зы порталым епхыгъэх ыкIи бгъэфедэнхэмкIэ Iэрыфэгъоу щытых.
ГущыIэм пае, «Страховать ашIыгъэм иунэе кабинет» зыфиIорэмкIэ 2015-рэ илъэсым пенсие фитыныгъэхэу яIэхэм, пенсиехэр афэгъэуцугъэнхэм, пенсиехэр зэралъагъэIэсыхэрэ шIыкIэр зэхъокIыгъэным япхыгъэ къэбархэр алъыгъэIэсыгъэнхэм яхьылIэгъэ сервисхэр гъэфедэгъошIухэу щытыгъэхэмэ, джы цIыфхэм нэмыкI электроннэ сервисыкIэхэри агъэфедэнхэ алъэкIыщт. ПенсионерхэмкIэ анахь шъхьаIэу щыт пенсие лъэпкъыр зыфэдэр ыкIи ар зыфэдизыр, социальнэ тынхэр, Iоф зышIэн зымылъэкIыщтым ифэIо-фашIэхэр зэрэфагъэцакIэхэрэм фэшI компенсационнэ тынэу аратырэм яхьылIэгъэ сервисыр.
Iоф зышIэрэ пенсионерхэм «Страховать ашIыгъэ цIыфым иунэе кабинет» рагъотэщт индексациеу щыIэгъэ пстэуми ателъытэгъэ пенсиер зыфэдизыр, нэмыкIэу къэпIон хъумэ, Iоф ымышIэжьы зыхъукIэ пенсиеу къыратыщтыр зыфэдизыщтыр.
Ны (унэгъо) мылъкум ехьылIэгъэ сертификат зиIэхэм къашъхьапэщт ны мылъкур зыфэдизыр е ащ щыщ Iахьэу къэнагъэр къизыIотыкIырэ, ПенсиехэмкIэ фондым умыкIоу къэралыгъо сертификат къаIыхыгъэным ехьылIэгъэ лъэIу тхылъ электроннэ шIыкIэм тетэу алъыгъэIэсыгъэным иамал къэзытырэ сервисыр.
ПенсиехэмкIэ фондым
и Къутамэу
Адыгэ Республикэм щыIэм
ипресс-къулыкъу.