ТекIоныгъэр къызыдахыгъэр илъэс 71-рэ зэрэхъурэм ипэгъокIэу «Звезда нашей Великой Победы» зыфиIорэ автопробегыр тыгъуасэ Мыекъуапэ къэсыгъ. Хэгъэгу зэошхом щыфэхыгъэ тидзэкIолIхэм ясаугъэтэу Мыекъуапэ идэкIыгъо дэжь щытым ахэр къекIолIагъэх.
АР-м и ЛIышъхьэрэ министрэхэм я Кабинетрэ я Администрацие ипащэу Владислав Федоровыр, АР-м иветеранхэм я Совет ипащэу Къоджэ Аслъан, кIэлэеджакIохэр, волонтерхэр, нэмыкIхэри зэхахьэм къекIолIагъэх. Iофтхьабзэм кIэщакIо фэхъугъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет.
Къэзэрэугъоигъэхэм АР-м и ЛIышъхьэу ТхьакIущынэ Аслъан ыцIэкIэ Владислав Федоровым шIуфэс къарихыгъ.
— Тиреспубликэ шъукъызэреблэгъагъэр лъэшэу тигуапэ. Iофтхьабзэм икIэщакIохэми, хэлажьэхэрэми тафэраз. Мыщ фэдэ акциехэм мэхьанэшхо яI. Хэгъэгу зэошхом иветеранхэмрэ къыткIэхъухьэрэ ныбжьыкIэхэмрэ зэготхэу мэфэкI Iофтхьабзэхэм зэрахэлажьэхэрэм ишIуагъэкIэ тарихъыр кIодыщтэп. НыбжьыкIэхэр патриотизмэм фещэх, яхэгъэгу шIу алъэгъуным, нахьыжъхэр агъэлъэпIэным афэIорышIэ, —къыIуагъ ащ.
Автопробегым ипащэу Александр Петровым къызэриIуагъэмкIэ, гъогум зытетхэр тхьамэфитIу хъугъэ. А уахътэм къыкIоцI къэлэ 14-мэ ащыIагъэх, ау джыри километрэ мини 5-м ехъу акIун фае. ТекIоныгъэм ибыракъ республикэу Къырым, къалэхэу Севастополь, Керчь, нэмыкIхэми ащагъэбыбэтагъ, джыри Донецкэ, Луганскэ, тикъэлэ шъхьаIэу Москва анэсынхэу гухэлъ яI.
— ЗэкIэми пшъэрылъ шъхьаIэу тиIэр Хэгъэгу зэошхом ижъалымыгъэ зыщытымыгъэгъупшэныр, ащ тинахьыжъхэм къинэу щалъэгъугъэр тыгу ренэу идгъэлъыныр, ахэр дгъэлъэпIэнхэр ары, — къыIуагъ Александр Петровым. — Хабзэ зэрэхъугъэу, къалэу тызыдахьэхэрэм тихэгъэгу ыцIэ дахэкIэ зыгъэIугъэмэ ябюстхэр ятэтых. Непэ Мыекъуапэ дэт еджэпIэ учреждениехэм ыкIи ныбжьыкIэхэм я Комитет Александр Невскэм, Александр Покрышкиным ыкIи Александр Пушкиным ябюстхэр къафэдгъанэхэ тшIоигъу.
Нэужым Хэгъэгу зэошхом хэкIодэгъэ цIыфхэр агу къагъэкIыжьыгъэх, ахэм яшIэжь агъэлъапIэзэ, зы такъикърэ афэшъыгъуагъэх. Саугъэтым къэгъагъэхэр кIэралъхьагъэх, ТекIоныгъэм ибыракъ къызэкIоцIахи, Iофтхьабзэм зэфищагъэхэм сурэт атырахыгъ.
Гъонэжьыкъо Сэтэнай.