Псэм псэ къыпегъэкIэжьы

ЛIэшIэгъуныкъом нахьыбэ зы IофшIапIэм Iутым укъытегущыIэныр къинэп. Ау исэнэхьат фыщытыкIэу фыриIэм, игупшысэхэм защыбгъэгъуазэ пшIоигъоу упчIэхэр бгъэхьазырынхэу уфежьэмэ, зэгъэпшэнхэм щыIэныгъэм куоу ухащэ. ЦIыфыр унэгу къыкIэбгъэуцозэ, гъогоу къыкIугъэм гукIэ зыфэогъазэ…

Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм иартистэу КIыкI Хьисэ цIыф цIэрыIуабэ зыщапIугъэ къуаджэу Нэшъукъуае къыщы­хъугъ. ИскусствэхэмкIэ къэралыгъо театральнэ институтыр 1962-рэ илъэсым Москва къыщиухыгъ. Ащ къыщыублагъэу исэнэхьаткIэ мэлажьэ.

— КIыкI Юрэ артист инэу сэлъытэ, — къеIуатэ Урысыем изаслуженнэ артистэу, Адыгеим инароднэ артистэу Пэрэныкъо Чатибэ. — Москва тыщызэде­джагъ, Лъэпкъ театрэм Iоф щызэ­дэтэшIэ. Юрэ уригъусэу спектаклэм ухэлэжьэным укIэхъопсэу бэрэ къыхэкIы. ПсынкIэу угурэIо. ОшIа, къыбгот артистым ынэгу укIэплъэныр, къыбгурыIоныр, къэ­гъэлъэгъонэу къэпшIырэм гукIи, псэкIи ухищэным имэхьанэ цIы­кIоп. ЦIыфым епIорэр зэрэзэхихырэр шIукIэ къыотэжьын фаеу тэлъытэ. Юрэ ныбджэгъушIу, адыгагъэ хэлъ, ролэу къышIыхэ­рэм псэ къапе­гъакIэ.

Спектаклэ 200 фэдизмэ Ю. КIыкIыр ахэлэжьагъ. Классикэм хэхьэгъэ произведениехэм атехыгъэ къэгъэлъэгъонхэм къащи­шIы­гъэ рольхэр щыIэныгъэм егъа­шIи хэкIокIэщтхэп. Хь. Шъхьап­лъэкъом ипьесэу «Даутэм» зы­фиIорэм Ю. КIыкIым Советскэ Союзым и ЛIыхъужъэу Нэхэе Даутэ ироль къыщишIыгъ.

Спектаклэр апэрэу Пэнэжьы­къуае къыщагъэлъэгъуагъ. ЦIы­фыбэ зэреплъыгъэм дакIоу, анахьэу къыхэдгъэщырэр Нэхэе Даутэ янэ къыриIогъагъэр ары.

— Скъо сынэгу къыкIэбгъэуцо­жьыгъ. Тхьауегъэпсэу, — нэпсыр зэрилъэкIэхызэ Даутэ янэ гум илъ гущыIэхэр артистым къы­фигъэзэгъагъэх.

Н. Островскэм ытхыгъэу «Щы­лычыр зэрэпсыхьагъэр» зыфиIорэ къэгъэлъэгъоным Павел Корчагиным ироль Ю. КIыкIым къызэ­рэщишIыгъагъэм шIэныгъэлэжьхэр, театроведхэр, нэмыкIхэри тегу­щыIагъэх. ЛIыхъужъэу алъытэрэ П. Корчагиным иобраз арти­стым къызэригъэлъэгъуагъэм ду­нэе мэхьанэ езытыгъэхэр искус­ствэм иIофышIэхэм къахэкIыгъэх.

«Псэлъыхъохэр», «Шъуза­бэхэр», «Мэдэя», «Тыкъэсыжьыгъ», «Дэхэбаринэ ихьакIэщ», нэмыкI спектаклэхэм ягугъу къэтшIы зыхъукIэ, КIыкI Юрэ ыцIэ къетIо тшIоигъоу зэфэхьысыжьхэр тэшIых.

Урысыем изаслуженнэ артистэу, Адыгеим инароднэ ар­тистэу КIыкI Юрэ итворчествэ фэгъэхьыгъэ зэхахьэ икъоджэ гупсэу Нэшъукъуае щызэхащэщт. Ащ къы­щызэхэтхыгъэм тигъэзетеджэ­хэр щыдгъэгъозэщтых. Артистыр артист зышIырэм нахь игъэкIо­тыгъэу тыкъытегущыIэщт.

Опсэу, Юр, Тхьэм бэгъашIэ уешI! Илъэс 80-р Кавказым щып­сэ­ухэрэмкIэ бэп. Уигухэлъы­шIу­хэм уафакIозэ, цIыфхэм нахьыбэрэ уаIукIэнэу пфэтэIо. Театрэр о уищыIэныгъ.

Сурэтхэр КIыкI Юрэ зыхэлэжьэгъэ спектаклэхэм къащытетхыгъэх.