1941 — 1945-рэ илъэсхэм щыIэгъэ Хэгъэгу зэошхом ТекIоныгъэр къызыщыдахыгъэр илъэс 71-рэ зэрэхъу-рэм фэгъэхьыгъэ мэфэкI Iофтхьабзэхэу республикэм щызэхащэщтхэм защытегущыIэгъэхэ зэхэсыгъо мы мафэхэм Мыекъуапэ щыкIуагъ.
Ар зэрищагъ Адыгэ Республикэм и Премьер-министрэу КъумпIыл Мурат. Iофтхьабзэм хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владислав Федоровыр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр, Мыекъуапэ имэрэу Александр Наролиныр, АР-м псауныгъэр къэухъумэгъэнымкIэ иминистрэу Мэрэтыкъо Рустем, министрэхэм я Кабинет хэтхэм ащыщхэр, видео-зэпхыныгъэкIэ муниципальнэ образованиехэм япащэхэр, нэмыкIхэри.
Апэрэ Iофыгъоу зэхэсыгъом зыщытегущыIагъэхэр мэфэкI Iофтхьабзэу республикэм щызэхащэщтхэр зыфэдэщтхэр, ахэр зыщыкIощтхэ чIыпIэхэр ары. Ащ фэгъэхьыгъэу къэгущыIагъ Шъхьэлэхъо Аскэр. Ащ къызэриIуагъэмкIэ, жъоныгъуакIэм и 9-м саугъэтхэм къэгъагъэхэр акIэралъхьащтых, «ЕгъашIи щыIэщт полкхэр» зыфиIорэ акциемкIэ мафэр лъагъэкIотэщт, нэужым мэфэкI Iофтхьабзэхэр ахэм къакIэлъыкIощтых.
Iофтхьабзэм изэхэщэн мэхьанэшхо зэриIэм, ар зэрифэшъуашэу рекIокIын зэрэфаем фондэу «ТекIоныгъ» зыфиIорэм республикэмкIэ изэхэщэкIо комитет ынаIэ КъумпIыл Мурат тырыригъэдзагъ.
— МэфэкI Iофтхьабзэу зэхэтщэщтхэр патриотизмэм, зыкIыныгъэм ыкIи зэпхыныгъэм афэIорышIэнхэ фае. Хэгъэгу зэошхом илъэхъан тикъэралыгъо къэзыухъумагъэхэм яшIэжь зыщыдгъэлъэпIэрэ мафэу ар щыт. Ащ епхыгъэу обществэм игукъэкIкIэ зэхащэгъэ акциеу «ЕгъашIи щыIэщт полкхэр» зыфиIорэм мэхьанэшхо иI. Iофтхьабзэм дедгъэштэныр, ащ хэлажьэхэрэм IэпыIэгъу тафэхъуныр пшъэрылъ шъхьаIэу щыт, — къыхигъэщыгъ КъумпIыл Мурат.
Iофтхьэбзэ шъхьаIэхэм яплан къыдилъытэрэ лъэныкъо пстэури щынэгъончъэным, медицинэ IэпыIэгъум япхыгъэ Iофыгъохэм зэхэсыгъом хэлэжьагъэхэр атегущыIагъэх. МэфэкI Iофтхьабзэхэр зэрэкIощтхэм фэгъэхьыгъэу муниципальнэ образованиехэм япащэхэм пшъэрылъ гъэнэфагъэхэр афашIыгъэх. АщкIэ хэбзэухъумакIохэм Iоф зэрадашIэщт лъэныкъохэр агъэнэфагъэх.
Гъонэжьыкъо Сэтэнай.