Урысые Федерацием IофшIэнымкIэ ыкIи цIыфхэр социальнэу ухъумэгъэнхэмкIэ и Министерствэ иколлегие зэхэсыгъоу бэмышIэу иIагъэм хэлэжьагъ Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Осмэн Альберт.
Мы министерствэм ипресс-къулыкъу къызэритырэмкIэ, икIыгъэ илъэсым Iофэу ашIагъэр коллегием щызэфахьысыжьыгъ, пшъэрылъыкIэу къэуцухэрэр, 2016-рэ илъэсым анахь анаIэ зытырагъэтын фаехэр агъэнэфагъэх. Мыхэм афэгъэхьыгъэ доклад шъхьаIэр къышIыгъ министрэу Максим Топилиным.
Министрэм ипсалъэ къыщигъэнэфагъ Урысыем демографием ылъэныкъокIэ Iофхэм язытет. Зигъот макIэу социальнэ IэпыIэгъу къэралыгъом зэритын фаехэм афэгъэхьыгъэу ащ къыIуагъ: «Урысые Федерацием исубъектхэм ягъэцэкIэкIо хэбзэ органхэм тапэкIи Iоф дашIэн фае гъот макIэ зиIэкIэ, къэралыгъо социальнэ IэпыIэгъу зищыкIагъэкIэ лъытэгъэнэу щытхэмкIэ шапхъэхэм ягъэнэфэн. Унашъоу шъушIыщтым акъылыгъэ хэлъэу шъукъекIолIэн, регионым социальнэ лъэныкъомкIэ иIофхэм язытет къыдэшъулъытэн, цIыфхэм гъотэу яIэм, урыпсэунымкIэ анахь ахъщэ макIэу чIыпIэм щагъэнэфагъэм шъуакъыпкъырыкIызэ шъушIын фае. ЦIыфэу социальнэ IэпыIэгъу зищыкIагъэхэм ар агъотын фае…»
Урысые Федерацием и Минтруд мы лъэхъаным егъэхьазыры методическэ рекомендациехэу социальнэ IэпыIэгъу зищыкIагъэкIэ плъытэн фаехэм афэгъэхьыгъэу. Ахэр субъектхэм зэкIэми шIэхэу аIуагъэкIэщтых. «Мыр оптимизацие Iофыгъохэм япхыгъэп, — къыIуагъ М. Топилиным, — тхьамыкIэ псэукIэм къыфэкIоным ищынагъо зышъхьарыт цIыфхэм тишIуагъэ ядгъэкIыныр ары».
Коллегием зэрэщыхагъэунэфыкIыгъэмкIэ, IофшIэныр щынэгъончъэу производствэм щызэхэщэгъэным ылъэныкъокIэ Урысыем исубъектхэм зэкIэми гъэхъагъэу ашIыгъэм уигъэрэзэнэу щыт. IофшIапIэхэм тхьамыкIагъоу къащыхъухэрэр проценти 9-кIэ нахь макIэ хъугъэ.
Нэбгырэ пэпчъкIэ мэхьанэ зиIэ Iофыгъохэм коллегием щатегущыIагъэх, ахэм ягъэцэкIэнкIэ амалэу щыIэхэр, пIалъэхэр агъэнэфагъэх.
(Тикорр.).