Спортым илъэсыбэрэ Iоф щызышIэгъэ Даур Вячеслав фэгъэхьыгъэ шIэжь зэIукIэгъухэр нардхэмкIэ Мыекъуапэ щызэхащагъэх. Сэнэхьат зэфэшъхафхэр зиIэхэр зэнэкъокъум хэлэжьагъэх.
ЕшIэгъухэр рагъэжьэнхэм ыпэкIэ зэхахьэм къыщыгущыIагъэх Пэнэшъу Мыхьамодэ, Александр Матусьян, Хъот Юныс. Я 8-у зэхащэрэ зэнэкъокъум къыщыхагъэщыгъ Даур Вячеслав спорт еджапIэхэм япащэу, директорым игуадзэу Адыгеим Iоф зэрэщишIагъэр. ЗэхэщэкIо дэгъоу ар щытыгъ, ныбжьыкIэхэр зылъищэщтыгъэх, ныбджэгъубэ иIагъ.
Республикэм испорт щызэлъашIэхэрэр, В. Даурым лъытэныгъэ фэзышIыхэрэр кIэщакIо фэхъухи, зэнэкъокъур зэхащагъ. Анатолий Лелюк, ХьакIэмызэ Аслъан, Пэнэшъу Мыхьамодэ, Цэй Аслъанчэрые, ХьапэкIэ Аслъан кубокхэр, нэпэеплъ шIухьафтынхэр къагъэхьазырыгъэх.
Зэнэкъокъур гъэшIэгъон къэзышIыгъэр ТекIоныгъэр къыдэзыхыщтыр къэшIэгъуаеу зэрэщытыгъэр ары. ПэшIорыгъэшъ зэIукIэгъухэр заухым, куп хэхыгъэхэм ешIэгъухэр ащыкIуагъэх. Оганесян Азиз, Индрис Касумовым, Анатолий Москаленкэм кIэух ешIэгъухэм текIоныгъэр къащахьыгъэп.
Апэрэ чIыпIэр Гъыщ Нухьэ фагъэшъошагъ, Александр Матусьян ятIонэрэ хъугъэ. Анатолий Москаленкэм ящэнэрэ чIыпIэр ыхьыгъ, Хъот Юныс яплIэнэрэ чIыпIэм нахь лъагэу дэкIоен ылъэкIыгъэп.
Адыгэ Республикэм народнэ гъэсэныгъэмкIэ изаслуженнэ IофышIэу ЕмтIылъ Юсыфрэ Урысыемрэ Адыгеимрэ язаслуженнэ тренерэу Хъот Юнысрэ хагъэунэфыкIырэ чIыпIэхэр къыдэзыхыгъэхэм афэгушIуагъэх. Спортым ипIуныгъэ мэхьанэ зыкъиIэтынымкIэ цIыф цIэрыIохэм яшIушIагъэ къыхагъэщыгъ, щысэ ныбжьыкIэхэм атырахынымкIэ зэнэкъокъухэр зэхэщэгъэнхэм зэрэпылъыщтхэр къаIуагъ.
Сурэтым итхэр: Даур Вячеслав фэгъэхьыгъэ зэнэкъокъум хэлэжьагъэхэр.