«Динамо-МГТУ-р» финалым нэсыгъ

«Динамо-МГТУ» Мыекъуапэ — «Русичи» Курск — 80:64 (29:9, 9:10, 22:19, 20:26).  Мэлылъфэгъум и 13-м Мыекъуапэ щызэIукIагъэх.         Зезыщагъэхэр: И. Деменков — Санкт-Петербург, А. Курносов — Калуга, Д. Гаврилин — Москва хэку.  «Динамо-МГТУ» : Гапошин — 11, Абызов — 15, Хмара — 9, Еремин — 8, Широков — 11, Кубраков — 5, Путимцев, Чураев — 14, Ковалев, Милютин — 5, Шибаев — 2.

DSC_0811

Финалныкъом иапэрэ такъи­къи 10 заухым, ешIэгъум къы­рыкIощтыр къэпшIэнэу щытыгъ. Бысымхэм 29:9-у къахьи, «Русичыр» «алъэхъагъ». Валентин Кубраковым, Артем Гапошиным, Николай Ереминым яIэпэIэсэ­ныгъэ тигъэгушхощтыгъ. ХьакIэхэм Николай Завьяловыр, Денис Казюлиныр, Андрей Сысоевыр къахэщыщтыгъэх, ау текIоныгъэр ахьын зэрамылъэкIыщтыр пэшIо­рыгъэшъэу къагурыIуагъэу къытщыхъущтыгъ.

«Динамо-МГТУ-м» итренер шъхьаIэу Андрей Синельниковым гумэкIыгъуабэ иIагъэп. ТиешIа­кIохэр зэIукIэгъум дэгъоу фигъэ­хьазырыгъэх. Зэнэкъокъум тиспортсмен ныбжьыкIэхэу опытышхо зимыIэхэр хигъэлэжьагъэх.

Пресс-зэIукIэр

— ЕшIэгъум иапэрэ такъикъ 20 къырыкIощтыр зыIэкIэдгъэ­кIыгъ, —къытиIуагъ «Русичим» итренер шъхьаIэу Сергей Ярошенкэм. — Финалым тыхэхьаным фэшI текIоныгъэр къыдэтхын тимурадэу Мыекъуапэ тыкъэ­кIогъагъ, ау тигухэлъхэр къыддэхъугъэхэп. Къытфэнагъэр джэрз медальхэм тафэбэнэнэу ары…

— ЗэкIэ тиспортсменхэм сафэраз. Шапхъэхэр амыукъохэу, гуетыныгъэ ахэлъэу ешIагъэх. Адыгэ Республикэм ия 25-рэ илъэс шIухьафтын фэтшIы тшIо­игъу. Апэрэ мафэхэм къащыублагъэу дышъэ медальхэм тафэбанэ, — къытиIуагъ тикомандэ итренер шъхьаIэу А. Синельниковым.

— Андрей Синельниковыр зипэщэ командэм сшIогъэшIэгъонэу сылъэплъэ, — пресс-зэIукIэм къы­хэлажьэ Адыгеим изаслуженнэ тренерэу Павел Зборовскэр. — Тэ тщыгъупшагъэп «Динамо-МГТУ-р» мыгъэ Курскэ зыщешIэм бырсырэу зэIукIапIэм къитэджа­гъэр. Зэнэкъокъум еплъынэу къэ­кIуагъэхэр, «Русичим» иешIакIохэр дысэу зекIощтыгъэх. ЗэIукIэгъум иуахътэ амыухызэ ешIэгъур Курскэ щызэпагъэугъагъ. Мые­къуа­пэ ешIэгъур дэгъоу щыкIуагъ, гущыIэ дысхэр зыми къыIуагъэ­хэп. ХьакIэхэм дахэу тапэгъо­кIын, рэхьатэу дгъэкIотэжьынхэ зэрэтлъэкIырэр непэ «Русичим» иешIакIохэм алъэгъугъэу сэлъы­тэ. Тикомандэ сыфэраз.

Финалныкъом къалэхэу Киров ыкIи Магнитогорскэ якомандэхэр щызэдешIэх. ТекIоныгъэр гъо­гогъуитIо къыдэзыхырэр финалым хэхьащт, «Динамо-МГТУ-м» дешIэщт.

Мэлылъфэгъум и 19-м Адыгеим икомандэ Киров е Магнитогорскэ щешIэщт, и 22 — 23-м зэIукIэгъухэр Мыекъуапэ щы­зэхащэщтых. ТекIоныгъэр гъо­гогъуитIо зыхьырэм дышъэ медальхэр фагъэшъошэщтых.

Сурэтым итыр: «Динамо-МГТУ-р» «Русичим» дешIэ.