Мыекъопэ къэралыгъо технологическэ университетым иполитехническэ колледж истудентхэр волонтер Iофтхьабзэу «Твори добро» зыфиIорэм хэлэжьагъэх.
Илъэс къэс ар зэхащэ. Мыекъопэ кIэлэцIыкIу IыгъыпIэу N 37-м ищагу игъэкъэбзэнкIэ, игъэдэхэнкIэ IэпыIэгъу афэхъугъэх. КIэлэцIыкIу IыгъыпIэм чIэсхэм нэужым студентхэм апае концерт цIыкIу къатыгъ, орэдхэр, усэхэр къафаIуагъэх, къафэшъуагъэх.
Мыекъуапэ щызэхащэрэ шIыхьафхэм колледжым истудентхэр чанэу ахэлажьэх. Къалэм игъэкъэбзэн яIахьышIу халъхьэ, Хэгъэгу зэошхом иветеранхэм ясаугъэтхэр, якъэхэр агъэкъабзэх, кIэлэцIыкIу площадкэхэр агъэкIэжьых. Джащ фэдэу сабый ибэхэр ыкIи шъхьагъырыт зимыIэжьхэр, зипсауныгъэкIэ илэгъухэм акIэмыхьэрэ сабыйхэр зычIэс хэушъхьафыкIыгъэ (коррекционнэ) кIэлэцIыкIу Унэм шIыхьафхэр ренэу щашIых.
2014-рэ илъэсым колледжым истудентхэр ыкIи икIэлэегъаджэхэр «Весенняя неделя добра в городе Майкопе» зыфиIорэ Iофтхьабзэм текIоныгъэ къыщыдахыгъагъ ыкIи Мыекъопэ къэлэ администрацием ипащэу А.В. Наролиныр зыкIэтхэгъэ Щытхъу тхылъыр къафагъэшъошэгъагъ.
(Тикорр.).