Уфэмысакъымэ

Мэзхэм, шъофхэм, гъогу гъунэхэм, псы Iушъохэм, нэмыкI чIыпIэхэм машIоу къащыхъурэм нахьыбэрэмкIэ цIыфхэм ямысагъэ хэлъ.

news_21102015_155526Тутыныр, сырнычыр мыгъэ­кIосагъэхэу уц гъугъэм зэрэхадзэхэрэм, хэкIым зэрэкIагъа­нэрэм, машIоу зэхагъэнагъэм зэрэлъымыплъэхэрэм ар къахэ­кIы. Гъэтхэ-гъэмэфэ уахътэхэм дунаир къызыфэбэжьэу, цIыф­хэм ящагухэр, хатэхэр, дачэхэр агъэкъэбзэнхэу зырагъажьэкIэ, мэзхэм, псы Iушъохэм защызыгъэпсэфырэр нахьыбэ зы­хъукIэ, машIом зыкъызэриштэ­рэми хэхъо. Ащ фэшI илъэс къэс джырэ фэдэ уахътэм МЧС-м иIофышIэхэм профилактическэ IофшIэнэу яIэр нахьыбэ мэхъу. УФ-м и МЧС АР-мкIэ и ГъэIорышIапIэ къызэриты­гъэмкIэ, ащ иподразделениехэу профилактическэ Iофтхьаб­зэхэм ыкIи ошIэ-дэмышIэ Iоф къэмыхъуным лъыплъэгъэным афэгъэзагъэхэм псэупIэхэр, сад обществэхэр мы мафэхэм къа­кIухьэх, цIыфхэр аугъоих, ма­шIор зэхэбгъанэу, улъымыплъэжьымэ зэрарэу къыхьы­щтым фэгъэхьыгъэ зэдэгущыIэгъухэр адашIых.

МашIор къэмыхъуным лъып­лъэгъэнымкIэ къэралыгъо инспектор шъхьаIэу Андрей Колесник къызэриIуагъэмкIэ, мы илъэсыр къызихьагъэм къы­щыублагъэу гъогогъу 311-рэ хэкIым е уц гъугъэм къакIэна­гъэу агъэунэфыгъ. Ар бэ. Ащ фэшI мэшIогъэкIосэ инспекторхэми, мэз хъызмэтым щылажьэхэрэми, полициеми яIофшIэн зэрагъэлъэшыщтыр ыкIи машIом фэмысакъхэрэм пхъашэу пшъэ­дэкIыжь зэрахьыщтыр ащ къыхигъэщыгъ. КъызэриIуагъэмкIэ, хэкIым е уц гъугъэм акIэб­гъанэмэ, машIор щынэгъон­чъэнымкIэ шапхъэхэр укъуагъэ­хэ мэхъу. Ащ пае административнэ тазырэу цIыф къызэ­рыкIом сомэ 1000 — 1500-рэ, пэщэ IэнатIэ зыIыгъым сомэ 6000-м къыщыублагъэу 15000-м нэсэу ыкIи юридическэ лицом сомэ 150000 — 200000-рэ судым атырилъхьан фитэу законым къыделъытэ. МашIом зыкъиштэным ищынагъо нахь зыщыщыIэ гъэтхэ-гъэмэфэ уахътэхэм а тазырыр нахьыбэжь мэхъу. Ащ фэдэ хэукъоныгъэ зышIыгъэ цIыф къызэрыкIохэм сомэ мини 2000 — 4000, пэщэ IэнатIэ зыIыгъхэм сомэ 15000 — 30000, юридическэ лицохэм сомэ 400000 — 500000 атыралъхьащт.

МашIом сыдигъокIи тхьамы­кIагъо, зэрар къыздехьых. Та­зырэу законым къыдилъытэрэри макIэу пIон плъэкIыщтэп. Ащ фэдэ гумэкIыгъо ухэмыхьаным пае сыдигъуи уфэса­къымэ нахьышIу.