Жъыр дгъэлъапIэзэ, кIэм тешIушIэн

КIэлэцIыкIухэм афэгъэхьыгъэ фестивалэу «Театральное Зазеркалье» зыфиIорэр ятIонэрэу Адыгэ Республикэм щыкIуагъ. МэфитIум къыкIоцI театрэхэм яспектаклэхэр Мыекъуапэ къыщагъэлъэгъуагъэх. ХагъэунэфыкIырэ чIыпIэхэр къыдэзыхыгъэхэм шIухьафтынхэр афашIыгъэх.

DSC_0743

Фестиваль-зэнэкъокъум ижюри пэщэныгъэ дызезыхьагъэр республикэм и Къэралыгъо филармоние идиректор шъхьаIэу ЛIышэ Рустем ары. Культурэм иIофы­шIэхэу Шэуджэн Бэлэ, Туренкэ Адыиф, Зыхьэ Заурбый, Ацу­мыжъ Сарэ, Шъхьаплъэкъо Къэсэй, Алена Поповар, ЛIыхъукIэ Андзаур жюрим хэтыгъэх.

Къэгъэлъэгъонхэр филармонием, Лъэпкъ театрэу И. Цэим ыцIэ зыхьырэм, Камернэ музы­кальнэ театрэу А. Хьанэхъум ыцIэкIэ щытым ащызэхащагъэх. КIэлэцIыкIухэр, ны-тыхэр, иску­сствэр зышIогъэшIэгъонхэр спектаклэхэм ягуапэу яплъыгъэх. Творческэ IофшIэгъэ анахь дэ­гъур къыхэхыгъэным фэшI жюрим изэхэсыгъохэм зэфэхьысыжьхэр ащашIыгъэх.

Жюрим итхьаматэу ЛIышэ Рустем зэхахьэм къызэрэщиIуа­гъэу, театрэ пэпчъ фестивалым дэгъоу зыфигъэхьазырыгъ. Апэрэ чIыпIэхэр къыдэзыхыщтхэр къыхэхыгъуае афэхъугъ. Спектаклэхэм уагъэгупшысэ, пIуныгъэ мэхьанэу яIэр щыIэныгъэм дештэ.

Къэралыгъо филармониемкIэ нысхъапэхэм ятеатрэу «Дышъэ къошыным» КIуращынэ Аскэрбый ытхыгъэм техыгъэу щагъэуцугъэ къэгъэлъэгъонэу «Жъы зимыIэм кIэ иIэп» зыфиIорэм апэрэ чIыпIэр фагъэшъошагъ, пащэр Нэгъой Азэмат.

АктерхэмкIэ ансамблэ анахь дэгъукIэ алъытагъэр Урыс къэралыгъо драматическэ театрэу А. Пушкиным ыцIэкIэ щытым икъэгъэлъэгъонэу «Дышъэ IункIыбзэжъыер» ары.

Режиссер Iофыгъохэр анахьышIоу зэзыгъэфагъэ­хэр Лъэпкъ театрэу И. Цэим ыцIэ зыхьырэр ары. С. Хъунагом ытхыгъэм техыгъэ спектаклэу «Зиусхьаныр орэпсэу!» зыфи­Iорэр артистхэм къашIыгъ.

Лъэпкъ драматургием режиссерым иIэпэIэсэныгъэ анахь дэгъоу зэрэщагъэфедагъэм фэшI Камернэ музыкальнэ театрэу А. Хьанэ­хъум ыцIэ зыхьырэм шIухьафтын фашIыгъ. Н. Къуекъом ытхы­гъэм техыгъэу «ЦэIунэжъымрэ шъэожъыемрэ» театрэм къыгъэ­лъэ­гъуагъ.

Музыкэр зэгъэфагъэу на­хьы­шIоу къызщагъэлъэгъуагъэхэр А. КIу­ращынэм ипьесэу «Жъы зи­мыIэм кIэ иIэп» зыфиIорэмрэ Урыс драматическэ театрэу А. Пуш­киным ыцIэ зыхьырэм испектаклэу «Дышъэ IункIыбзэ­жъыемрэ».

СурэтышI анахь дэгъоу къыхахыгъэр Сихъу Рэмэзан.

Актер анахь дэгъухэу алъытагъэхэр Лъэпкъ театрэу И. Цэим ыцIэ зыхьырэм иартисткэу Джымэ Заремэрэ Урыс къэралыгъо театрэм иартистэу УдыкIэко Ис­лъамрэ.

Ролэу къашIырэр нахьышIоу къызэIухыгъэнымкIэ, образым куоу хэхьэгъэнымкIэ артистхэр зэнэкъокъугъэх. Камернэ музыка­льнэ театрэм иактрисэу Га­лина Лодяновар жюрим къыхи­гъэщыгъ.

DSC_0661

ХагъэунэфыкIырэ чIыпIэхэр къыдэзыхыгъэхэм кубокхэр, щытхъу тхылъхэр аратыжьы­гъэх.

Адыгэ Республикэм культу­рэмкIэ и Министерствэ иотдел ипащэу Шэуджэн Бэлэ, Урысыем итеатрэхэм яIофышIэхэм я Союз икъутамэу Адыгеим щыIэм ипащэу Зыхьэ Заурбый, республикэм и Къэралыгъо филармоние идиректор шъхьаIэу ЛIышэ Рустем, Камернэ музыкальнэ театрэм ихудожественнэ пащэу Сулейман Юныс, Лъэпкъ театрэм ихудожественнэ пащэу Шъхьэлэхъо Светланэ, нысхъапэхэм ятеатрэу «Дышъэ къошыным» ихудожественнэ пащэу Нэгъой Азэмат, нэмыкIхэр пчэгум къихьа­гъэх, фестивалым осэ ин фа­шIыгъ. Шэуджэн Бэлэ къызэри­Iуагъэу, ящэнэрэ фестивалым зыфагъэхьазырынэу аублагъ, бэ­шIагъэу агъэуцугъэ спектаклэхэм ямызакъоу, кIэу къагъэлъэ­гъощтхэм тяжэщт.

Сурэтхэр зэхахьэм къыщытетхыгъэх.