Адыгеим и Премьер-министрэу КъумпIыл Мурат Ассоциациеу «Урысыем щагъэпсырэ фэбапIэхэр» зыфиIорэм илIыкIохэм бэмышIэу заIокIэм, сомэ миллиарди 2,4-рэ зыосэ инвестиционнэ проектыр Адыгеим зэрэщагъэцэкIэщтым епхыгъэ Iофыгъохэм атегущыIагъэх.
Зигугъу къэтшIыгъэ Ассоциацием хэтэу, Урысые Федерацием и Къэралыгъо Думэ идепутатэу Алексей Ситниковыр, инвесторым илIыкIоу Валерий Захаровыр, Адыгэ Республикэм экономикэ хэхъоныгъэмрэ сатыумрэкIэ иминистрэу ЛIыхэсэ Махьмуд, Адыгэ Республикэм мэкъу-мэщымкIэ иминистрэу Юрий Петровыр, ОАО-у «Адыгэ Республикэм хэхъоныгъэ езыгъэшIырэ корпорацием» ипащэу Къэлэшъэо Рустам зэIукIэгъум хэлэжьагъэх.
Инвестиционнэ проектым тетэу Адыгэ РеспубликэмкIэ Кощхьэблэ районым гектар 24-рэ зэлъызыубытырэ фэбапIэхэр щагъэпсынхэу ямурад. ИлъэситIум къыкIоцI мы проектыр агъэцэкIэнэу, нэбгырэ 350-м нэс щылэжьэнэу рахъухьэ.
— ПредприятиякIэхэм хэхъоныгъэ зэрашIырэм, хэбзэIахьхэр нахьыбэу бюджетхэм зэрарыхьэрэм, IофшIэпIакIэхэр зэрэзэхащэрэм республикэмкIэ непэ мэхьанэшхо иI. Ащ дакIоу тэ тынаIэ зытедгъэтырэр фэшIэшхо зиIэ гъомылэпхъэ къабзэр аIэкIэдгъэхьаныр ары, — къыIуагъ КъумпIыл Мурат.
ХэтэрыкIэу къагъэкIыхэрэр экологическэ шапхъэхэм зэрадиштэрэр Ассоциациеу «Урысыем щагъэпсырэ фэбапIэхэр» зыфиIорэм илIыкIохэм хагъэунэфыкIыгъ.
Адыгэ Республикэм ылъэныкъокIэ мы проектым ипхырыщын фэгъэзэгъэщтыр ОАО-у «Адыгэ Республикэм хэхъоныгъэ езыгъэшIырэ корпорациер» ары. Инвесторхэр тиреспубликэ къегъэблэгъэгъэнхэр, инвестиционнэ промышленнэ площадкэхэр зэхэщэгъэнхэр ары ар анахьэу зыфытегъэпсыхьагъэр.