Аутизмэм епхыгъэ гумэкIыгъохэм защытегущыIэгъэхэ конференцие мы мафэхэм Адыгэ республикэ кIэлэцIыкIу клиническэ сымэджэщым щыкIуагъ. Iофтхьабзэм хэлэжьагъэх педиатрэхэр, неврологхэр, психологхэр, «Особенные дети Адыгеи» зыфиIорэ республикэ общественнэ организацием хэтхэр, нэмыкIхэри.
Iофтхьабзэм изэхэщакIохэм къызэраIуагъэмкIэ, аутизмэ зиIэ цIыфхэм IэпыIэгъу узэрафэхъун фаер, сымаджэхэм ахэт специалистхэм яIофшIэн тэрэзэу зэхащэным фагъэсэнхэр ары конференцием пшъэрылъэу иIагъэр.
ГухэкI нахь мышIэми, аутизмэр зиузхэм япчъагъэ илъэс къэс хэхъо. Мы узыр зиIэм инервнэ системэ хахъорэп, ар зэщэкъо. Анахьэу ар къызынафэрэр илъэси 2,5-м къыщегъэжьагъэу 3-м нэс. Аутизмэр хъужьырэп, ау ар нахь пасэу къыхагъэщы къэс, щыIэныгъэм зэрэщыпсэущт шапхъэхэр нахь псынкIэу рагъашIэх.
Мыщ фэдэ гумэкIыгъо зиIэхэр нахь псынкIэу къыхэгъэщыгъэным врачхэм анахьэу анаIэ зэрэтырагъэтын фаер зэхэсыгъом къыщаIуагъ. Ащ епхыгъэ Iофтхьабзэхэри зэхащэх. Адыгеим ирайонхэм Iоф ащызышIэрэ специалистхэм мы узым фэгъэхьыгъэ къэбархэр аIэкIагъэхьагъэх.
— УнаIэ нахь зытебгъэтын фэе узхэм аутизмэр ащыщ, — къыIуагъ адыгэ республикэ клиническэ психоневрологическэ диспансерым иврач шъхьаIэ игуадзэу Бэгъушъэ Светланэ. — Адыгеим мыщ фэдэ уз яIэу щыдгъэунэфыгъ кIэлэцIыкIу 53-рэ. Ахэм ащыщэу нэбгырэ 27-р Мыекъуапэ щэпсэу.
КIэлэцIыкIухэр сабый IыгъыпIэхэм макIохэмэ, ахэр ялэгъухэм афэдэу псэунхэм пае ашIэхэрэм Бэгъушъэ Светланэ къатегущыIагъ. Мыщ фэдэ уз зиIэ цIыфхэм Iоф адэзышIэрэ специалистхэм нэужым гущыIэгъу афэхъугъэх, яIофшIэн зэрэзэхащэщтым тегущыIагъэх.
Гъонэжьыкъо Сэтэнай.