Урысыем волейболымкIэ изэнэкъокъоу апшъэрэ купэу «Б-м» щыкIорэм Мыекъопэ «Динамо-МГТУ-р» хэлажьэ. Финалым хэфагъэу я 4-рэ чIыпIэм фэбанэ.
Барнаул щыкIогъэ зэIукIэгъухэм тикомандэ текIоныгъэр зэ къащыдихыгъ, ешIэгъуи 4-р шIуахьыгъ. Адыгэ Республикэм изаслуженнэ тренерэу, «Динамо-МГТУ-м» итренер шъхьаIэу Павел Зборовскэм къызэрэтиIуагъэу, командэм икапитанэу Къошк Руслъан шъобж къытыращи, ешIэгъухэм ахэлэжьэнэу хъугъэп. Калугэ, Красногорскэ, Барнаул якомандэхэм зэIукIэгъухэр тшIуахьыгъэх.
ЯтIонэрэ кIэух къекIокIыгъор мэлылъфэгъум и 18 — 24-м Красногорскэ щыкIощт. Адыгеим испортсменхэм зэIукIэгъухэм дэгъоу зафагъэхьазыры. Барнаул икомандэ 2:0-у текIохэзэ, 2:3-у ешIэгъур тшIуахьыгъ. Ащ фэдэхэр къямыхъулIэжьынхэм тиешIакIохэр пылъых.
«Динамо-МГТУ-р» апэрэу финалым хэфагъ, опыт иIэп. Ахэр къыдэтлъытэхэзэ, иешIакIэ хигъэхъонэу фэтэIо. Джыдэдэм я 5-рэ чIыпIэм щыI. Апэрэ чIыпIэр къыдэзыхырэр апшъэрэ купэу «А-м» хэхьащт.