Студентхэм ягъатхэ сыдигъокIи дахэ, уехъопсэнэу щыт. Адыгэ къэралыгъо университетым ныбжьыкIэхэм ягъатхэ фэгъэхьыгъэ Iофтхьабзэр мэлылъфэгъум и 7-м къыщызэIуахыгъ.
КIэлэегъаджэхэр, студентхэр нэгушIох. Зэхахьэр мэфэкIышхом фагъадэзэ, гум рихьэу зафэпагъ. ЗэкIэри кIэракIэхэшъ, ащыщэу узэплъыщтыр, апэу гущыIэ фабэ зэпIощтыр къыхэхыгъошIоп.
Адыгэ къэралыгъо университетым иректорэу Хъунэго Рэщыдэ зэхахьэр пэублэ гущыIэкIэ къызэIуихыгъ. Гъатхэр цIыфым ищыIэныгъэ дахэу къызэрэхахьэрэм, чIыр къызэригъэфабэрэм, щыIэныгъэм зэхъокIыныгъэу къыхилъхьэхэрэм Р. Хъунагом иеплъыкIэхэр къариIолIагъ. НыбжьыкIэхэр искусствэм щызэнэкъокъухэзэ, яшIэныгъэ зэрэхагъахъорэм, сэнаущыгъэу ахэлъыр къызэIуахынымкIэ амалышIухэр яIэ зэрэхъурэм ямэхьанэ ректорым къыхигъэщыгъ.
2016-рэ илъэсыр Урысыем и Президентэу Владимир Путиным иунашъокIэ кином и Илъэсэу хэгъэгум щаштагъ. Ащ къыпкъырыкIыхэзэ, «студентхэм ягъатх» зыфиIорэ Iофыгъор кином фэгъэхьыгъэу зэхащагъ.
ЕджапIэхэм якуп 18 зэнэкъокъум хэлажьэ. Студентхэр къэшъощтых, уджыщтых, усэхэм къяджэщтых, театрализованнэ едзыгъохэр къашIыщтых. Хъунэго Рэщыдэ зэхэщэкIо купым итхьаматэу хадзыгъ. Жюрим хэтхэм студентхэм якъэгъэлъэгъонхэм уасэ афашIыщт.
Едзыгъохэм уагъэгупшысэ
Тарихъым щыщ хъугъэ-шIагъэхэр, щыIэныгъэм диштэрэ еплъыкIэхэр гъэшIэгъоных, гур агъэлъэпэрапэ. Пачъыхьэу Иван Грознэм итетыгъо къагъэлъагъозэ, студентхэм лIэужхэр зэрапхыгъэхэу тлъытагъэ. ЛIэшIэгъубэкIэ зэкIэIэбэжьхэзэ, Иван Грознэм еупчIых Адыгеим еплъыкIэу фыриIэм. Экономикэм, фэшъхьафхэм атегущыIэхэзэ, тиреспубликэ инепэрэ щыIакIэ гукIэ укъыращалIэ.
— Фестивалыр ныбжьыкIэхэм еджапIэ афэхъу, — къеIуатэ жюрим хэтэу, Адыгэ Республикэм инароднэ артисткэу Кушъэкъо Симэ. — Искусствэм цIыфыр зэрипIурэр, щыIэныгъэм зэрэфигъасэрэр едзыгъохэм къахэщы. Сценэшхом укъытехьаныр, дахэу ущызекIоныр Iоф къызэрыкIоп. УигущыIэкIэ цIыфхэм уалъыIэсыным фэшI бзэм псэ къыпыбгъэкIэн зэрэфаер студентхэм къагурэIо.
ЕплъыкIэхэр
IэкIыб къэралыгъуабзэхэр зыщызэрагъэшIэрэ факультетым щеджэхэрэр дахэу фэпагъэх. Зыр Испанием къикIыгъэу, ятIонэрэр Францием щапIугъэу къыпщагъэхъу. Адыгэ шъуашэр зыщыгъ кIалэхэм язекIокIэ-шIыкIэхэм уагъэгушхо. Апкъхэр ищыгъэх, лъэгъупхъэх, гущыIэ лые ашIырэп. Мыекъопэ къэралыгъо гуманитар-техническэ колледжым щеджэрэ пшъашъэхэр дзэкIолIхэм афэтэгъадэх. Шъонтрыпхэм атеохэзэ дахэу мэзекIох, нэр пIэпахы.
Физкультурэмрэ дзюдомрэкIэ Институтым иеджакIохэу Яна Иньковамрэ Екатерина Козловамрэ спорт шъуашэхэр ащыгъых. КъокIыпIэм къыщежьэгъэ спорт лъэпкъхэр едзыгъохэм къащагъэлъагъох. Ректорым игуадзэу Тыгъужъ Фатимэ къызэриIуагъэу, щыIэныгъэм илъэныкъуабэ студентхэр лъэIэсых.
Университетым икъутамэу Шытхьалэ щыIэм, Лъэпкъ факультетым щеджэхэрэм тыгъуасэ я ХVII-рэ фестивалыр лъагъэкIотагъ.
Сурэтхэр зэхахьэм къыщытетхыгъэх.
