Урысые Федерацием баскетболымкIэ изэнэкъокъу хэлэжьэрэ командэхэу суперлигэм ия 3-рэ куп щешIэхэрэр медальхэм афэбанэх. ПэшIорыгъэшъ зэIукIэгъухэр къекIокIыгъуи 4-мэ ащыкIуагъэх. ЧIыпIэу къыдахыгъэм елъытыгъэу ешIэгъухэм ахэлажьэх.
«Динамо-МГТУ-р» «Тегасым» тIогъогогъо текIуи, финалым и 1/4-м шIокIыгъ. Къалэхэу Воронеж ыкIи Киров якомандэхэр зызэIокIэхэм, апэрэ ешIэгъоу Киров щыкIуагъэм бысымхэм текIоныгъэр къыщыдахыгъ. ЯтIонэрэ, ящэнэрэ зэIукIэгъухэр Воронеж щызэхащагъэх. Апэрэ ешIэгъур «Согдианэм» къыхьыгъ, ау ятIонэрэ зэIукIэгъум Киров икомандэу «Русичи» зыфиIорэр нахь щылъэшыгъ. «Русичир» 2:1-у зэрэтекIуагъэм ишIуагъэкIэ, зэнэкъокъум щылъэкIуатэ.
— Мэлылъфэгъум и 10-м къалэу Киров тыщешIэщт, — къытиIуагъ «Динамо-МГТУ-м» итренер шъхьаIэу Андрей Синельниковым. — КъыкIэлъыкIорэ ешIэгъуитIур Мыекъуапэ щыIэщт. ГъогогъуитIо текIоныгъэр къыдэзыхырэ командэр ары лъыкIотэщтыр. Тэ апэрэ чIыпIэм тыфэбанэ.
СпортымкIэ дунэе класс зиIэ мастерэу, баскетболым щыцIэрыIоу Валентин Кубраковыр «Динамо-МГТУ-м» къырагъэблэгъэжьыгъ. «Тегасым» ар дэгъу дэдэу дешIагъ. «Русичыр» «Тегасым» бэкIэ нахь лъэш. Тиспортсменхэм ешIэгъухэм яшъыпкъэу зафагъэхьазыры.
ЯтIонэрэ зэIукIэгъур мэлылъфэгъум и 13-м Мыекъуапэ щыкIощт. ТIогъогогъо текIоныгъэр къыдэзыхырэр лъыкIотэщт. Адыгэ Республикэр мыгъэ илъэс 25-рэ мэхъу. «Динамо-МГТУ-м» спортым гъэхъагъэу щишIырэр ары шIухьафтынэу республикэм фишIыщтыр.