Мэлылъфэгъум и 11-м кIэлэцIыкIухэм апае театрэм ифестиваль Мыекъуапэ щызэхащэщт. Ащ фэгъэхьыгъэ зэIукIэ Адыгэ Республикэм культурэмкIэ и Министерствэ щыкIуагъ.
Адыгэ Республикэм и Къэралыгъо программэу 2014 — 2018-рэ илъэсхэм культурэм хэхъоныгъэхэр егъэшIыгъэнхэм фэгъэхьыгъэ зэхахьэр Адыгеим культурэмкIэ иминистрэу Къулэ Мыхьамэт зэрищагъ.
Я II-рэ шъолъыр фестивалым изэхэщэкIо куп изэхахьэ хэлэжьагъэх культурэмкIэ министерствэм иотдел ипащэу Шэуджэн Бэлэ, Лъэпкъ театрэу Цэй Ибрахьимэ ыцIэкIэ щытым ихудожественнэ пащэу Шъхьэлэхъо Светланэ, Камернэ музыкальнэ театрэу Хьанэхъу Адамэ ыцIэкIэ щытым ихудожественнэ пащэу Сулейман Юныс, нысхъапэхэм ятеатрэу «Дышъэ къошыным» ихудожественнэ пащэу Нэгъой Азэмат, Урыс драматическэ театрэу А. Пушкиным ыцIэ зыхьырэм идиректорэу Николай Иванченкэр, республикэм и Къэралыгъо филармоние идиректор шъхьаIэу ЛIышэ Рустем, Адыгеим итеатрэхэм яIофышIэхэм я Союз итхьаматэу Зыхьэ Заурбый, нэмыкIхэри.
М. Къулэм зэрэхигъэунэфыкIыгъэу, шъолъыр зэхахьэр мэлылъфэгъум и 11-м сыхьатыр 10-м аублэщт. Iэнэ хъураер, «Мастер-класс» зыфиIорэр, фэшъхьафхэри зэхащэщтых, спектаклэхэр къагъэлъэгъощтых. КIэлэпIухэм нахь ашIогъэшIэгъон театральнэ Iофыгъохэр зэхахьэм къыщаIэтыщтых.
Сахьидэкъо Нурбый.