Адыгэ Республикэм хэгъэгу кIоцI IофхэмкIэ и Министерствэ кIэщакIо фэхъуи, джырэблагъэ команднэ-штабнэ егъэджэнхэр Мыекъуапэ щыкIуагъэх. Ахэм алъыплъагъ УФ-м хэгъэгу кIоцI IофхэмкIэ и Министерствэ иинспектор шъхьаIэу, полицием игенерал-майорэу Игорь Романовскэр. Iофтхьабзэм пэщэныгъэ дызэрихьагъ АР-м хэгъэгу кIоцI IофхэмкIэ иминистрэу, полицием игенерал-майорэу Александр Речицкэм.
МВД-м икъулыкъушIэхэм анэмыкIэу егъэджэнхэм алъыплъагъэх АР-м и ЛIышъхьэрэ министрэхэм я Кабинетрэ я Администрацие, УФ-м щынэгъончъагъэмкIэ и Федеральнэ къулыкъу Адыгэ РеспубликэмкIэ и ГъэIорышIапIэ, УФ-м ошIэ-дэмышIэ IофхэмкIэ и Министерствэ АР-мкIэ и ГъэIорышIапIэ ыкIи бзэджашIэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм ялIыкIохэр.
Егъэджэнхэм пшъэрылъэу яIагъэр АР-м и МВД иподразделениехэр ыкIи районхэм ячIыпIэ отделхэр псынкIэу ыкIи яIо зэхэлъэу зекIонхэр ары.
Практическэ егъэджэнхэм МВД-м ихэушъхьафыкIыгъэ подразделениехэр ыкIи исводнэ отрядхэр хэлэжьагъэх. Ахэм зэкIэми ухьазырыныгъэ дэгъу къагъэлъэгъуагъ, пшъэрылъэу къафагъэуцугъэр дэх имыIэу агъэцэкIагъ. Команднэ-штабнэ егъэджэнхэм зэфэхьысыжь шъхьаIэу афэхъугъэмкIэ, ичIыпIэхэр ыкIи ипсэуалъэхэр терроризмэм щыухъумэгъэнхэм Адыгэ Республикэр фэхьазыр.
Iофтхьабзэм икIэуххэр зэфахьысыжьхэзэ пащэхэм къызэраIуагъэмкIэ, МВД-м икъулыкъушIэхэм пшъэрылъэу къафагъэуцугъэхэр дэгъоу агъэцэкIагъ ыкIи ахэм ухьазырыныгъэу къа-гъэлъэгъуагъэм осэшIу фашIыгъ.
КIарэ Фатим.
