Iахьзэхэлъ IофшIапIэу «Газпромым» икъутамэу Астрахань щыIэр илъэс 35-рэ зэрэхъугъэм фэгъэхьыгъэ зэнэкъокъу самбэмкIэ псэупIэу Яксатово щыкIуагъ.
1998 — 2000-рэ илъэсхэм къэхъугъэ кIалэхэр Астрахань хэкум щызэIукIагъэх. Адыгэ Республикэм самбэмкIэ икIэлэцIыкIу-ныбжьыкIэ спорт еджапIэ зыщызыгъасэрэмэ медали 8 зэIукIэгъухэм къащыдахыгъ.
Еутых Рэмэзан, кг 65-рэ, Вардкез Акопян, кг 87-м къехъу, апэрэ чIыпIэхэр къафагъэшъошагъэх. Дэхъужь Хъызыр, кг 52-рэ, ЦIыкIу Рэмэзан, кг 60, Виталий Рудиковыр, кг 70-рэ, ятIонэрэ хъугъэх. Бахъукъо Амир, кг 55-рэ, ЛIыIужъу Азмэт, кг 65-рэ, Гъомлэшк Амир, кг 70-рэ, джэрз медальхэр къахьыгъэх.
ХагъэунэфыкIырэ чIыпIэхэр къыдэзыхыгъэ бэнакIохэм япащэх тренер-кIэлэегъаджэхэу Джарымэкъо Нурбый, Хьакурынэ Дамир, Дэхъужь Мурат, Шъэумэн Байзэт, Гъомлэшк Алый.
Адыгэ къэралыгъо университетым и Мыекъопэ къэралыгъо гуманитар-техническэ колледж щеджэх Гъомлэшк Амир, Бахъукъо Амир, Виталий Рудиковыр, Варкез Акопян. Спортым гъэхъагъэ зэрэщашIырэм дакIоу, кIалэхэм яшIэныгъэ хагъахъо, щысэшIу къагъэлъагъо.
Адыгэ Республикэм физкультурэмрэ спортымрэкIэ и Комитет итхьаматэу, дунаим самбэмкIэ гъогогъу 11 дышъэ медальхэр къыщыдэзыхыгъэу Хьасанэкъо Мурат спортсмен цIэрыIохэм ащыщэу Астрахань рагъэблэгъагъ, зэнэкъокъум изэхэщакIохэм гущыIэгъу афэхъугъ.
Хьасанэкъо Мурат хагъэунэфыкIырэ чIыпIэхэр къыдэзыхыгъэмэ афэгушIуагъ, шIухьафтынхэр аритыжьыгъэх.