2014 — 2018-рэ илъэсхэм культурэм хэхъоныгъэхэр ышIынхэмкIэ Адыгеим къэралыгъо унашъохэр щырахъухьагъэх.
Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэкIэ щытым Адыгеим культурэмкIэ и Министерствэ IэпыIэгъу фэхъузэ, пIуныгъэм, егъэджэным афэгъэхьыгъэ Iофыгъохэр зэхещэх.
Эстрадэ ыкIи академическэ орэдхэр къэIогъэнхэмкIэ илъэс къэс зэнэкъокъухэр Адыгэ Республикэм щэкIох. Сэнаущыгъэ зыхэлъ еджакIохэр къыхэгъэщыгъэнхэм, искусствэм епхыгъэ сэнэхьатхэм афэгъэсэгъэнхэм зэхэщакIохэр пылъых.
Аныбжь елъытыгъэу кIэлэеджакIохэр академическэ орэд къэIонымкIэ купищэу гощыгъэхэу зэнэкъокъугъэх. Урысыем, Адыгеим культурэмкIэ язаслуженнэ IофышIэу, кIэлэегъаджэу Даутэ Сарыет, Къэралыгъо филармонием иорэдыIоу, Адыгэ Республикэм изаслуженнэ артисткэу Нэгъой Маринэ, республикэм искусствэхэмкIэ икIэлэцIыкIу еджапIэ икIэлэегъаджэу Марина Прошинар жюрим хагъэхьагъэх.
Илъэси 7 — 10 зыныбжьхэм язэнэкъокъу Евнико Исенкэр ащытекIуагъ. Ар Мыекъуапэ щеджэ. Людмила Аношинар икIэлэегъадж. Софья Машенцевар ятIонэрэ хъугъэ. ПсэупIэу Тульскэм Iоф щызышIэрэ Шъхьэбэцэ Сыхьатбый пшъэшъэжъыер регъаджэ. Мыекъуапэ икIэлэеджакIоу Энтони Москвичым ящэнэрэ чIыпIэр фагъэшъошагъ.
Илъэс 11 — 13 зыныбжьхэм язэIукIэгъухэм Хъурэнэ Зарэ апэрэ чIыпIэр къащыдихыгъ. ИскусствэхэмкIэ республикэ колледжым Зарэ чIэс, икIэлэегъаджэр Даутэ Сарыет. ЕмыкI Мадинэ ятIонэрэ чIыпIэр фагъэшъошагъ. Пшъэшъэжъыер Кощхьаблэ щэпсэу, Къушъхьэ Сусан ары икIэлэегъаджэр.
Шэлбэе Дамири ятIонэрэ чIыпIэр ыхьыгъ, Кощхьаблэ щыщ, икIэлэегъаджэр КIэдэкIой Азид. Шэуджэн районым къикIыгъэ Зарина Мирзоевар ящэнэрэ хъугъэ, икIэлэегъаджэр Хъымыщэкъо Эмм.
Илъэс 14 — 16 зыныбжьхэм яшIэныгъэ къагъэлъэгъонымкIэ зэнэкъокъум зэрэхэлэжьагъэхэм уасэ фэшIыгъошIоу щытыгъэп. Сэнаущыгъэу ахэлъым уегъэгушхо, артист дэгъухэр къахэкIыщтхэу тагъэгугъэ. ПсэупIэу Тульскэм къикIыгъэ Елена Хлопонинам апэрэ чIыпIэр ыхьыгъ, Адыгэ Республикэм изаслуженнэ артистэу Шъхьэбэцэ Сыхьатбый икIэлэегъадж. Апэрэ чIыпIэхэр Альбина Торосянрэ Ангелина Сиротенкэмрэ афагъэшъошагъэх, ахэри Тульскэм щыщых, Галина Мордовинам регъаджэх.
Амалия Алмазян, Людмила Оробец, Шъхъий Амир, Адам Мамоян, Абэсэ Долэт хагъэунэфыкIырэ чIыпIэхэр къыдахыгъэх.
Илъэс 14 — 16 зыныбжьхэм якуп Даниил Гаркуновым апэрэ чIыпIэр къыщыдихыгъ, Шъхьэбэцэ Сыхьатбый икIэлэегъаджэр. Полина Дербеневамрэ Анна Пешковамрэ ятIонэрэх. Яблоновскэ къикIыгъэ Хьагъур Нурыет ящэнэрэ чIыпIэр ыхьыгъ, икIэлэегъаджэр Джарымэ Алл.
Нэбгырэ 47-рэ зэнэкъокъугъ, шIухьафтын шъхьаIэу «Гран-при» зыфиIорэр Мырзэ Ислъам фагъэшъошагъ. Тэхъутэмыкъуае искусствэхэмкIэ икIэлэцIыкIу еджапIэ ащ зыщегъасэ, икIэлэегъаджэр ЖэнэлI Римм, фортепианэмкIэ къыдежъыугъэр Цуекъо Светлан. Орэдхэу «Италия», «Бубенцы» зыфиIохэрэр Мырзэ Ислъам мэкъэ IэтыгъэкIэ кIыригъэщыгъэх.
Ислъам илъэс 11 — 13 зыныбжьхэм якуп хэтыгъ. ИкIэлэегъаджэхэм къащытхъугъ, ныбджэгъу дэгъухэр иIэхэу къытиIуагъ.
Сурэтым итыр: шIухьафтын шъхьаIэр къыдэзыхыгъэу Мырзэ Ислъам.