ГъогурыкIоныр щынэгъончъэным, кIэлэцIыкIухэр зыхэфэхэрэ хъугъэ-шIагъэхэр къэмыгъэхъугъэнхэм, ахэм ащыухъумэгъэнхэм афэшI мэлылъфэгъум 6-м къыщегъэжьагъэу и 10-м нэс Адыгэ Республикэм ичIыпIэхэм пэшIорыгъэшъ Iофтхьабзэу «КIэлэцIыкIу тIысыпI» зыфиIорэр ащыкIощт.
АР-м и Къэралыгъо автоинспекцие икъулыкъушIэхэр кIэлэцIыкIу IыгъыпIэхэм адэжь водительхэр къащагъэуцухэзэ, кIэлэцIыкIур машинэм исэу зепщэнымкIэ хэушъхьафыкIыгъэ тIысыпIэхэр шIокI имыIэу агъэфедэхэмэ ауплъэкIущтых.
Iофтхьабзэм пшъэрылъ шъхьаIэу иIэр кIэлэцIыкIухэр щынэгъончъэу автомобилымкIэ зэращэнхэмкIэ гъогурыкIоным ишапхъэхэр водительхэм амыукъонхэр ыкIи кIэлэцIыкIухэу гъогухэм атекIуадэхэрэм, шъобжхэр зытещагъэ хъухэрэм япчъагъэ нахь макIэ шIыгъэныр ары.
КIэлэцIыкIухэр щынэгъончъэу къекIокIынхэмкIэ шапхъэу щыIэхэр амыукъонхэу къулыкъушIэхэр водительхэм къяджэх.
Полицием иполковникэу И. ПIатIыкъор.