ТуризмэмкIэ ыкIи зыгъэпсэфынымкIэ Дунэе фестивалэу «Мир без границ» зыфиIорэр мэлылъфэгъум и 1 — 2-м къалэу Ростов-на-Дону щыкIуагъ. Адыгэ Республикэм туризмэмрэ курортхэмрэкIэ и Комитет илIыкIо купэу нэбгырэ 12 хъущтыгъэр ащ хэлэжьагъ.
Республикэ экспозициеу «Открой для себя Адыгею» зыфиIорэм къыдыхэлъытагъэу, зекIонымкIэ яеплъыкIэхэр, фэIо-фашIэу афагъэцакIэхэрэр тилIыкIохэм къыраIотыкIыгъэх. Ащ имызакъоу, Адыгеим итурбизнес илIыкIохэр тапэкIэ зыдэлэжьэнхэ алъэкIыщт яIофшIэгъухэм зэIукIэгъухэр адашIыгъэх.
ТуризмэмкIэ Ассоциациеу «Юг» зыфиIорэм и Межведомственнэ координационнэ совет игъэкIотыгъэ зэхэсыгъоу иIагъэм ыпшъэкIэ зигугъу къэтшIыгъэ комитетым итхьаматэу Къэлэшъэо Инвер къыщыгущыIагъ. Адыгеим изекIо отраслэ изытет ыкIи хэхъоныгъэу тапэкIэ ышIын ылъэкIыщтхэм ар къащыуцугъ. Шъугу къэдгъэкIыжьын, 2015-рэ илъэсым зекIо нэбгырэ мин 360-рэ республикэм къэкIуагъ, ар ыпэрэ илъэсым егъэпшагъэмэ, проценти 10-кIэ нахьыб. ФэIо-фашIэу зекIонымкIэ афагъэцэкIагъэхэм проценти 10 ахэхъуагъ, сомэ миллион 430,5-рэ ахэм къакIэкIуагъ. Ащ хэхъоныгъэ зэришIыгъэм лъапсэу фэхъурэр Адыгеим зекIонымкIэ иIэ амалхэр цIыфхэм дэгъоу зэралъагъэIэсыгъэхэр, турист комплексхэр зэрагъэпсыгъэхэр ары. Аужырэ уахътэхэм мы лъэныкъом пэIуагъэхьанэу сомэ миллиарди 3 фэдиз къафатIупщыгъ. ИкIыгъэ илъэс закъор пштэмэ, проектэу «Лэгъо-Накъэ икъэлапчъэхэр» зыфиIорэм къызэрэдилъытэрэмкIэ, газ ыкIи псыр зэрыкIощтхэ объектхэм яшIын сомэ миллион 437,5-рэ пэIухьагъ. Ахъщэр федеральнэ ыкIи республикэ бюджетхэм къахахыгъ. Проектым ыкIи псэуалъэхэм ягъэпсын мыгъи лъагъэкIотэщт, ащ сомэ миллион 341,5-рэ текIодэнэу къалъытэ.
Межведомственнэ советым изэхэсыгъо зыщытегущыIагъэхэм ащыщ 2018-рэ илъэсым футболымкIэ Дунэе чемпионатэу щыIэщтым зызэрэфагъэхьазырырэр, урысые туризмэр гъэпытэгъэнымкIэ, регионхэм нахь анаIэ къатырадзэнымкIэ мы хъугъэ-шIагъэр амалышIоу гъэфедэгъэныр. Къэлэшъэо Инвер къыхигъэщыгъэхэм ащыщ Урысыер лъэныкъо зэфэшъхьафхэмкIэ зэрэбаир фестивалым къыщыгъэлъэгъогъэн зэрэфаер.
— АпэрэмкIэ, мыщ фэдэ мэхьанэ зиIэ Iофтхьабзэр зыщыкIощт шъолъырым имызакъоу, ащ изэхэщэн гъунэгъу субъектхэри хэлэжьэнхэу щыт. Мы лъэныкъомкIэ Адыгеим чанэу Iоф ышIэщт, — къыхигъэщыгъ Къэлэшъэо Инвер.
Чемпионатым къекIолIэщт хьакIэхэр, ешIэгъухэр зыщыкIощтхэ къалэхэу Шъачэ ыкIи Ростов къаращынхэшъ, Адыгэ Республикэм зекIо къызэращэщтхэмкIэ предложениехэр къахьыгъэх. Джащ фэдэу, хьакIэхэм чIыпIэ дахэхэр къарагъэплъыхьанхэм, ящыкIэгъэ фэIо-фашIэхэр афагъэцэкIэнхэм Адыгеир зэрафэхьазырыр зэхэсыгъом къыщаIуагъ. Советым хэтхэм ащ дырагъэштагъ, тапэкIи Iофыгъо гъэнэфагъэхэм язэхэфынкIэ зэIукIэгъухэр яIэщтых.
Iэшъынэ Сусан.
