Экономикэм хэхъоныгъэхэр ышIынхэм ыкIи республикэм социальнэ зыпкъитыныгъэ илъыным афэгъэзэгъэ комиссием зичэзыу зэхэсыгъоу тыгъуасэ иIагъэм тхьамэтагъор щызэрихьагъ Адыгэ Республикэм и Премьер-министрэу КъумпIыл Мурат.
Апэрэ Iофыгъоу къэзэрэугъоигъэхэр зытегущыIагъэхэр экономикэм хэхъоныгъэхэр ышIынхэм ыкIи республикэм социальнэ зыпкъитыныгъэ илъыным фытегъэпсыхьэгъэ планым ипроект гъэцэкIагъэ зэрэхъущтыр ары. Мыщ епхыгъэу къэгущыIагъ АР-м экономикэ хэхъоныгъэмкIэ ыкIи сатыумкIэ иминистрэу ЛIыхэсэ Махьмудэ. Ащ къызэриIуагъэмкIэ, 2016-рэ илъэсым телъытэгъэ мыщ фэдэ планэу УФ-м и Правительствэ ыштагъэм къызэригъэнафэу, къэралыгъом исубъектхэм мы лъэныкъомкIэ гухэлъэу яIэхэр федеральнэ планым диштэхэу гъэпсыгъэнхэ фае. Ащ къыдыхэлъытагъэу экономикэм хэхъоныгъэхэр ышIынхэм ыкIи шъолъырым социальнэ зыпкъитыныгъэ илъыным апае анахьэу анаIэ зытырагъэтыщт Iофыгъохэр республикэм щагъэнэфагъэх. Адыгеим игъэцэкIэкIо хэбзэ къулыкъухэм ягъусэу планым изэхэгъэуцон чанэу хэлэжьагъ Урысые общественнэ движениеу «Народнэ фронтым» ирегиональнэ къутамэу Адыгеим щыIэр. ЦIыфхэм IофшIэпIэ чIыпIэхэр ягъэгъотыгъэнхэр, фэгъэкIотэныгъэ зиIэхэм ящыкIэгъэ Iэзэгъу уцхэр игъом аIэкIэгъэхьэгъэнхэр, республикэ бюджетым ифедэкъэкIуапIэхэм ахэгъэхъогъэныр, предпринимательствэ цIыкIумрэ гурытымрэ IэпыIэгъу афэхъугъэныр, цIыфхэм щыIэкIэ-псэукIэ амалэу яIэхэр нахьышIу шIыгъэнхэр, нэмыкI лъэныкъохэри планым ипроект къыдыхэлъытагъэх.
АР-м и Премьер-министрэ анахьэу ынаIэ зытыридзагъэр предпринимательствэм епхыгъэ Iофыгъохэр ары.
— Республикэм ит предприятие инхэм, бизнес цIыкIум ыкIи гурытым хэщагъэхэм ямызакъоу, унэе хъызмэтшIапIэ къызэIузыхы зышIоигъохэм сыд фэдэрэ лъэныкъокIи IэпыIэгъу тафэхъуныр пшъэрылъ шъхьаIэхэм ащыщ, — къыIуагъ КъумпIыл Мурат. — Ащ фэдэ екIолIакIэм ишIуагъэкIэ, IофшIэпIэ чIыпIакIэхэр тиIэщтых, бюджет зэфэшъхьафхэм къарыхьэрэ хэбзэIахьхэр нахьыбэ тшIынхэ тлъэкIыщт. Экономикэм хэхъоныгъэхэр ышIынхэм ыкIи республикэм социальнэ зыпкъитыныгъэ илъыным фэIорышIэщт планым къыдыхэлъытэгъэ Iофтхьабзэхэр щыIэныгъэм щыпхырыщыгъэнхэм пае отраслэхэм япащэхэм пшъэдэкIыжь зэрахьырэр къагурыIозэ, къатефэрэр агъэцэкIэн фае. ЫпэкIэ тыплъэным, гумэкIыгъоу, щыкIагъэу щыIэхэр дэгъэзыжьыгъэнхэм, тицIыфхэм щыIэкIэ-псэукIэу яIэр нахьышIу шIыгъэным мэхьанэшхо зэряIэр зыщыдгъэгъупшэ хъущтэп. Ащ дакIоу къоджэ псэупIэхэм адэс цIыфхэм Iоф ашIэным, зызэраIыгъыжьыщтым пылъынхэм фэтыузэнкIынхэ фае. Ащ пае ахэм тишIуагъэ ядгъэкIын тлъэкIыщт, ащ къыдыхэлъытагъ унэе хъызмэтшIапIэ къызэIузыхы зышIоигъохэм IэпыIэгъу афэхъущт кредит мыинхэр аIэкIэгъэхьэгъэнхэр. Джащ фэдэу тишъолъыр къихьэрэ инвестициехэм зэрахэдгъэхъощтым тыпылъын фае.
АР-м и Премьер-министрэ къызэриIуагъэмкIэ, къуаджэм дэсхэм IофшIэным еплъыкIэ тэрэз фыряIэнымкIэ щысэ дэгъу къэзыгъэлъагъохэрэр станицэу Ханскэм щыпсэухэрэр арых. Мыхэм гъэфэбапIэхэр бэу ашIых, жьэу хэтэрыкIхэр къагъэкIых, ахэр ащэх, яунагъохэр раIыгъыжьых. АщкIэ Мыекъопэ къэлэ администрациери IэпыIэгъу афэхъу. НэмыкI псэупIэхэми мы екIолIакIэр IэубытыпIэ ашIэу яIофшIэн загъэпсыкIэ ишIогъэшхо къызэрэкIощтыр пащэм къыхигъэщыгъ.
Адыгеим щыпсэухэрэм Iэзэгъу уцхэр игъом ыкIи икъоу аIэкIэгъэхьэгъэнымкIэ Iофхэм язытет зыфэдэм къытегущыIагъ АР-м псауныгъэр къэухъумэгъэнымкIэ иминистрэу Мэрэтыкъо Рустем. Ащ къызэриIуагъэмкIэ, ыпкIэ зыхэмылъ медицинэ IэпыIэгъур цIыфхэм ягъэгъотыгъэным ипрограммэ игъэцэкIэн блэкIыгъэ илъэсым сомэ миллион 803-м ехъу пэIуагъэхьагъ. 2014-рэ илъэсым егъэпшагъэмэ, ар процент 25-кIэ нахьыб. Министерствэм зэхищэгъэ аукционхэм яшIуагъэкIэ, сомэ миллион пчъагъэ къагъэнэжьын алъэкIыгъ. А ахъщэмкIэ медикаментхэр къащэфыгъэх. Врачым къыритхыкIыгъэ рецептымкIэ ыпкIэ хэмылъэу е фэгъэкIотэныгъэ фашIызэ Iэзэгъу уцхэр аратынхэм ифитыныгъэ яIэу икIыгъэ илъэсым икIэухым Адыгеим нэбгырэ 39660-рэ щыпсэущтыгъэ. ФэгъэкIотэныгъэ зиIэу Адыгеим щыпсэухэрэм Iэзэгъу уцэу ящыкIагъэхэр ягъэгъотыгъэнхэм зэкIэмкIи сомэ миллион 314,4-м ехъу тырагъэкIодагъ. Зизакъоу псэухэрэ нэжъ-Iужъхэм ыкIи ежь-ежьырэу зифэIо-фашIэ зымыгъэцэкIэжьышъухэрэ нэбгырэ 4500-мэ Iэзэгъу уцхэр яунэхэм афащагъэх. БлэкIыгъэ илъэсым къыкIоцI Iэзэгъу уцхэм ауасэ къызэрэхэхъуагъэр, республикэм икъоджэ псэупIэхэм фельдшерхэр зэращимыкъухэрэр гумэкIыгъо шъхьаIэу министрэм къыгъэнэфагъэх. ЫпэкIэ зэрэщытыгъэм фэдэу, медицинэ сэнэхьатыр зэзыгъэгъотырэ ныбжьыкIэхэр кадрэхэр зыщимыкъурэ чIыпIэхэм зэрагъакIощтыгъэхэм, ащ зи бырсыр къызэрэпымыкIыщтыгъэм къыфэгъэзэжьыгъэ хъумэ ишIогъэшхо къэкIощтэу Р. Мэрэтыкъом ылъытагъ.
— Iэзэгъу уцхэр зыщащэрэ аптекэхэр республикэм ит псэупIэхэм зэкIэми адэтынхэ фае. Мы уахътэм а пшъэрылъыр икъу фэдизэу гъэцэкIагъэ хъурэп. Арышъ, гумэкIыгъор дэгъэзыжьыгъэным пстэуми тынаIэ тедгъэтын фае. Медицинэм иучреждениехэм язэтегъэпсыхьан мы аужырэ илъэсхэм ахъщэшхо пэIудгъэхьагъ, джы ахэм шIуагъэ къытэу Iоф ашIэныр, цIыфхэм яфэIо-фашIэхэр зэрифэшъуашэу зэшIуахынхэр пшъэрылъ шъхьаI, — къыIуагъ КъумпIыл Мурат.
Зэхэсыгъом къыщаIэтыгъэ Iофыгъохэм япхыгъэу комиссием хэтхэм унэшъо гъэнэфагъэхэр ашIыгъэх.
ТХЬАРКЪОХЪО Адам.
Сурэтыр А. Гусевым тырихыгъ.