«ПерестройкэкIэ» зэджэгъэхэ илъэсхэм анахьыбэу утын зэрахыгъэхэм ащыщ Почтэр. НахьыпэкIэ ахэм амалэу яIагъэр, уасэу афашIыщтыгъэр непэ щыIэжьэп.
Почтэр район гупчэм анахь пэIудзыгъэ псэупIэми анэсыщтыгъ. Джы ахэр зыпарэми имыщыкIэгъэжьхэм фэд. Почтэхэм ащылажьэхэрэм къагъахъэрэр зэрэмэкIэ дэдэм къыхэкIыкIэ, Iоф ащызышIэн щыIэп, почтальонхэр, операторхэр, ары пакIошъ, почтэ пащэхэр икъухэрэп. Почтальон зимыIэ почтэхэр Тэхъутэмыкъое районым итых. Мары поселкэшхоу Яблоновскэм ипочтэхэм яIэп, нэмыкI псэупIэхэми зимыIэхэр бэу ахэтых. Гъэзетхэм, журналхэм акIэтхагъэхэ щыIэмэ, ежь-ежьырэу макIохэшъ, къахьыжьых. Ары шъхьае Почтэр зыпэчыжьэхэр сыдэу хъухэра? Гъэзетыр зикIасэу, ар зиныбджэгъухэм хэкIыпIэ къагъотыгъ. Куп-купэу зэхэхьахэшъ, чэзыур къызнэсыгъэр макIошъ, нэмыкIхэм яехэри къехьыжьых.
Почтэ зэпхыныгъэхэр зэрэзэщыкъуагъэхэм иягъэ мымакIэу кIэтхэнымкIи къэкIо, кIэтхакIохэр бэкIэ нахь макIэ хъугъэх. Уасэхэр къызэраIэтыгъэхэм имызакъоу, почтальонхэр чIыпIабэхэм зэрямыIэхэри, зыкIэтхагъэхэр ежь-ежьырэу къызэрамыхьыжьышъущтыри ащ ушъхьагъу фэхъугъэх. Поселкэу Яблоновскэм щыпсэурэ синэIосэ лIым «Адыгэ макъэр» къыретхыкIымэ сеупчIыгъ. КIэтхапкIэр къызэраIэтыгъэр, ежь ипенсие зэрэмакIэр, кIочIэгъу зэрэфыримыкъущтыр ащ къыIуагъ. Мэзищ кIэтхэгъукIэ илъэсныкъом укIэтхэн плъэкIынэу зэрашIыгъэр есIуагъ.
— КъапIорэр гъэшIэгъоны, ар сшIагъэп. «Адыгэ макъэр» сикIас, сыкIэтхэщт, — ыIуагъ лIым.
Игъунэгъу кIэлэцIыкIур зыдэкIорэ еджапIэм Почтэр пэгъунэгъушъ, джы ащ къыфехьыжьы, зы статья блимыгъэкIэу еджэ. Нэужым сишIогъэшхо зэрекIыгъэр, гъэзетым игуапэу зэреджэрэр, тIо кIиджыкIыжьырэ статьяхэр къызэрахэкIыхэрэр телефонкIэ къысиIуагъ. Мы щысэм Почтэм иIофышIэхэм икъу фэдизэу япшъэрылъхэр зэрамыгъэцакIэхэрэр къеушыхьаты. Арэу щытми, ахэри бгъэмысэнхэу хъурэп, ялэжьапкIэ мэкIэ дэд. ЦIыфым дэгъоу Iоф ышIэным пае иIофшIэн кIэгушIужьынэу, федэ къыфыхэкIынэу пшIын фае.
Арэу щытми, къинхэм апэшIуекIохэзэ алъэкI къамыгъанэу Iоф зышIэхэрэри щыIэх. АщкIэ Афыпсыпэ дэт Почтэм иIофшIакIэ щысэу къэпхьын плъэкIыщт. Ащ ипащ Чэмышъо Маринэ. Коллективыр инэп, пстэумкIи нэбгыритф ныIэп зэрэхъурэр: ахэр операторэу Iэлэлэ Дарыет, почтальонхэу Жэнэ Нурыет, Бэджэщэ Рим, Дубковэ Дарыет. Гъэзетхэм пстэумкIи нэбгыри 170-рэ акIатхэрэр, анахьыбэу «Согласиер», «Адыгэ макъэр», «Вольная Кубань» зыфиIорэр ары къыратхыкIыхэрэр. КIэтхэкIо анахь чанэу чылэм дэсых Цухъо Хьазрэт, Къытыжъ Аслъанэ, Жэнэ Байслъан, Ацумыжъ Мэдинэ, Мэт Аслъан, БжьэшIо Юсыф.
Тхьамафэм тIогъогогъо Почтэм гъэзетхэр кIэтхагъэхэм алъегъэIэсых. Почтальон пэпчъ ахэр къырихьакIыхэ зыхъукIэ, километрэ 15 фэдиз екIу.
ХЪУЩТ Щэбан.