Адыгеим и Къэралыгъо автоинспекцие икъулыкъушIэхэм, хабзэ зэрафэхъугъэу, кIэлэцIыкIу IыгъыпIэхэм Iофтхьэбзэ гъэшIэгъонхэр ащызэхащэх.
Мы мафэхэм зичэзыу Iофтхьабзэу «ШIушIэ тамыгъ» зыфиIорэр щыкIуагъ кIэлэцIыкIу IыгъыпIэу N 33-м.
Къыхэгъэщыгъэн фае, ГИБДД-м иотделэу Мыекъуапэ щыIэм иинспекторхэр кIэлэцIыкIухэм адэжь хьакIэу бэрэ къэкIох. ГъогурыкIоным ишапхъэхэр агу къагъэкIыжьынымкIэ а мафэр рагъэжьагъ.
ГъогурыкIоным хэлэжьэрэ пстэури гъогум зэрэщызекIонхэ фаем фэгъэхьыгъэу полицием икапитанэу Цэй Розали зэдэгущыIэгъоу адишIыгъэм лъэшэу ашIогъэшIэгъонэу кIэлэцIыкIухэр къедэIугъэх. Нэужым джэгукIэ шIыкIэм тетэу зэрагъэшIагъэр къагъэлъэгъожьыгъ. Гъогу «шIушIэ тамыгъэхэр», агу рихьырэ джэгуалъэхэр аштэхи, инспекторхэм ягъусэхэу гъогум техьагъэх. Гъогу зэпырыкIыпIэхэм узэращызекIощтыр, водительхэри къэуцухэмэ, лъэсрыкIохэр благъэкIыхэзэ зэрашIын фаер хэушъхьафыкIыгъэ тамыгъэу къагъэхьазырыгъэхэм къыраIотыкIыгъ.
Сабыйхэм къакIухьэфэ ны-тыхэри къахэхьагъэх. Ахэми гъогурыкIоным ишапхъэхэр джыри зэ агу къагъэкIыжьыгъэх, анахьэу зэрапхыхьэрэ хэушъхьафыкIыгъэ тIысыпIэхэр агъэфедэнхэу зэрэщытым анаIэ тырарагъэдзагъ.
Iофтхьабзэм хэлэжьэгъэ пстэуми шIухьафтынэу мэфэлъытэхэр, шапхъэхэр зэрытхэгъэ тхьэпэ хэутыгъэхэр афагощыгъэх.