Адыгэ Республикэм ихабзэ изаконодательнэ къулыкъу илIыкIоу ФедерациемкIэ Советым щыIэ Хъопсэрыкъо Мурат мыгъэкIэ апэрэу цIыфхэр ригъэблэгъагъэх.
Хъопсэрыкъо Мурат амал иIэ хъу къэс тихэгъэгу икъэлэ шъхьаIи, джащ фэдэу регион тхьамафэхэр зэхащэхэ зыхъукIэ Мыекъуапи Адыгеим щыпсэухэрэм ащыIокIэ. Джащ фэдэ лъэхъанхэм республикэм исхэм ягумэкIыгъохэм защегъэгъуазэ ыкIи ахэм зэрадеIэщт шIыкIэр къегъоты. Адыгеим ичIыпIэ зэфэшъхьафхэм ащыпсэурэ нэбгырэ 20-м фэдизмэ сенаторым зыIуагъакIэ ашIоигъоу зарагъэтхыгъагъ.
— Зыщылэжьэрэ чIыпIэм елъытыгъэу хэти пшъэрылъэу иIэр зэшIуихын, тэри цIыфхэм тадеIэн фае. Непэ Iофыгъоу тынаIэ зытетыдзагъэ пэпчъ ыкIэм нэдгъэсыщт, — къыIуагъ Хъопсэрыкъо Мурат.
ЦIыфхэр анахьэу зыгъэгумэкIыщтыгъэхэр зыщыпсэущтхэ унэ къафыхэгъэкIыгъэным, псэупIэхэм яинфраструктурэ зэтегъэпсыхьэгъэным, унэ-коммунальнэ хъызмэтым япхыгъэ Iофыгъохэр ары. Сэкъатныгъэ зиIэхэми ащ зыкъыфагъэзэгъагъ. Iофыгъо заулэ къафызэхафыгъ, нэмыкIхэмкIэ ведомствэ гъэнэфагъэхэм зафагъэзэнэу къагъэгугъагъэх. Iофтхьабзэу зэрахьагъэхэмкIэ закъыфэзыгъэзагъэ пэпчъ тхыгъэ ыужкIэ IэкIагъэхьажьыщт.