Адыгэ Республикэм хэгъэгу кIоцI IофхэмкIэ и Министерствэ къызэритырэмкIэ, гъэтхапэм и 28-м къыщегъэжьагъэу мэлылъфэгъум и 3-м нэс республикэм бзэджэшIэгъэ 61-рэ щызэрахьагъ.
Ахэр: тыгъуагъэхэу 23-рэ, гъэпцIагъэ зыхэлъ бзэджэшIэгъи 8, машинэр рафыжьагъэу 4, хъункIэн бзэджэшIагъэу 1, нэмыкIхэри. Экономикэм ылъэныкъокIэ хэбзэгъэуцугъэр гъогогъуи 7-рэ аукъуагъэу хэбзэухъумэкIо къулыкъухэм къыхагъэщыгъ. БзэджэшIагъэ зезыхьэгъэ нэбгырэ 34-рэ агъэунэфыгъ, зэхафын алъэкIыгъэр процент 50-м ехъу.
БлэкIыгъэ тхьамафэм Адыгеим игъогухэм хъугъэ-шIэгъи 8 къатехъухьагъ. Ахэм нэбгыри 3 ахэкIодагъ, нэбгыри 8-мэ шъобжхэр атещагъэхэ хъугъэ. Ешъуагъэу рулым кIэрысхэу водитель 46-рэ къаубытыгъ, гъогурыкIоным ишапхъэхэр гъогогъу 2672-рэ аукъуагъэу къыхагъэщыгъ.
Кабелыр зытыгъугъэр къаубытыгъ
Тыгъон бзэджэшIагъэ зезыхьэгъэ кIэлэ Iэтахъор УФ-м хэгъэгу кIоцI IофхэмкIэ и Министерствэ иотделэу Мыекъопэ районым щыIэм иуголовнэ розыск икъулыкъушIэхэм къаубытыгъ. Илъэсэу тызхэтым гъэтхапэм икъихьэгъум зэпхыныгъэм ифэIо-фашIэхэр зыгъэцэкIэрэ организацием иIофышIэхэм полицием ирайон отдел идежурнэ часть зыкъыфагъэзагъ. Ахэм къызэраIуагъэмкIэ, связым илиние ауплъэкIузэ, кабель метрэ 900 фэдиз зэратыгъугъэр къыхагъэщыгъ. Мыщ епхыгъэу хэбзэухъумакIохэм уголовнэ Iоф къызэIуахыгъ. Оперативникхэм Iофыр зэхафызэ, станицэу Абадзехскэм щыпсэурэ илъэс 17 зыныбжь кIэлэ Iэтахъор мы бзэджэшIагъэм хэщэгъэн ылъэкIыщтэу къэбар къаIэкIэхьагъ. Зыныбжь имыкъугъэр полицейскэхэм къаубытыгъ, ахэм яупчIэхэм джэуапхэр къаритыжьыхэзэ, кабелыр зэритыгъугъэм еуцолIэжьыгъ. ГъучIхэр зыщаштэрэ пунктэу поселкэу Тульскэм дэтым кабелыр щищагъ. КIэлакIэр нэмыкI бзэджэшIагъэхэм ахэщагъэмэ джы ауплъэкIу, ныбжьыкI нахь мышIэми, ыпэкIэ ар хьапсым дэсыгъ.
Зыныбжь хэкIотагъэр ыхъункIагъ
УФ-м и МВД иотделэу Красногвардейскэ районым щыIэм икъулыкъушIэхэм зэхащэгъэ оперативнэ-лъыхъун Iофтхьабзэхэм яшIуагъэкIэ, хъункIэн бзэджэшIагъэ зезыхьэгъэ хъулъфыгъэр къаубытыгъ. Селоу Большесидоровскэм щыпсэурэ илъэс 76-рэ зыныбжь пенсионеркэр хэбзэухъумакIохэм адэжь къэкIуагъ ыкIи ащ ылъэныкъокIэ бзэджэшIагъэ зэрэзэрахьагъэр къафиIотагъ. Мы мафэм тучаным къикIыжьызэ, амыгъэунэфыгъэ хъулъфыгъэ горэ къечъалIи, ыIыгъыгъэ Iалъмэкъыр IэкIитхъи, зигъэбылъыжьыгъ. БзэджашIэм итеплъэ зыфэдэр нэбгырэ заулэмэ къаIотагъ, ащ ишIуагъэкIэ, полицием иучастковэ уполномоченнэхэм ар къаубытын алъэкIыгъ. ЫпэкIэ хьапсым пчъагъэрэ дэсыгъэ хъулъфыгъэр ышIагъэм еуцолIэжьыгъ. Зэхэфынхэр макIох.
Илъэси 8-рэ хьапсым дэсыщт
2016-рэ илъэсым, щылэ мазэм поселкэу Яблоновскэм щыпсэурэ илъэс 24-рэ зыныбжь кIэлакIэм шъобж хьылъэхэр тыращагъэхэу Тэхъутэмыкъое районым ихэбзэухъумакIохэм къэбар къаIэкIэхьагъ. ЗэрагъэунэфыгъэмкIэ, шъэжъыекIэ ащ хэпыджагъэх. Мы мэфэ дэдэм уголовнэ Iоф къызэIуахыгъ. Полицейскэхэм оперативнэ ыкIи следственнэ Iофтхьабзэхэр рагъэкIокIхэзэ, бзэджэшIагъэр зезыхьагъэу зэгуцафэхэрэр мэфэ заулэкIэ агъэунэфыгъ. Шъобж хьылъэхэр зытыращагъэм илэгъоу ар къычIэкIыгъ, ышIагъэми еуцолIэжьыгъ. КъызэрэнэфагъэмкIэ, мы мафэм нэбгыритIур аркъ зэдешъуагъэх, нэужым азыфагу зэмызэгъыныгъэ къитэджагъ. Ащ бзэджэшIэгъэ хьылъэр къыкIэлъыкIуагъ. КIэлэ ныбжьыкIэм ыпэкIэ пшъэдэкIыжьэу ыхьын фэягъэр зэримыпщыныгъэр хьыкумым къыдилъыти, илъэси 8-рэ хьапсым дэсынэу унашъо ышIыгъ.
Ешъоным къафихьыгъ
Мыекъопэ районым ит поселкэу Каменномостскэм щыпсэурэ пенсионерыр пчэдыжьым жьэу къэтэджыгъэу идунай зыхъожьыгъэ хъулъфыгъэм ихьадэ иунэ дэжь къыщигъотыгъ. АукIыгъэ хъулъфыгъэр зыщыщыр мы чIыпIэм къэсыгъэ полицием икъулыкъушIэхэм агъэунэфыгъ, илъэс 45-рэ зыныбжь хъулъфыгъэр мы псэупIэ дэдэм дэсыгъ. Следственнэ органхэм уголовнэ Iоф къызэIуахыгъ. ХэбзэухъумакIохэм оперативнэ Iофтхьабзэхэр рагъэкIокIызэ, поселкэу Каменномостскэм щыпсэурэ нэбгыритIу мы бзэджэшIагъэм хэщэгъэнхэ алъэкIыщтэу агъэунэфыгъ. ПсынкIэ Iофэу ахэр розыскым ратыгъэх. Зым инэIосэ кIалэм иунэ зыщигъэбылъыщтыгъэ, ятIонэрэр Мыекъопэ автовокзалым тетэу къаубытыгъ. Хъулъфыгъэм билет къыщэфыгъахэу, нэмыкI шъолъыр кIожьынэу зигъэхьазырыгъагъ.
Мы бзэджэшIагъэм лъапсэу фэхъугъэр ешъоныр ары. Мы мафэм нэбгырищым шъон пытэхэр агъэфедагъэх, ыкIи зэмызэгъыныгъэ азыфагу къитэджагъ, ащ хэкIыхи, зэзэуагъэх. ХьакIэу къэкIуагъэр бзэджэшIитIум аIэкIэукIагъ, идунай зэрихъожьыгъэр къызагурэIом, унэм къырахи, гъунэгъу урамым тыралъхьагъ. Уголовнэ Iофыр зэхафы.
АР-м хэгъэгу кIоцI IофхэмкIэ и Министерствэ
ипресс-къулыкъу