Мыекъуапэ икъэлэ парк проектэу «Кинопарк» зыфиIорэр щэкIо. ЗэрэрахъухьэрэмкIэ, фильмэхэр къырамыгъажьэхэзэ апэ социальнэ рекламэр Iэтахъохэм къафагъэлъэгъощт.
Кином и Илъэс къыдыхэлъытагъэу урысые фильмэхэр ыпкIэ хэмылъэу тикъалэ къыщагъэлъэгъощтых.
Муниципальнэ образованиеу «Къалэу Мыекъуапэ» зыфиIорэм ипресс-къулыкъу къызэритыгъэмкIэ, сеансыр аублэным ыпэкIэ псауныгъэм зэрар езыхыщт шIыкIэхэр щыгъэзыегъэнхэр ыкIи тутыным, ешъоным, наркоманием апэIапчъэ хъунхэм афэIорышIэрэ социальнэ роликхэр ныбжьыкIэхэм къафагъэлъэгъощтых.
Наркотикхэр хэбзэнчъэу гъэзекIогъэнхэм пэуцужьырэ къэлэ комиссием изэхэсыгъоу щыIагъэм пэшIорыгъэшъ Iофтхьабзэхэр нахь гъэлъэшыгъэнхэу, творческэ IофшIэнхэм нахьыбэрэ кIэлэцIыкIухэр хагъэлэжьэнхэу, ащ пае проектыкIэ гъэшIэгъонхэр къаугупшысынхэу мэрэу Александр Наролиным афигъэпытагъ. ИкIыгъэ илъэсым наркоманием пэшIуекIорэ Iофтхьэбзи 128-рэ Мыекъуапэ щызэхащагъ. Ащ хахьэщтыгъэх видеороликхэм якъэгъэлъэгъон, лекциехэр, зэIукIэгъухэр, зэдэгущыIэгъухэр.
Къэлэ администрацием культурэмкIэ игъэIорышIапIэ ипащэу Цэй Розэ къызэриIуагъэмкIэ, а Iофым лъэныкъуитIоу Iоф дашIэ. Апэрэр — гъэшIэгъонэу ыкIи шIуагъэ къытэу Iэтахъохэм яуахътэ зэрагъэкIощтыр зэхэщэгъэныр, творческэ IофшIэнхэм чанэу къахэгъэлэжьэгъэнхэр. ЯтIонэрэр — наркоманием иягъэу къакIорэм имэхьанэ афызэхэфыгъэныр ыкIи агурыгъэIогъэныр.
Адыгеим икъэлэ шъхьаIэ лъэныкъо зэфэшъхьафмэ афэгъэзэгъэ клуб 72-у дэтым нэбгырэ 1300-рэ къякIуалIэ. Фэдэ клубхэр къоджэ культурэм иунэхэу Подгорнэм, Гавердовскэм, Ханскэм адэтхэми ащызэхэщагъэх. Культурэ Iофтхьабзэу рекIокIыхэрэм кIэлэцIыкIухэм яIэпэIэсэныгъэ къащагъэлъагъо.
Мыекъуапэ икIэлэеджакIохэм хэушъхьафыкIыгъэ тестированиехэр арагъэкIунхэшъ, «щынагъо зышъхьащыт» Iэтахъоу къыхагъэщыхэрэм язакъоу Iоф адашIэнэу Александр Наролиным комиссием хэтхэм афигъэпытагъ.
Iэшъынэ Сусан.