Джырэ фэдэ уахътэу осхэр, мылхэр къызщыжъужьыхэу, гъэтхэ ощххэр къызщызэкIэлъыкIохэрэм псыхъохэм псэу адэтыр къадэуным, псэупIэхэм, губгъохэм акIэхьаным ищынагъо Урысыем исубъектыбэхэм яIэ мэхъу, гумэкIыгъуабэ къафихьэуи бэрэ къыхэкIыгъ.
Адыгеири а гумэкIыгъом къыухьэрэп. Ащ фэшI псыхъохэм псэу адэтым изытет, ахэм къахэхъощтымэ, къахэхъон ылъэкIыщтыр зыфэдизыр пэшIорыгъэшъ прогноз илъэс къэс ашIы, зэрар ащ къымыхьыным зыфагъэхьазыры.
АР-м цIыфхэр къэухъумэгъэнхэмкIэ ыкIи ошIэ-дэмышIэ IофхэмкIэ и Комитет ипащэу Блэгъожъ Юрэ къызэриIуагъэмкIэ, псыхъо цIыкIухэу Фэдз, Чехрак, Псыарыщ зыфиIохэрэр къыдэкIыхэмэ, Кощхьэблэ районым ит псэупIэхэм къакIэхьан ылъэкIыщтэу, псыхъоу Лабэ къыдэумэ, Красногвардейскэ районым ипсэупIэхэм зэрар къафихьынкIэ щынагъоу, Чехрак, псыхъоу Айрюм игъусэу, Джэджэ районым ипсэупIэхэмкIэ гумэкIыгъоу прогнозэу ашIыгъэхэм къагъэлъэгъуагъ.
Ау ар псыр къадэумэ ары… Комитетым ипащэ къызэрэкIигъэтхъыгъэмкIэ, ащ фэдэ гумэкIыгъо типсыхъохэм къахьыным ищынагъо мы илъэсым щыIэп. Псыхъохэм псэу адэтым къыхахъомэ зэрар къымыхьыным фытегъэпсыхьэгъэ планэу агъэнэфэгъагъэм къыдилъытэрэ IофшIэн шъхьаIэхэр зэкIэри гъэцэкIагъэ хъугъэ. 2016-рэ илъэсым федеральнэ, республикэ ыкIи муниципальнэ бюджетхэм къахэхыгъэу сомэ миллион 93,81-рэ мы IофшIэнхэм апаIуагъэхьанэу агъэнэфагъ. Ащ имызакъоу, АР-м ипащэхэм яунашъокIэ, ошIэ-дэмышIэ Iоф къэхъумэ, ащ къыздихьыгъэ тхьамыкIагъохэм ядэгъэзыжьын пэIуагъэхьанэу сомэ миллиони 107,845-рэ ыкIи сомэ миллион 40,41-рэ ауасэ техникэ IэпэчIэгъанэу агъэхьазырыгъ.
Джащ фэдэу АР-м цIыфхэм якъэухъумэнкIэ ыкIи ошIэ-дэмышIэ IофхэмкIэ и Комитет ипащэ къызэриIуагъэмкIэ, псыхъохэм, каналхэм, лъэмыдж чIэгъхэм, псыдэчъыпIэхэм ягъэкъэбзэн, нэпкъхэм ягъэпытэн ары анахьэу анаIэ зытырагъэтырэр. Къуаджэу Улапэ дэжькIэ псыхъоу Лабэ инэпкъэу сэмэгу лъэныкъомкIэ гъэзагъэр километрэ 290-рэ хъоу агъэпытэжьыгъ. Мыекъопэ районымкIэ къутырэу Шэнтыкъо дэжькIэ псыхъоу Шэнтыкъо щыщэу метрэ 560-м, Джэджэ районымкIэ къутырэу Смольчев-Малиновский зыфиIорэм дэжькIэ псыхъоу Чехрак щыщэу метрэ 960-м ягъэкъэбзэн мэлылъфэгъу мазэм аухыщт. Гидротехническэ псэуалъэу зэщыкъоным ищынагъо къэзытырэ республикэм иIэп.
Росгидрометым исистемэ къыдыхэлъытэгъэ оборудовании 10-у Адыгеим щагъэуцугъэхэм, Краснодар краим щагъэпсыгъэхэм ащыщэу 2-м, псыхъохэу Лабэ, Фарзэ ыкIи Шъхьэгуащэ язытет къэзыгъэлъэгъощт оборудованиеу атырагъэуцуагъэхэм яшIуагъэкIэ псыхъохэм псэу адэтым лъэплъэх. Ахэм зэкIэми шапхъэхэм адиштэу Iоф ашIэ, зищыкIагъэхэр агъэкIэжьыгъэх. Джащ фэдэу Ю. Блэгъожъым къызэриIуагъэмкIэ, межведомственнэ IофышIэ купымрэ УФ-м и МЧС АР-мкIэ ыкIи Краснодар краимкIэ игъэIорышIапIэхэм яоперативнэ штабхэмрэ псыхъохэм къазэрэхахъорэм лъэплъэх. МЧС-м АР-мкIэ и ГъэIорышIапIэ оперативнэ группэ 20-мэ ыкIи мэшIогъэкIуасэхэмрэ спасательхэмрэ ягарнизонхэм Iоф зэрашIэщт планыр ыгъэнэфагъ, аппарат зэфэшъхьафхэр ыгъэфедэхэзэ, ошъогумкIэ псыхъохэм язытет лъэплъэ. ОшIэ-дэмышIэ Iоф къэхъумэ, ащ къыздихьыгъэ тхьамыкIагъор дэгъэзыжьыгъэ хъуным зэкIэмкIи нэбгырэ мини 4-м ехъу ыкIи техникэ зэфэшъхьафэу 855-рэ фэхьазырых.