Мы илъэсыр къызихьагъэм къыщыублагъэу Адыгэ электрическэ сетьхэм испециалистхэм зэхащэгъэ егъэджэнхэм республикэм и Джэджэ ыкIи Красногвардейскэ районхэм арыт къоджэ гурыт еджапIэхэм якIэлэеджэкIо 330-рэ ахэлэжьагъэх.
Электричествэр щынэгъончъэу щытыным, ащ къыдилъытэрэ шапхъэхэр гъэцэкIэгъэнхэм афэшI анахьэу анаIэ зытырагъэтын фэе лъэныкъохэр кIэлэеджакIохэм къафаIотагъэх.
Энергетикэм иурокхэр станицэу Джаджэм, поселкэу Новэм, селоу Еленовскэм адэт еджапIэхэм ащыкIуагъэх. Щынэгъончъэным, электричествэм узэрэдэзекIон фаер къэзыгъэнэфэрэ шапхъэхэм, энергетикэм епхыгъэ псэуалъэхэм адэжь узэращызекIон фаем япхыгъэ Iофыгъохэм специалистхэр къатегущыIагъэх, лекциехэр, Iэнэ хъураехэр зэхащагъэх. Ащ пае мультимедийнэ ыкIи видеозэпхыныгъэ амалхэр къызфагъэфедагъэх. КIэлэеджакIохэм а пстэури ашIогъэшIэгъоныгъ, зыгъэгумэкIыхэрэ упчIэхэри къатыгъэх.
Iофтхьабзэхэр зыщыкIогъэ гъэсэныгъэм иучреждениехэм япащэхэм къызэраIуагъэмкIэ, мыщ фэдэ егъэджэнхэм мэхьанэшхо яI, анахь шъхьаIэр зыныбжь имыкъугъэхэр фэчэфхэу ащ зэрэхэлажьэхэрэр ары. Адыгэ электрическэ сетьхэм япащэхэм зэрагъэнэфагъэмкIэ, шIуагъэ къэзытырэ мыщ фэдэ Iофтхьабзэхэр тапэкIи рагъэкIокIыхэзэ ашIыщт, ахэм ахэлажьэхэрэм япчъагъэ нахьыбэ ашIыным пылъыщтых.
(Тикорр.).