Адыгэ Республикэм ия 25-рэ илъэс фэгъэхьыгъэу «Культурэм иIофышIэ анахь дэгъу» зыфиIорэ зэнэкъокъур Мыекъуапэ щызэхащагъ. Къалэхэм, районхэм къарыкIыгъэхэм яIэпэIэсэныгъэ къагъэлъэгъуагъ.
Зэнэкъокъум икъызэIухын хэлэжьагъэхэм гукъэкIыжьэу яIэр макIэп. Республикэм культурэмкIэ и Гупчэ идиректорэу Къулэ Амэрбый якIэщакIоу культурэм иIофышIэхэр, еджакIохэр зэхэтхэу пчэгум къихьагъэх, республикэм ехьылIэгъэ орэдхэр къаIуагъэх, къэшъуагъэх.
Ти ЛIышъхьэу ТхьакIущынэ Аслъан, Правительствэм, зэхэщэкIо купым ацIэкIэ зэнэкъокъум хэлажьэрэмэ къафэгушIуагъ, гъэхъагъэхэр ашIынэу афиIуагъ Урысыем, Адыгеим, Ингушетием культурэмкIэ язаслуженнэ IофышIэу, Адыгэ Республикэм культурэмкIэ иминистрэ игуадзэу ШъэуапцIэкъо Аминэт.
ШъэуапцIэкъо Аминэт иеплъыкIэхэм къахигъэщыгъ зэнэкъокъум имэхьанэ зыкъызэриIэтырэр. Республикэм ия 25-рэ илъэс пэгъокIыхэзэ, яIофшIагъэ зэфахьысыжьы, зым зыр ищысэтехыпI. Зэнэкъокъур еджапIэ афэхъу.
Пхъэдзым ыуж аублэ
Мыщ фэдэ зэIукIэгъухэм уиIэпэIэсэныгъэ къащыбгъэлъэгъоныр IэшIэхэп. Сыд фэдиз опыт уиIэми, огумэкIы. ЗэхэщакIохэм ар къыдалъыти, пхъэдзыкIэ къыхахыгъ чэзыур зынэсыщтыр. Апэу пчэгум къихьагъэр лъэпкъ искусствэм щызэлъашIэрэ Нэгэрэкъо Казбек ары.
Адыгэ шъуашэр щыгъ, адыгабзэкIэ IупкIэу къэгущыIэ. Лъэпкъ орэдэу къыхидзэхэрэр фольклорым къыхихыгъэх. Жъыур игъусэшъ, адыгэ шэн-хабзэхэри ирепертуар нахьышIоу хигъэхьагъэх. К. Нэгэрэкъор шыкIэпщынау, къамылапщ, пщынао, ансамблэу «Джэныкъо машIом» ихудожественнэ пащ. Апшъэрэ еджапIэр къызэриухыгъэр къэтIуагъэм къыхэдгъэхъожьмэ, Тыркуем, Германием, нэмыкIхэм зэращыIагъэм игугъу къэтшIын фаеу тэлъытэ.
Творчествэм иIэпэIэсэныгъэ зэрэщыпхырищырэм, исэнэхьат лъагэу ыIэтын зэрилъэкIыгъэм афэшI хэушъхьафыкIыгъэ Диплом Казбек къыфагъэшъошагъ. Шэуджэн районым ар щэпсэу.
Красногвардейскэ районымкIэ Улапэ культурэм и Унэу дэтым иIофышIэу, ансамблэу «Бэслъэнэим» къашъохэр фэзыгъэуцурэ Уракъ Заринэ бэшIагъэу тинэIуас, искусствэм лъэгъо хэхыгъэ фэзышIы зышIоигъомэ ащыщ. Пчэгум дахэу къызэрэщышъорэм дакIоу, ныбжьыкIэхэр зылъищэнхэ елъэкIы. — Сисэнэхьат сыгу рехьы, цIыф гъэшIэгъонмэ саIуегъакIэ, — къытиIуагъ Уракъ Заринэ. — Культурэм иIофышIэхэм непэ сакIырыплъы сшIоигъу.
Заринэ я 2-рэ лъэгапIэ зиIэ Дипломыр фагъэшъошагъ.
Джэджэ районым къикIыгъэ Светлана Выдайко ящэнэрэ чIыпIэр къыдихыгъ.
Очэпщые культурэмкIэ и Унэ ихудожественнэ пащэу Цэй Иринэ зыгъэпсэфыгъо уахътэм изэхэщэнкIэ, сэнаущыгъэу къыгъэлъэгъуагъэмкIэ къахагъэщыгъ.
Мыекъопэ районым илIыкIоу Сюзанна Бабаян культурэ ин хэлъэу исэнэхьат ехьылIэгъэ къэбархэр къыIотагъэх. Къалэу Мыекъуапэ культурэмкIэ и Унэу «Гигантым» истудиеу «Сувенирым» ипащэу Владимир Хурс, Адыгэкъалэ Лъэпкъ культурэмкIэ и Унэ ирежиссерэу Татько Нэфсэт, Кощхьэблэ районым Лъэпкъ культурэмкIэ и Унэ иIофышIэу Цаликова Бэлэ дипломхэр аратыжьыгъэх.
Анахь дэгъур тэшIэ
Культурэм иIофышIэхэм анахь дэгъур къахэбгъэщыныр псынкIагъоп. Жюрим изэфэхьысыжьхэм тяжэн фаеу хъугъэ. Тэхъутэмыкъое районым культурэмкIэ и Унэ иметодистэу Хъуажъ Асыет апэрэ лъэгапIэ зиIэ Дипломыр фагъэшъошагъ. Зэнэкъокъур рамыгъажьэзэ ащ гущыIэгъу тыфэхъугъ.
Тэхъутэмыкъуаехэм мыгъэ гъэхъагъэу ашIыгъэр макIэп. КъэшъокIо купэу «Адыгэхэр» зыфиIорэр Урысыем изэнэкъокъоу Москва щыкIуагъэм хэлажьи, апэрэ чIыпIэр, шIухьафтын шъхьаIэр къыдихыгъэх. Джырэ уахътэ культурэм иIофышIэ зэхъокIыныгъэу фэхъухэрэр дэгъоу къэзыгъэлъэгъуагъэхэм Хъуажъ Асыет ащыщ.
Зэнэкъокъум хагъэунэфыкIырэ чIыпIэхэр къыщыдэзыхыгъэхэм ахъщэ шIухьафтынхэр, дипломхэр аратыжьыгъэх.
Набэкъохэу Эрхьанрэ Алихъанрэ джыри сабыих. Адыгэ шъуашэр ащыгъэу зэIукIэгъухэм ащытлъэгъугъэх. ХъокIон Хьамеди лъэпкъ шъуашэр щыгъ, ипхъорэлъфхэм алъэплъэ. ЗэхэщакIохэм лъэшэу афэраз.
— МэфэкI зэхахьэу тиIэхэр нахьыбэ зэрэхъугъэхэм сегъэгушIо, — еIо ХъокIон Хьамедэ. — Сабыйхэр зэIукIэгъухэм ахэтэщэх. ЯцIыкIугъом алъэгъурэр ащыгъупшэжьырэп.
Культурэм иIофышIэ зэхэщэкIо дэгъоу щытын фаеу зэнэкъокъум хэлэжьагъэмэ къытаIуагъ. Сыд фэдэ къиныгъохэр тиIэми, культурэм имэхьанэ къедгъэIыхы хъущтэп.
Сурэтхэр зэхахьэм къыщытетхыгъэх.