Урысые организациеу «Сэкъатныгъэ зиIэхэм яобществ» зыфиIорэм и Адыгэ республикэ организацие илIыкIохэр аутизмэм епхыгъэ къэбарыр цIыфхэм алъыгъэIэсыгъэным и Дунэе мафэ фэгъэхьыгъэ акциеу «Зажги синим» зыфиIорэм хэлэжьагъэх.
Ащ къыдыхэлъытагъэу мэлылъфэгъум и 2-м Лениным ыцIэ зыхьырэ гупчэм шар шхъуантIэхэр уашъом щыдагъэкIоягъэх.
— ЦIыфхэр а узым фэгъэхьыгъэ къэбарым щымыгъуазэхэ зыхъукIэ, еплъыкIэ мытэрэзхэр яIэу къыхэкIы. Ар дэгъэзыжьыгъэ хъуным пае аутизмэр зыфэдэр, ащ упэшIуекIоным пае анахьэу унаIэ зытебгъэтынэу щытыр обществэм къыфэпIотэн, зэхебгъэхын фае. ГумэкIыгъор пстэуми къагурыIо зыхъукIэ, сымаджэхэм ящыIакIэ нахьышIу хъущт, — къыIуагъ Урысые организациеу «Сэкъатныгъэ зиIэхэм яобществ» зыфиIорэм и Адыгэ республикэ организацие итхьаматэу Агъырджэнэкъо Симэ.
Шъугу къэдгъэкIыжьын аутизмэ яIэу нэбгырэ 30-м ехъу республикэм зэрэщагъэунэфыгъэр. Ахэм реабилитацие зыщакIурэр Адыгэ республикэ кIэлэцIыкIу клиническэ сымэджэщымрэ Мыекъуапэ щыпсэухэрэм ясоциальнэ фэIо-фашIэхэр зыгъэцэкIэрэ гупчэмрэ.
(Тикорр.).