Тыгъуасэ АР-м и ЛIышъхьэу ТхьакIущынэ Аслъан Адыгэ къэралыгъо университетым икIэлэегъаджэхэу республикэ наградэхэмкIэ къыхагъэщыгъэхэм аритыжьыгъэх. Ащ фэгъэхьыгъэ зэIукIэгъум хэлэжьагъэх АР-м гъэсэныгъэмрэ шIэныгъэмрэкIэ иминистрэу Хъуажъ Аминэт, Адыгэ къэралыгъо университетым иректорэу Хъунэго Рэщыдэ, гуманитар ушэтынхэмкIэ Адыгэ Республикэ институтым ипащэу Бырсыр Батырбый.
— Наукэм ылъэныкъокIэ, IэпэIэсэныгъэ ин зыхэлъ кадрэхэм ягъэхьазырынкIэ гъэхъэгъэшхохэр зиIэ цIыфэу, ишIэныгъэкIэ, иIофшIэнкIэ къэзылэжьыгъэу республикэм исхэм ащыщхэр непэ тигуапэу тэгъашIох, — къыIуагъ ТхьакIущынэ Аслъан. — IофшIэгъэшхоу шъуиIэм республикэмкIэ тарихъ мэхьанэ иI, Адыгеим ыцIэ шIукIэ, дахэкIэ чыжьэу зыгъэIугъабэ жъугъэхьазырыгъэ, шIэныгъэ яжъугъэгъотыгъ. СыдигъокIи наградэ горэ къышъуатыными шъуемыжэу шъуипшъэрылъхэр хэзыгъэ имыIэу жъугъэцэкIагъэх. Пстэумэ апае лъэшэу тышъуфэразэу «тхьашъуегъэпсэу» къышъотэIо. Тырэгушхо шъощ фэдэхэр зэрэтиIэхэм.
АР-м и ЛIышъхьэ иунашъокIэ «Адыгеим ищытхъузехь» зыфиIорэ медалэу афагъэшъошагъэр къэзыушыхьатырэ тхылъхэмрэ бгъэхалъхьэхэмрэ аритыжьыгъэх филологие шIэныгъэхэмкIэ докторэу, Адыгэ къэралыгъо университетым урысыбзэм-
кIэ икафедрэ ипрофессорэу НэмытIэкъо Розэрэ филологие шIэныгъэхэмкIэ докторэу, Адыгэ къэралыгъо университетым бзэшIэныгъэмкIэ икафедрэ ипрофессорэу Людмила Цыпленковамрэ.
ХЪУТ Нэфсэт.
Сурэтхэр А. Гусевым тырихыгъэх.
