Непэрэ мафэмкIэ мэхьанэшхо зиIэ Iофыгъоу «НыбжьыкIэхэр гъогум щынэгъончъэу щызекIонхэр» зыфиIорэм Адыгеим истудентхэмрэ АР-м и Къэралыгъо автоинспекцие икъулыкъушIэхэмрэ бэмышIэу тегущыIагъэх.
Гъэтхапэм 30-м щыIэгъэ Iофтхьабзэм хэлэжьагъэх Урысые Федерацием хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ икъэралыгъо инспекцие АР-мкIэ и ГъэIорышIапIэ ипащэ игуадзэу Мамыекъо Казбек, ГъэIорышIапIэм иотдел ипащэу Виталий Загайко, МРЭО N 1-м ипащэу Мамхыгъ Алый, Адыгэ Къэралыгъо университетым икафедрэ ипащэу Къурмалы Заремэ, студентхэр.
Мамыекъо Казбек зэIукIэм къыщыгущыIэзэ, ныбжьыкIэхэр зыхэфэрэ хъугъэ-шIагъэхэу гъогухэм атехъухьэхэрэр зыфэдэхэр къыIотагъэх. Ащ къызэриIуагъэмкIэ, гъорекIо илъэс 18 — 23-рэ зыныбжьхэм ялажьэкIэ Адыгэ Республикэм игъогухэм аварие 73-рэ атехъухьагъ, ахэм нэбгырэ 19 ахэкIодагъ, 96-мэ шъобжхэр атещагъэхэ хъугъэ. НыбжьыкIэхэм янахьыбэм гъогум шэн-зекIокIэ дэйхэр къызэрэщызхагъафэхэрэр, шъхьэкIафэ зэрахэмылъыр кIигъэтхъыгъ Мамыекъом.
— НыбжьыкIэхэм ахэтых ышIэзэ гъогурыкIоным ишапхъэхэр зыукъохэрэр, адрэ гъогум тетхэм шъхьэкIафэ афэзымышIыхэрэр. Ащ фэдэхэм пхъэшагъэ хэлъэу тадэзекIон фае, — еIо Казбек.
Джащ фэдэу джэгухэм къащекIокIырэ машинэ зэхэтхэм ягугъуи зэхахьэм къыщашIыгъ. Ащ фэдэхэм гъогурыкIоным ишапхъэхэр, гъогумэ атет тамыгъэхэр аукъох, къызэпэчъэх, ащ щынагъоу къафихьын ылъэкIыщтыр икъоу къагурыIорэп. Мыщ фэгъэхьыгъэу Iофтхьабзэм хэлажьэхэрэм видеокъэгъэлъэгъоным ыкIи сурэтхэм рагъэплъыгъэх.
Нэужым алъэгъугъэхэм гупшысэу аригъэшIыгъэхэмкIэ ныбжьыкIэхэр зэдэгощагъэх. Ежьхэр зыхэфэгъэ гъогу хъугъэ-шIагъэхэр къаIотагъэх.
ЗэIукIэр гъэшIэгъонэу кIуагъэ, студентхэм яупчIэхэм игъэкIотыгъэ джэуапхэр къэралыгъо автоинспекцием икъулыкъушIэхэм къаратыжьыгъэх.
КIарэ Фатим.