УФ-м итхакIохэм я Союз итхьаматэ игуадзэу, Адыгэ Республикэм итхакIохэм я Союз итхьаматэу, АР-м, КъБР-м, КъЩР-м янароднэ тхакIоу, СССР-мрэ УФ-мрэ я Къэралыгъо шIухьафтынхэм ялауреатэу МэщбэшIэ Исхьакъ КъБКъУ-м ихьакIагъ.
Ащ «Къэбэртэе-Бэлъкъар къэралыгъо университетым ипрофессор гъэшIуагъ» зыфиIорэ цIэ лъапIэр къыщыфагъэшъошагъ.
Гъэтхапэм и 25-рэм КъБКъУ-м и ШIэныгъэлэжь совет иректорэу Алътуд Юрэ, мы университетым ипрезидентэу Къарэмырзэ Бэрэсбый, ДАХ-м итхьаматэу Сэхърэкъо Хьаути, «Адыгэ псалъэм» иредактор шъхьаIэу ХьэшIуцIэ Мыхьамэт, КъБКъУ-м икIэлэегъаджэхэр, ДАХ-м игъэцэкIэкIо куп илIыкIохэр Иорданием, Турцием, Сирием, Израиль къарыкIыгъэ хьакIэхэр хэлэжьагъэх. ШIэныгъэлэжь советыр къызэIузыхыгъэ Алътуд Юрэ кIэкIэу адыгэ литературэм итхакIоу МэщбэшIэ Исхьакъ ищыIэныгъэ гъогурэ литературэм зэрэфэлэжьагъэмрэ нэIуасэ фишIыгъэх, джащ фэдэу икъэлэмыпэ къыпыкIыгъэ тхыгъэхэмкIэ лъэпкъ зэныбджэгъуныгъэм, шэн-хабзэм, къэралыгъо Iофхэм фэлъэкIырэмкIэ зэрэдэлажьэрэм къызэрэугъоигъэхэр щигъэгъозагъэх.
Темыр Кавказым ис лъэпкъхэм яшэн-хабзэхэм зягъэужьыжьыгъэнымрэ ухъумэгъэнхэмрэ иIахьышхо зэрахилъхьэрэм фэшI Щытхъу тхылъыр ратыжьыгъ. Ащ ыпкъ къикIэу гулъытэ къыфэзышIыгъэхэм иIофшIагъэхэм ахэлъ гупшысэмрэ лъэпкъыпсэмрэ ямэхьанэ къыпкъырыкIызэ, псэлъэ дахэкIэ къекIолIагъэхэм апашъхьэ МэщбэшIэ Исхьакъ къыщыгущыIагъ.
ХьакIэм КъБКъУ-м ипащэхэм ШIэныгъэлэжь советым хэтхэм, къырагъэблэгъагъэхэм джырэблагъэ къыдэкIыгъэ, тарихъ тхылъэу «Рафыгъэхэр» ыкIи «Хэхэсхэр» зыфиIорэ романитIур зыдэтыр аритыгъ.