Мэфэхьаблэ идэхагъэ хэхъо

Югославие хэгъэгоу щыIагъэм ишъолъырэу ­Косово къикIыжьыхи, Хэкужъым къэзыгъэзэжьы­гъэ тилъэпкъэгъухэр апэрэ илъэсым Мыекъуапэ дэсыгъэх. Хабзэм икъулыкъушIэхэр, лъэкI зиIэхэр IэпыIэгъу къафэхъухи, къоджэ шъхьаф хъугъэхэу  зэрэщыIэхэм югослав адыгэхэр рэгушхох.

DSC_0432

Къуаджэм Мэфэхьабл фау­сыгъ, Мыекъопэ районым щэ­псэух. ГукIэгъу зыхэлъ цIыфхэм яшIуагъэкIэ мэщытыр, IэзэпIэ поликлиникэр, нэмыкIхэр яIэ хъугъэх. Нэбгырабэмэ унагъо­хэр ашIагъэх, сабыйхэр къафэхъугъэх. Лъэпкъым ичIыгу лъапсэу щашIыгъэр мэпытэ, Мэфэхьаблэ зеушъомбгъу.

Тыркуем, Израиль, Сирием, фэшъхьафхэм къарыкIыжьыгъэ тилъэпкъэгъухэр чылэм дэсых. Къоджэ псэупIэм ипащэу Хьэсани Мыхьамэт къызэрэ­тиIуагъэу, Мэфэхьаблэ игъэдэ­хэн зэкIэ дэсхэм яIофэу алъы­тэ, шIыхьафхэр зэхащэх.

Джырэблагъэ зэрэугъойхи, чъы­ги 150-м нахьыбэ Мэфэхьаблэ щагъэтIысыгъ. Къоджэ дэхьапIэм дэжь ахэр къыща­гъэкIыщтых. ШIыхьафым щы­зэ­IукIагъэхэм, Цэйхэр, ГутIэхэр, Хьэсанихэр, Ацумыжъхэр, Аба­зэхэр, нэмыкIхэри ахэтлъэ­гъуа­гъэх.

2015-рэ илъэсым Адыгэ Рес­публикэм и Премьер-министрэу КъумпIыл Мурат Мэфэхьаблэ щыщхэм заIокIэм, къуа­джэм чъыгхэр щыгъэтIысы­гъэнхэм, фэIо-фашIэхэм ягъэ­цэкIэн тегущыIэгъагъэх.

ШIыхьафыр къятэжьы

— Мэфэхьаблэ хэхъоныгъэ­хэр ешIых, — къыщиIуагъ джырэблагъэ шIыхьафэу чылэм щызэхащагъэм Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм ады­ряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэ­хъо Аскэр. — КIэлэцIыкIу джэ­гу­пIэм нэбгырабэ щытлъэгъугъ. Гъогухэм язытет на­хьы­шIу мэхъу, асфальткIэ апкIэх, псэупIэ унакIэхэр чылэм ща­гъэпсых. Адыгэхэр егъашIи чIыгум дэлажьэх, чъыгыхэр къагъэкIых, шIыхьафыр дэгъу хъугъэу сэлъытэ.

Шъхьэлэхъо Аскэри шIыхьа­фым чъыг щигъэтIысыгъ, мэфэхьаблэхэм ягухэлъышIухэр къадэхъунхэу афэлъэIуагъ.

1998-рэ илъэсым Адыгеим къэзыгъэзэжьыгъэхэр къэтэ­шIэ­жьых. ЯлIакъокIэ Цэйхэр къа­хэщыщтыгъэх — япчъагъэкIэ анахьыбагъэх.

— ТикIалэхэр республикэм щеджагъэх, алъэ теуцуагъэх, — зэдэгущыIэгъур лъегъэкIуатэ Цэй Адамэ. — Адыгеим имызакъоу, Къэбэртэе-Бэлъ­къарым, Къэрэщэе-Щэрджэсым ныбджэгъухэр ащытиIэхэ хъу­гъэ, ар тэркIэ гушIуагъо.

Къэзыгъэзэжьырэр кIэгъожьырэп

Ацумыжъ Айбек Израиль къы­щыхъугъ. НыбжьыкIэ дэдэу тиреспубликэ къызэкIом, Кфар-Камэ ыгъэзэжьынэу фэягъэп. Адыгеим щыпсэузэ Даурхэм япхъоу Нурыет шъхьэгъусэ къы­фэхъугъ, сабыйхэр зэдапIух. Айбек ятэу Налщык Адыгеим дэгъоу щашIэ, илъэс къэс къэкIо.

Айбек ипшъэшъэжъые игъу­сэу шIыхьафым хэлэжьагъ, ­чъыгыхэр агъэтIысыгъэх. Къэбарэу къытфаIотагъэр тщы­гъу­пшэжьыщтэп.

— Уятэжъхэм ячIыгу ­чъыгэу щыбгъэтIысырэм рэхьатэу уебгъу­кIон умылъэкIыщтэу къысщэхъу, — еIо Ацумыжъ Айбек. — Чъыгыхэр ины зы­хъухэкIэ къуа­джэм идэхьапIи къагъэдэхэщт.

Псэ къызыпагъэкIэрэ чъыгы­хэм мыIэрысэхэр, къужъыхэр, чэрэзхэр къапыкIэщтхэу мэгу­гъэх. ГутIэ Рэмэдан къазгъы­рыр ыIыгъэу машэр ытIынэу зи­гъэхьазырзэ, къуаджэм ылъэ­ныкъокIэ плъагъэ. Чырбыщ плъыжьхэм ахэшIыкIыгъэ псэ­упIэхэр лъагэх. Тиуахътэ ашIырэ унэхэм ятеплъэ нэмыкIэу агъэпсы — ащ зи мыхъун халъагъорэп, щыIэныгъэм дырагъаштэу алъытэ.

DSC_0482

ГумэкIыгъохэр щагъэзыех

Къуаджэм гумэкI имыIахэу къатIорэп. Стадионым, нэмыкI псэуалъэхэм атегущы­Iэх. Мые­къопэ районым иадминистрацие ипащэхэм мэфэхьаблэхэр аIокIэх. ЯфэIо-фа­шIэхэм ягъэ­цэкIэн яхьылIэгъэ хэкIыпIэхэр къызэдагъотынхэм пылъых. Псэу зашъохэрэм, фэ­шъхьафхэм нахь кууIоу алъы­Iэсынхэ ямурад.

Хэт сыд къытиIощтми, тичIы­гу тызэрэщыпсэурэр, ­Косо­во щыкIорэ зэо-банэхэм та­къыхэ­кIыжьынымкIэ IэпыIэгъу къыт­фэхъугъэхэр тарихъым хэ­кIо­кIэщтхэп, — къаIуатэ гущыIэр зэIэпахызэ мэфэхьаблэхэм. — Адыгеим и Апэрэ Президентэу Джарымэ Аслъан, Чэмышъо Гъазый, нэмыкIхэр тичылэ дэсхэм дэгъоу ашIэх, яшIушIа­гъэ агъэлъапIэ.

Адыгэ Республикэм ия 25-рэ илъэс мэфэхьаблэхэр пэ­гъокIыхэзэ, къуаджэм игъэдэхэн, игъэкъэбзэн афэгъэхьыгъэ Iофыгъохэр зэрахьэх, мэфэкI зэхахьэхэм ягуапэу ахэлэжьэ­щтых.

Сурэтхэр Мэфэхьаблэ
щы­кIо­гъэ шIыхьафым къыщыте­тхыгъэх.