Адыгэ къэралыгъо университетым социальнэ технологиехэмкIэ ыкIи туризмэмкIэ ифакультет экскурсоводхэр зыщагъэхьазырхэрэ хэушъхьафыкIыгъэ курсхэр апэрэу къыщызэIуахыгъэх. Ащ щеджагъэхэм удостоверениехэр ыкIи сертификатхэр бэмышIэу торжественнэ шIыкIэм тетэу аратыжьыгъэх.
Адыгеим зыщызыгъэпсэфынэу къакIохэрэм япчъагъэ хэхъо зэпыт, ау шIэныгъэ дэгъу ыкIи IэпэIэсэныгъэ зиIэ экскурсоводхэр тфэмакIэх.
— ЗекIонымкIэ агентствэхэм ялIыкIохэм, аущтэу зызыгъэпсэфынэу къэкIуагъэхэм зыкъытфагъэзэнэу рагъэжьагъ, — къеIуатэ факультетым идеканэу Ахътэо Руслъан. — Республикэм икъэбар шъыпкъэ тэрэзэу къэзыIотэн цIыфхэр тищыкIагъэхэ хъугъэ.
Апэрэ экскурсоводхэу еджапIэр къэзыухыгъэхэр нэбгырэ 14 (илъэс 20 — 30 аныбжь) мэхъух. Ахэм туризмэм ылъэныкъокэ Iоф ашIэнэу фаех. Тыгъэгъазэм къыщегъэжьагъэу мэзаем нэс сыхьат 72-рэ хъурэ курсхэр акIугъэх. ШIэныгъэлэжьхэм, зекIоным ылъэныкъокIэ специалистхэм, музейхэм яIофышIэхэм рагъэджагъэх.
— ТынаIэ анахьэу зытедгъэтыгъэр, — еIо Ахътэо Руслъан, — туристэу къакIохэрэм ашIогъэшIэгъоныщт къэбархэм яшъыпкъапI, тарихъым къыхэхыгъэ пычыгъохэр нахь тэрэзэу зэрагурыдгъэIощтхэр, республикэм щыпсэухэрэм яшэн-зэхэтыкIэхэр, яхабзэхэр зэралъыдгъэIэсыщтхэр ыкIи чIыопсым, археологием ясаугъэтхэр ядгъэлъэгъунхэр ары.
Курсхэм ащеджэгъэ нэбгырэ пэпчъ программэ шъхьаф къыгъэхьазырыгъ, анахь дэгъухэр зэнэкъокъукIэ къыхахыгъэх. Мэлылъфэгъум и 1-м къыщыублагъэу къыкIэлъыкIорэ еджэгъур рагъэжьагъ.
АР-м туризмэмкIэ ыкIи курортхэмкIэ и Комитет итхьаматэу Къэлэшъэо Инвер зэрилъытэрэмкIэ, илъэс къэс мыщ фэдэ кадрэхэм ягъэхьазырын нахь Iофыгъо шъхьаIэ мэхъу. Туризмэм ылъэныкъокIэ ухьазырыныгъэ дэгъу зыIэкIэлъ ыкIи квалифицированнэ IофышIэхэр тищыкIагъэх. Арышъ, курсхэр — егъэжьэпIэшIу къодыех. Гъэсэныгъэ куу нахь ябгъэгъотыным пае экскурсовод-зещакIор сэнэхьатхэм ахэгъэхьэгъэныр федеральнэ къулыкъум рихъухьан фае. Мы еплъыкIэр шъолъыр зэфэшъхьафхэм зыдаIыгъэу къэгущыIэх, Адыгеими ащ дырегъаштэ.
Iэшъынэ Сусан.