Гъэтхапэм и 27-м Тэрч районым иадминистрацие зэIукIэ гуапэ щырекIокIыгъ.
Адыгэ литературэм иклассик тхэкIошхо ыныбжь мы илъэсым 85-рэ зэрэхъурэм фэгъэхьыгъэ зэIукIэм къеблэгъагъэх ДАХ-м итхьаматэу Сэхърэкъо Хьаути, гъэзетэу «Адыгэ псалъэм» иредактор шъхьаIэу, Къэбэртэе Адыгэ Хасэм итхьаматэу ХьэшIуцIэ Мыхьамэт, КъБР-м ЛIышъхьэ чIыпIэ политикэмкIэ гъэIорышIапIэм ипащэу Къожей Артем, ШэуджэнцIыкIу Алый ыцIэ зыхьырэ фондым итхьаматэу ШэуджэнцIыкIу Леонид, ДАХ-м игъэцэкIэкIо куп хэтхэу Иорданием, Тыркуем, Сирием, Израиль къарыкIыгъэ хьакIэхэр.
КъекIолIагъэхэм шIуфэс гущыIэкIэ Тэрч район администрацием ипащэу Болэтыкъо Владимир закъыфигъази, Адыгэ лъэпкъыр зыIэтэу, тилитерату-рэ зезыгъэужьэу, адыгэ тхыдэм ишъыпкъагъэ романхэмкIэ къизыIотыкIырэ тхакIор зэряхьакIэр лъэшэу зэригуапэр къыIуагъ. 2016-рэ илъэсыр МэщбэшIэм и Илъэсэу ДАХ-м зэригъэнэфагъэм, ежь тхакIом осэшхо зэрэфашIырэм ишыхьатэу, районым ис цIыфхэм саугъэт лъапIэ фагъэхьазырыгъ — «Къалэу Тэрч ицIыф гъэшIуагъ» зыфиIорэ цIэр къыфашIыгъ.
МэщбэшIэ Исхьакъ къырахыгъэ гулъытэр зэригуапэр къыIуагъ. КIэлэеджакIохэм къашIыгъэ къэгъэлъэгъонхэм ягуапэу яплъыгъэх, яхьакIэ лъапIэ иусэхэм къяджагъэх, игущыIэхэм арылъ орэдхэр къаIуагъэх, цIыф цIэрыIо тхэкIошхом фэгъэхьыгъэу атхыгъэхэм ащагъэгъозагъэх.
«Силъынтфэ хэт бгырыс пщыналъэр» зыцIэ пчыхьэзэхахьэр дахэу, купкI хэлъэу рекIокIыгъ.
НэкIэпыджэ Замир.