Мыекъопэ къэралыгъо технологическэ университетым джыри изы общежитие тыгъуасэ Мыекъуапэ къыщызэIуахыгъ.
Ащ фэгъэхьыгъэ зэхахьэм АР-м и ЛIышъхьэу ТхьакIущынэ Аслъан, УФ-м и Федеральнэ ЗэIукIэ ФедерациемкIэ и Совет хэтэу Хъопсэрыкъо Мурат, АР-м и Къэралыгъо Совет — Хасэм и Тхьаматэу Владимир Нарожнэр, ащ игуадзэу Iэщэ Мухьамэд, АР-м и Апшъэрэ Хьыкум и Тхьаматэу Трахъо Аслъан, министрэхэм я Кабинет хэтхэр, федеральнэ ыкIи республикэ ведомствэхэм, къулыкъухэм япащэхэр, нэмыкIхэр.
Пстэумэ апэу унакIэм пае еджапIэм щылажьэхэрэми студентхэми къафэгушIуагъ АР-м и ЛIышъхьэу, Мыекъопэ къэралыгъо технологическэ университетым икIэщакIоу ыкIи иапэрэ ректорэу ТхьакIущынэ Аслъан.
— Апшъэрэ еджапIэр гъэхъагъэхэмкIэ ыпэкIэ лъыкIотэн фае, — къыIуагъ ащ. — Мы общежитиер университетым изы хэхъоныгъэ инэу плъытэн плъэкIыщт. Пстэумэ апэу ащ ишIын хэлэжьагъэхэм, анахьэу зиIахьышхо къыхэзылъхьэгъэ сенаторэу Хъопсэрыкъо Мурат, «тхьашъуегъэпсэу» ясIомэ сшIоигъу. Общежитиер университетым иаужырэ хэхъоныгъэ мыхъунэу тэгугъэ. Мы апшъэрэ еджапIэр къэзыухыгъабэхэм республикэм иэкономикэ хэхъоныгъэхэр ышIынхэм непэ яIахьышIу халъхьэшъ, тапэкIи ар лъыкIотэнэу тэгугъэ. ЗэкIэми псауныгъэ пытэ яIэнэу, ягухэлъхэр къадэхъунхэу сафэлъаIо.
Джащ фэдэу унакIэм пае университетым къыфэгушIуагъэх АР-м и Парламент и Тхьаматэу Владимир Нарожнэр, ащ игуадзэу Iэщэ Мухьамэд, АР-м и Апшъэрэ Хьыкум и Тхьаматэу Трахъо Аслъан, Адыгэ къэралыгъо университетым иректорэу Хъунэго Рэщыдэ, республикэм имуниципальнэ образованиехэм япащэхэм ащыщхэр.
Мыекъопэ къэралыгъо технологическэ университетым иректорэу Къуижъ Саидэ пстэумэ ауж гущыIэр зештэм, IэкIыб къэралхэм, СНГ-м иреспубликэхэм, Адыгеим игъунэгъу субъектхэм къарыкIыгъэу мы апшъэрэ еджапIэм шIэныгъэ щызэзыгъэгъотымэ зышIоигъохэм япчъагъэ илъэс къэс зэрэхахъорэм ыпкъ къикIыкIэ, джыри зы общежитие лъэшэу зэрэщыкIэщтыгъэхэр къыхигъэщыгъ, зэкIэ ащ ишIын зиIахь къыхэзылъхьагъэхэм «тхьашъуегъэпсэу» къариIуагъ. Ащ ыужым АР-м и ЛIышъхьэ общежитием иIункIыбзэ IэкIыб къэрал къикIыгъэ студентэу университетым щеджэхэрэм ащыщ ритыгъ.
Мы унэр зыщашIыгъэ чIыпIэм 1954-рэ илъэсым щагъэуцугъэу Мыекъопэ лесомеханическэ техникумым иобщежитие щытыгъ. 1994-рэ илъэсым ар Мыекъопэ къэралыгъо технологическэ институтым къыратыжьыгъагъ, ау жъы зэрэхъугъэу, учIэсынкIэ зэрэщынагъом ыпкъ къикIыкIэ, 2004-рэ илъэсым къыщыублагъэу агъэфедэжьыщтыгъэп. Мыекъопэ къэралыгъо технологическэ университетым зызэриушъомбгъурэр, общежитие зэрищыкIагъэр къыдалъытэзэ, ащ иучредителэу УФ-м гъэсэныгъэмрэ шIэныгъэмрэкIэ и Министерствэ 2014-рэ илъэсым сомэ миллион 210-рэ мини 154-м ехъу къытIупщыгъ. АщкIэ общежитиежъэу щытыгъэм ылъапсэ агъэпыти джы къызэIуахыгъэр къыщашIыгъ. Ар этажищэу зэтет, квадратнэ метрэ мини 4,75-рэ мэхъу, нэбгыри 151-мэ ателъытагъ.
ТхьакIущынэ Аслъан Къуижъ Саидэ, университетым иректор игъусэу лентэ плъыжьыр зызэпеупкIым ыуж, общежитиер къыкIухьагъ, студентхэм псэукIэ амалэу афагъэхьазырыгъэхэр зэригъэлъэгъугъэх. Общежитиер ежь университетым имызакъоу, стадион шъхьаIэми, физкультурнэ-оздоровительнэ комплексми апэблагъэу агъэуцугъ, лъэхъаным диштэрэ пстэумкIи зэтегъэпсыхьагъ. IэкIыб къэралхэм, СНГ-м иреспубликэхэм, гъунэгъу субъектхэм къарыкIыгъэхэр ары нахьыбэу ащ щыпсэущтхэр, ау ахэм ямызакъоу, республикэм щыщэу, общежитие зищыкIагъэхэми мыщ псэупIэ къыщаратыщт.
АР-м и ЛIышъхьэ ылъэгъугъэм лъэшэу зэригъэрэзагъэр къыхигъэщыгъ, студентхэм яеджэнкIэ ящыкIагъэхэри, гъэпсэфыпIэхэри, шхэпIэ дэгъуи зэрафыхагъэуцуагъэхэм, зыщыпсэущтхэри зэрэзэтегъэпсыхьагъэхэм осэ ин къыфишIыгъ.
ХЪУТ Нэфсэт.
Сурэтхэр А. Гусевым тырихыгъэх.