Краснодар краим иклиническэ сымэджэщэу N 1-у профессорэу С.В. Очаповскэм ыцIэ зыхьырэр къызызэIуахыгъэр илъэс 200 зэрэхъугъэр мы мафэхэм хагъэунэфыкIыгъ.
Ащ фэгъэхьыгъэ мэфэкI зэхахьэу щыIагъэм хэлэжьагъэх УФ-м псауныгъэр къэухъумэгъэнымкIэ иминистрэу Вероника Скворцовар, Адыгэ Республикэм и ЛIышъхьэу ТхьакIущынэ Аслъан, Краснодар краим игубернаторэу Виниамин Кондратьевыр, федеральнэ гупчэм ыкIи шъолъырхэм къарыкIыгъэ хьакIэхэр, медицинэм иIофышIэхэр, нэмыкIхэри. АР-м и ЛIышъхьэ игъусагъэх АР-м и Къэралыгъо Совет — Хасэм и Тхьаматэу Владимир Нарожнэр, республикэм и Апшъэрэ Хьыкум и Тхьаматэу Трахъо Аслъан, Адыгеим псауныгъэр къэухъумэгъэнымкIэ и Министерствэ ипащэу Мэрэтыкъо Рустем.
Вероника Скворцовам зэхахьэм пэублэ псалъэ къыщишIызэ зимэфэкI хэзгъэунэфыкIырэ пстэуми игуапэу къафэгушIуагъ. Пшызэ шъолъырым къыщызэIуахыгъэ апэрэ IэзэпIэ учреждением гъогу шIагъо къызэрикIугъэр, непэ анахь мэхьанэшхо зиIэ сымэджэщхэм зэращыщыр къыхигъэщыгъ. Илъэсым къыкIоцI нэбгырэ мин 500-м ехъумэ мыщ щяIазэх, операцие къинхэр щашIых, цIыфхэр къагъэнэжьых. Джырэ уахътэм медицинэм илъэныкъо 52-мкIэ сымэджэщым Iоф ешIэ. IэзапIэм ибаиныгъэ шъхьаIэр коллектив зэгурыIожьыр ары. Ащ пэщэныгъэ дызэрехьэ опытышхо зыIэкIэлъ врач IэпэIасэу Владимир Порхановым.
Мы аужырэ илъэсхэм псауныгъэр къэухъумэгъэным иучреждение хэхъоныгъэшIухэр ышIыгъэх, аужырэ шапхъэхэм адиштэу зэтырагъэпсыхьагъ. Илъэсым къыкIоцI къяолIэрэ нэбгырэ мин пчъагъэхэм зэряIазэхэрэм, япсауныгъэ, ящыIэныгъэ къызэраухъумэрэм дакIоу, сымэджэщыр научнэ гупчэу щыт. Учреждением тапэкIи хэхъоныгъэхэр ышIынхэмкIэ амалышIухэр зэрэIэкIэлъхэр федеральнэ министрэм къыIуагъ. Дэгъоу зипшъэрылъхэр зыгъэцэкIэрэ IофышIэ заулэмэ УФ-м псауныгъэр къэухъумэгъэнымкIэ и Министерствэ и Щытхъу тхылъ афигъэшъошагъ.
Адыгеим щыпсэухэрэм ацIэкIэ зимэфэкIхэм афэгушIуагъ АР-м и ЛIышъхьэу ТхьакIущынэ Аслъан. ЛIэшIэгъуитIу хъугъэу цIыфхэм япсауныгъэ, ящыIэныгъэ къэзыухъумэрэ сымэджэщым иIофышIэхэм сыдигъуи ящытхъу арагъаIозэ, япшъэрылъхэр зэрагъэцакIэрэр, шIушIагъэм ыкIи гукIэгъум ылъапсэу зэрэщытхэр республикэм ипащэ къыхигъэщыгъ. Медицинэм ылъэныкъокIэ республикэмрэ краимрэ зэпхыныгъэ пытэ азыфагу илъэу Iоф зэрэзэдашIэрэм, 2015-рэ илъэсым Адыгеим щыщ нэбгырэ мини 4,5-м ехъумэ мы сымэджэщым зэрэщяIэзагъэхэм мэхьанэшхо ритыгъ.
— Сымэджэщым къыкIугъэ илъэс 200-р тарихъым ипычыгъоу зэрэщытым дакIоу, пшызэ медицинэм, наукэм хэхъоныгъэу ашIыгъэхэм ар алъапсэу щыт. Мыщ Iоф щызышIагъэхэм ащыщыбэхэр Пшызэ шъолъырым имызакъоу, Урысыем дэгъоу щызэлъашIэх. Псауныгъэр къэухъумэгъэным иучреждение ищытхъу языгъэIогъэ, зисэнэхьат хэшIыкIышхо фызиIэ врачхэм акIырыплъыхэзэ, яопыт къызфагъэфедэзэ, джырэ уахътэм мыщ Iоф щызышIэхэрэм япшъэрылъхэр агъэцакIэх. Операцие къинхэр щашIых, цIыф мин пчъагъэмэ япсауныгъэ зэтырагъэуцожьы, ащкIэ аужырэ шапхъэхэм адиштэрэ медицинэ оборудованиер агъэфедэ. Сымэджэщым Iут специалистхэм Адыгеим иврачхэр упчIэжьэгъу афэхъух, тистудентхэм мыщ интернатурэр ыкIи ординатурэр щакIун амал яI, ащкIэ инэу тышъуфэраз. Ныбджэгъу лъапIэхэр! Илъэс 200-м къыкIоцI сымэджэщыр лъэгэпIэ инхэм анэсын ылъэкIыгъ, ау зэкIэмэ анахь шъхьаIэр цIыфхэр къызэрэшъуфэразэхэр ары. Псауныгъэ пытэ шъуиIэу, шъуигъэхъагъэхэм къащымыкIэу ыпэкIэ шъулъыкIотэнэу шъуфэсэIо, — къыIуагъ ТхьакIущынэ Аслъан.
АР-м и ЛIышъхьэ иунашъокIэ сымэджэщым иврач шъхьаIэу Владимир Порхановым республикэм итын анахь лъапIэу, медалэу «Адыгеим и Щытхъузехь» зыфиIорэр фагъэшъошагъ.
Илъэс 200 хъугъэу Iоф зышIэрэ сымэджэщыр Пшызэ шъолъырым итамыгъэу, ищытхъоу, щыIэныгъэм игугъапIэу зэрэщытыр къыIуагъ нэужым гущыIэ зыштэгъэ Виниамин Кондратьевым. Мыщ Iут врачхэм, специалист ныбжьыкIэхэм, нэмыкIхэм зэрафэразэр къыхигъэщыгъ.
— ЩыIэныгъэм анахь мэхьанэшхо щызиIэр цIыфым ипсауныгъ ары, ар къэухъумэгъэныр пшъэрылъ шъхьаI. Экономикэ къиныгъохэм ямылъытыгъэу, мы лъэныкъомкIэ къыттефэрэр зэкIэ дгъэцэкIэщт, медицинэм иучреждениехэм зыпкъ итэу Iоф ашIэнымкIэ IэпыIэгъу тафэхъущт, — къыIуагъ краим игубернатор.
«Пшызэ шъолъырым псауныгъэр къэухъумэгъэнымкIэ изаслуженнэ IофышI» зыфиIорэ щытхъуцIэр сымэджэщым иIофышIэхэм ащыщхэм аритыжьыгъ. Джащ фэдэу УФ-м ФедерациемкIэ и Совет и Щытхъу тхылъ зыфагъэшъошэгъэ В. Порхановым фэгушIуагъэх.
Краснодар щыкIогъэ мэфэкI зэхахьэр концерткIэ зэфашIыжьыгъ.
ТХЬАРКЪОХЪО Адам.
Сурэтхэр А. Гусевым тырихыгъэх.