КIымэфэ ужым осэу къушъхьэхэм ателъыр къэжъужьэу, гъэтхэ ощххэр къызызэкIэ-лъыкIохэкIэ, псыхъохэм псэу адэтым къы-хахъошъ, нэпкъхэм къадэуным ищынагъо щыIэ мэхъу. Ащ фэшI УФ-м и МЧС АР-мкIэ и ГъэIорышIапIэ джыри кIымафэр имыкIы-зэ, псыр къимыуным, къиугъэмэ, зэрарыбэ къымыхьыным фытегъэпсыхьэгъэ Iофтхьабзэхэр ригъэжьагъэх.
ГъэIорышIапIэм испециалистхэм къызэратырэмкIэ, гъатхэу къихьагъэм ощхэу щыIэщтхэм псыхъохэу Чехрак, Айрюм, Фэдз, Псыарыщ, Шэнтыкъо ыкIи Лабэ псэу адэтым къыхигъэхъоным ищынагъо щыI. Ахэм псыр къадэкIымэ, псэупIэ 50 фэдизмэ акIэхьанкIэ щынагъо. Ар щагу мини 6,5-рэ мэхъу, нэбгырэ мин 18-м ехъу ащэпсэу. Игъом цIыфхэм макъэ ямыгъэIоу, пэшIорыгъэшъэу зызэрэфагъэхьазырын фаер алъымыгъэIэсмэ, псым мымакIэу зэрар къафихьын ылъэкIыщт. ЧIыпIэ зыгъэIорышIэжьыпIэ органхэм ащ лъэшэу анаIэ тырагъэтынэу МЧС-м испециалистхэр къяджэх.
Ахэм къызэрагъэнафэрэмкIэ, ощхыпсым икIуапIэхэр, гъогу гъунэхэм яIэ кэнаухэр, лъэмыдж чIэгъхэр шIокI имыIэу гъэкъэбзэгъэнхэ, нэужыми ахэм анаIэ атырагъэтын фае. ЦIыфхэм псы дэчъыпIэхэр ашIынхэу, зыщищыкIагъэм псыр зэрычъэщт трубэхэр щычIалъхьанхэу, унэхэм псыкъечъэхыпIэу яIэхэр агъэкъэбзэнхэу, псыр дэзыщыщт насосхэр, нэмыкI псэуалъэхэр агъэхьазырынхэу къялъэIух.
Ом зэхъокIыныгъэу фэхъущтыр къэшIэгъуае. Арышъ, сыдигъуи ащ амалэу щыIэмкIэ уфэхьазырмэ нахьышIу. Псэу псыхъохэм адэтым къыхахъомэ, зэрар къызэрихьыщтыр мызэу, мытIоу тинэрылъэгъугъ. МЧС-м Iофтхьабзэу къыгъэнэфагъэхэр бгъэцакIэхэмэ, зэрарыр нахь макIэ зэрэхъущтым Iо хэлъэп.
(Тикорр.).