ЯмэфэкI апэрэу хагъэунэфыкIыгъ

Мэзаем и 17-м Урысые студенческэ отрядхэм я Мафэ апэрэу хагъэунэфыкIыгъ. Адыгеим ар илъэ­сипшI хъугъэ зыщызэхащагъэр.

Studencheskie-otryady

Мы мафэм ехъулIэу мэфэкI Iофтхьабзэхэр концертнэ залэу «Налмэсым» щыкIуагъэх. ПэшIорыгъэшъ программэу зэ­хагъэуцуагъэм тетэу къекIолIа­гъэхэм концерт къафагъэлъэ­гъуагъ, КВН зэхащагъ. Джащ фэдэу мы мэфэкIым къыды­хэ­лъытагъэу мэзаем и 23-м республикэм спортивнэ зэнэ­къокъу щыкIуагъ.

АдыгеимкIэ студенческэ от­рядхэм япащэу Ярослав Борсук къызэриIуагъэмкIэ, икIыгъэ илъэсым Советскэ Союзым и ЛIыхъужъэу Андырхъое Хъусенэ ыцIэкIэ псэолъэшI отряд зэхащагъ. Ащ хэтхэр къалэу Волгодонскэ АЭС-р щашIы зэ­хъум яплIэнэрэ энергоблокым игъэпсын хэлэжьагъэх. Отрядым хэтэу, Мыекъопэ къэралыгъо технологическэ университетым истудентэу Артем По­ляничко «Лучший боец «Рос­Атом-2015» зыфиIорэ цIэр къыфагъэшъошагъ. Iоныгъо мазэм «Скажи курению — THE END» зыцIэ проектыр щыIэныгъэм щы­пхыращыным фэшI Мые­къопэ къэлэ администрацием грант ор­ганизацием къыфигъэшъошагъ.

Хэгъэгу зэошхом ТекIоныгъэ къызыщыдахыгъэр илъэс 70-рэ зэрэхъугъэм фэгъэхьыгъэ Iофтхьэбзэ зэфэшъхьафхэр
мы организацием зэхищагъэх, Мыекъуапэ фэгъэхьыгъэ тари­хъхэр къыздэхьэгъэ буклетхэр ашIыгъэх, телерадиокомпаниеу «Адыгея» зыфиIорэр ягъусэу архитектурнэ саугъэтхэм афэ­гъэхьыгъэ фильм зэхагъэ­уцуагъ. Джащ фэдэу апшъэрэ ыкIи гу­рыт сэнэхьат зыщызэрагъэ­гъотырэ гъэсэныгъэ учреждениехэм джэгукIэ зэфэшъхьафхэр ащызэхащагъэх.

КъэIогъэн фае Мыекъопэ къэралыгъо технологическэ уни­верситетым иотрядэу «Май­копский Технолог» зыфиIорэр 2015-рэ илъэсым чъэпыогъу ­мазэм Амурскэ шъолъырым космодромэу «Восточный» зы­фиIорэм псэолъэшIыным епхы­гъэ IофшIэнхэр щаухыжьын­хэм­кIэ IэпыIэгъу зэрафэхъу­гъэр. Джащ фэдэу 2018-рэ илъэсым Ростов-на-Дону футболымкIэ щы­кIощт дунэе чемпионатым фа­гъэхьазырырэ стадионым ишIыни хэлэжьэнхэу зэзэгъы­ныгъэ къадашIыгъ.

ПIатIыкъо Анет.