«АГУ-Адыиф» Мыекъуапэ — «Уфа-Алиса» Уфа — 38:32 (18:18, 20:14).
Мэзаем и 17-м Мыекъуапэ щешIагъэх.
Зезыщагъэхэр: Андрей Бидагов, Руслан Ханмагомедов — Краснодар.
«АГУ-Адыиф»: къэлэпчъэIутхэр: Кожубекова, Рябцева; ешIакIохэр, хъагъэм Iэгуаор зэрэрадзагъэм ипчъагъ: Портягина — 4, Грбавчевич — 4, Шичкина — 2, Никитина — 8, Исаченко — 7, Смоленцева — 4, Васильева, ШъэоцIыкIу — 1, Серадская — 6, Щербина — 1, Леминова — 1.
ЕшIэгъур рагъэжьэным ыпэкIэ Ольга Исаченкэм, Милица Грбавчевич, Анастасия Серадскаям, нэмыкIхэм гущыIэгъу тафэхъугъ. ТекIоныгъэр тикомандэ къыдихыным зэрэфэбэнэщтыр, «АГУ-Адыифым» зэхъокIыныгъэу щыкIохэрэм шIуагъэ къызэратыщтыр яеплъыкIэхэм къахагъэщыгъ.
ЕшIэгъур
ХьакIэхэр псынкIэу апэкIэ къилъыщтыгъэх, пчъагъэр зэрэлъыкIуатэрэм гумэкIыгъохэр хэтлъагъощтыгъэх: 0:1, 5:5. «АГУ-Адыифым» икапитанэу О. Исаченкэр ухъумакIохэм ябэнызэ гупчэм ащыпхырэкIы, хъагъэм Iэгуаор редзэ. М. Грбавчевич кIуачIэр зэригъэфедэрэм дакIоу, псынкIэу мэгупшысэ. Къэлапчъэм Iэгуаор зэрэдидзагъэм лъыпытэу къызэкIэкIожьышъ, ухъумэн Iофыгъохэр цыхьэшIэгъоу егъэцакIэх.
Наталья Никитинар «Ростов-Доным» къыхащыгъ. Виктория Шичкинар «Астраханочкэм» щешIэщтыгъ, Мыекъуапэ къырагъэблэгъагъ. Пшъашъэхэр ищыгъэх, гандболым дэхагъэу хэлъыр ешIапIэм къыщагъэлъагъо. ОшIэ-дэмышIэу апэкIэ илъынхэм, къэлапчъэм зекIухэкIэ «бырсырхэр къыщагъэтэджынхэм» фэхьазырых. Анастасия Серадскаям Iэгуаор нахь «ыгъэлъапIэ» хъугъэ, сыдэу щытми, къэлапчъэм даорэп, ухъумакIохэм ябэнызэ, хъагъэм Iэгуаор ридзэнымкIэ хэкIыпIэхэр къегъотых.
Апэрэ едзыгъор 18:18-у аухыгъ, ащ тигъэрэзагъэп. Зыгъэпсэфыгъо уахътэм тренер шъхьаIэу Анатолий Скоробогатовым зэIукIэ зэхищагъ, ухъумэн Iофыгъохэр нахьышIоу агъэцэкIэнхэмкIэ амалэу щыIэхэм къатегущыIагъ. А. Серадскаям, О. Исаченкэм, Н. Никитинам, М. ШъэоцIыкIум, нэмыкIхэм пчъагъэм хагъэхъуагъ. Бысымхэм текIоныгъэр къызэрэдахыщтымкIэ упчIэ щымыIэжьы фэдэу уахътэ къызыхэкIым, тиешIакIохэр тренер шъхьаIэм зэблихъугъэх. «Алисэм» ар ыгъэфеди, тикъэлапчъэ Iэгуаор заулэрэ къыдидзагъ. Д. Ордузовар, В. Оганян, фэшъхьафхэри хьакIэхэм къахэщыщтыгъэх.
Опыт зиIэ тиспортсменкэхэр икIэрыкIэу ешIапIэм къызехьэхэм, текIоныгъэр къызэрэдахыщтыр пшIэнэу щытыгъ.
Пресс-зэIукIэр
«Уфа-Алисэм» итренер шъхьаIэу Игорь Саранец къызэриIуагъэу, командэр суперлигэм къыхэнэжьыным фэбанэ. ТекIоныгъэр къыдахын ямурадэу Мыекъуапэ къэкIогъагъэх. Клубым идиректор IэпыIэгъу къафэхъу, суперлигэм зыщагъэпытэн алъэкIыщтэу мэгугъэх.
«АГУ-Адыифым» итренер шъхьаIэу Анатолий Скоробогатовым къыIотагъэм къыхэдгъэщырэр тикомандэ нахь ищыкIэгъэ ешIакIохэр къыригъэблагъэхи, текIоныгъэм зэрэфэбэнагъэр ары.
— Я 8-рэ чIыпIэр тэркIэ гъунапкъ, — къыIуагъ А. Скоробогатовым. — Суперлигэм командэ 11 хэт, купым тыкъызэрэхэнэжьыщтыр арэп тызэгупшысэрэр, апэ ит командиймэ тащыщэу зэIукIэгъухэм тапэкIи тахэлэжьэн фае.
Н. Никитинам, О. Исаченкэм ешIэгъур агу рихьыгъ. Гандболыр зикIасэхэр агъэгушIонхэм зэрэпылъыгъэхэр къытфаIотагъ.
ЕплъыкIэхэр
«Алисэм» метрибл тазыр дзыныр ыгъэцакIэзэ, гъогогъу 12 тикъэлапчъэ къыдэуагъ. «АГУ-Адыифым» тазыр дзыгъохэр гъогогъуи 4 ныIэп зэригъэцэкIагъэхэр. Судьяхэм фэгъэкIотэнхэр тикомандэ къыфашIыгъэхэу зыгорэхэм къэбархэр агъэIухэу зэхэтхыгъэшъ, ащи ерэгупшысэх. «АГУ-Адыифым» фэгумэкIыхэрэм ащыщэу Шъыжъы Хьамидэ къызэрэтиIуагъэу, тикомандэ зэхъокIыныгъэшIухэр щэкIох, ауж къинэрэмэ къахэкIыжьын ылъэкIыщт.
Москва икомандэу «Лучым» очкоуи 8 иI, я 7-рэ чIыпIэм щыI. «Адыифым» очкоуи 6 ригъэкъугъ. Ижевскэ икоманди очкоуи 6 иIэр. Ставрополь ыкIи Уфа якомандэхэр ауж къенэх.
Мэзаем и 24-м Адыгеим икомандэ Ставрополь щешIэщт, зэIукIэгъум мэхьэнэ ин етэты. «Адыифыр» гъунапкъэм тет, суперлигэм къыщызэкIакIо хъущтэп.