2016-рэ илъэсым гъэтхасэу халъхьащтхэм афэгъэхьыгъэ республикэ зэIукIэ мы ма-фэхэм Адыгэ Республикэм мэкъу-мэщым-кIэ и Министерствэ зэхищагъ. Ащ хэлэжьа-гъэх компаниеу «Лимагрен» зыфиIорэм илIыкIохэр, республикэм икъалэхэм ыкIи ирайонхэм яадминистрациехэм мэкъу-мэщымкIэ ягъэIорышIапIэхэм япащэхэр, агроном шъхьаIэхэр, АР-м мэкъу-мэщымкIэ и Министерствэ иIофышIэхэр, чIыгулэжьхэр, банк зэфэшъхьафхэм ялIыкIохэр, нэмыкIхэри.
Iофтхьабзэм ипэублэ 2015-рэ илъэсым анахь дэгъоу зиIофшIэн зыгъэцэкIагъэу къахэщыгъэхэм зэрафэразэхэр къэзыушыхьатырэ тхылъхэр Урысые Федерацием мэкъу-мэщымкIэ и Министерствэ ыцIэкIэ аратыжьыгъэх. Ахэм ащыщ хъугъэх Шэуджэн район администрацием мэкъу-мэщымкIэ игъэIорышIапIэ ипащэу Чэсэбый Анзор, Кощхьэблэ район администрацием мэкъу-мэщымкIэ игъэIорышIапIэ ипащэу Сэмэгу Заур, Теуцожь район администрацием ипащэу Хьачмамыкъо Азмэт, Шэуджэн районымкIэ хъызмэтшIапIэу «Заря» зыфиIорэм иагрономэу Сапый Налбый, мэкъумэщ-фермер хъызмэтшIапIэм ипащэу Цуамыкъо Амин. ЗэкIэмкIи мыщ фэдэ щытхъу тхылъхэр чIыгулэжьыным зищыIэныгъэ гъогу езыпхыгъэ нэбгырэ 37-мэ къафагъэшъошагъ.
АР-м мэкъу-мэщымкIэ иминистрэ иапэрэ гуадзэу ХьэпэкIэ Аслъан пэублэ гущыIэ къышIызэ, къэралыгъор чIыпIэ къин зэритым ыпкъ къикIыкIэ мэкъумэщ хъызмэтым джыри нахь зыкъегъэIэтыгъэн, бжыхьасэхэм, гъэтхасэхэм адакIоу чъыгхатэхэм ялэжьын, хэтэрыкIхэм якъэгъэкIын нахь зегъэушъомбгъугъэн зэрэфаер къыIуагъ. IэкIыбым къыращыщтыгъэ гъомылапхъэхэр тэтиехэмкIэ зэблэхъугъэныр апэрэ пшъэрылъэу зэрэщытыр къыхигъэщыгъ.
— Санкциехэм апкъ къикIыкIэ, чIыгулэжьыным пэIухьэрэ ахъщэр бэкIэ нахьыбэ хъугъэ — чылапхъэхэм, чIыгъэшIухэм ауасэ, уз зэфэшъхьафхэм, уцыжъхэм узэрапэшIуекIощтхэр лъапIэх. Ащ дакIоу, ахэр нэпцIхэу, узэращыгугъэу къычIэмыкIыжьхэу бэрэ къыхэкIышъ, тэрэзэу ууплъэкIунхэ фае. Непэ къедгъэблэгъэгъэ компаниеу «Лимагрен» зыфиIорэм ичылапхъэхэр зыфэдэхэр, тэ тичIыгухэм нахь къякIущтхэр, ахэм узэряшIушIэн фаер къытфаIотэщтых, тиIофшIэнкIэ ащ шIуагъэ къытфихьыщт, — къыIуагъ ХьэпэкIэ Аслъан.
Банк зэфэшъхьафхэм зэзэгъыныгъэ адашIыгъэу мэкъумэщ хъызмэтым фэгъэзагъэхэм фэгъэкIотэныгъэхэр яIэхэу чIыфэхэр къаратых. «Московский индустриальный банк» зыфиIорэм илIыкIоу Iофтхьабзэм къырагъэблэгъагъэм фэгъэкIотэныгъэу къафашIыхэрэр чIыгулэжьхэм къафиIотагъ. Беларусь Республикэм къыщыдагъэкIыгъэ техникэр зыщэфы зышIоигъохэм фэгъэкIотэныгъэхэр яIэхэу чIыфэхэр къаратыщт. Илъэсым къыщегъэжьагъэу илъэситфым нэс атырагъэлъыщт чIыфэм процент 16-м къыщыублагъэу 22-м нэс техъоу иIэщтыр, субсидиехэми къагъэзэжьыщт.
ЧIыгум игъэхьазырын, чылэпхъэ дэгъухэм, чIыгъэшIухэм якъыхэхын, ахэм апылъ фэIо-фашIэхэм ягъэцэкIэн атегущыIагъэх. Гъэбэжъу къахьынымкIэ аушэтыгъэ шIыкIакIэхэмкIэ Пшызэ шъолъырым къикIыгъэ лIыкIохэр республикэм ичIыгулэжьхэм къадэгощагъэх. Чылэпхъэ нэпцIхэм ащыухъумэгъэнхэри Iофыгъо шъхьаIэу щытыгъ.
Шъэфэп лэжьыгъэ дэгъу къэпхьыжьыным пае чылапхъэу бгъэфедэрэм мэхьанэшхо зэриIэр. Къыхэгъэщыгъэн фае республикэмкIэ чылэпхъэ лъэпкъышIухэр зыгъэфедэрэ чIыгулэжьхэм япчъагъэ зэхапшIэу зэрэхэхъуагъэр. Ахэр аушэтых, ячIыгухэм нахь къязэгъыхэрэр, лэжьыгъэ бэгъуагъэ къэзытыхэрэр агъэунэфых, агъэфедэх.
Ом изытет зыфэдэм елъытыгъэу, гущыIэм пае, огъум анахь дэгъоу зыкъэзыгъэлъэгъощт натрыф ыкIи тыгъэгъэзэ чылапхъэхэм ацIэ къыраIуагъ, ахэм узэрадэзекIощтыр компанием илIыкIохэм къаIотагъ. Мэкъумэщ хъызмэтым пыщагъэу Iофтхьабзэм къекIолIагъэхэм ашIогъэшIэгъонэу ядэIугъэх. ЗыгъэгумэкIыхэрэ упчIэхэр аратыгъэх.
Мэкъумэщ хъызмэтым фэгъэхьыгъэ мыщ фэдэ зэIукIэгъухэм ашIогъэшIэгъонэу зэрахэлажьэхэрэр, чылэпхъэшIу лъэпкъ зэфэшъхьафхэу къагъэлъагъохэрэр ячIыгухэм зэращаушэтыхэрэр, лэжьыгъэ бэгъуагъэ къызэрахьыжьырэр гущыIэгъу тызфэхъугъэ чIыгулэжьхэм къытаIуагъ.
Мыщ фэдэ шIуагъэ къызпыкIырэ Iофтхьабзэхэр тапэкIи зэхащэщтых, лэжьыгъэ бэгъуагъэ республикэм ичIыгулэжьхэм къахьыжьыным фэлэжьэщтых.
ПIатIыкъо Анет.
Сурэтхэр Iэшъынэ Аслъан тырихыгъэх.