Гурыт еджапIэр къэзыухырэ кIэлэеджакIохэм зэтыгъо къэралыгъо ушэтыныр атынымкIэ фитыныгъэ къязытырэ сочинениер (изложениер) игъом зымытхышъугъэхэм е ушъхьагъу зэфэшъхьафхэм апкъ къикIыкIэ къемыкIолIагъэхэм, Рособрнадзорым къыгъэуцугъэ пIалъэм елъытыгъэу, мэзаем и 3-м икIэрыкIэу атхыжьыгъ. Ащ зэфэхьысыжьэу фэхъугъэхэр мы мафэхэм къэнэфагъ.
ЗэкIэмкIи сочинениер (изложениер) нэбгырэ 18-мэ атхыгъ. Iофтхьабзэр зэрифэшъуашэу, шапхъэхэм адиштэу кIуагъэ. Ушэтыныр сыхьатыр 10-м рагъэжьагъ, сыхьати 3-рэ такъикъ 55-рэ атхыгъ. ГущыIэ 350-рэ нахь макIэ хэмытэу кIэлэеджакIохэм сочинениер атхын фэягъ.
АдыгеимкIэ икIэрыкIэу атхыжьыгъэ сочинением темэу иIагъэхэр: «Почему время называют лучшим лекарем?», «Мой дом — моя крепость?», «Помогает ли любовь понять себя?», «Каким может быть путь к познанию самого себя?», «Следовать за мыслями великого человека есть наука самая занимательная» (А.С. Пушкин) зыфиIохэрэр ары.
ГъэцэкIэнхэм язэхэфын дэлэжьэрэ шъолъыр гупчэм къызэритырэмкIэ, тыгъэгъазэм зызыушэтыгъагъэхэм афэдэу ныбжьыкIэхэм янахьыбэм, процент 42,1-м, шIулъэгъуныгъэм къытегущыIэнхэу къыхахыгъ.
Мэзаем атхыгъэ сочинением изэфэхьысыжьхэмкIэ «зачет» нэбгырэ 15-мэ (процент 83,3-рэ) къахьыгъ. Зыфэмытхыгъэу, «незачет» къэзыхьыгъэр нэбгыри 3. Ахэм сочинениер (изложениер) жъоныгъуакIэм 4-м джыри зэ атхыжьынэу амал яIэщт.
ПIатIыкъо Анет.