Адыгэ Республикэм и Кубок спорт ориентированиемкIэ къыдэхыгъэным фэгъэхьыгъэ апэрэ едзыгъор Мыекъуапэ щыкIуагъ. Краснодар, Новороссийскэ, Ермэлхьаблэ, Тэхъутэмыкъое районым, республикэм икъэлэ шъхьаIэ, Мыекъопэ районым якомандэхэр зэIукIэгъухэм ахэлэжьагъэх.
Мыекъуапэ изыгъэпсэфыпIэ парк зэнэкъокъур щызэхащагъ. Спортсмен 260-м нахьыбэ апэрэ чIыпIэхэм афэбэнагъ. Илъэси 6 зыныбжьхэм къащегъэжьагъэу 76-рэ зыгъэшIагъэхэм анэсыжьэу медальхэр къыдахыгъэх. Ермэлхьаблэ къикIыгъэ Людмила Колесниковар ныбжьыкIэхэм щысэшIу афэхъугъ.
Ныбжьым елъытыгъэу спортсменхэр куп-купэу гощыгъагъэх. Илъэс 45-м, 55-м, 65-м итхэм язэнэкъокъухэм уяплъынкIэ гъэшIэгъоныгъэ. Спортым хэшIыкI зэрэфыряIэр къахэщыщтыгъ. Илъэс 21-м, 16-м, 14-м итхэри зэIукIэгъухэм чанэу ахэлэжьагъэх. АнахьыкIэхэр зэнэкъокъум икъоу фэкъулайхэу щымытыгъэхэми, ягуетыныгъэкIэ зыкъыуагъаштэщтыгъ.
ШIу зэрэлъэгъухэрэм я Мафэ фэгъэхьыгъэ зэIукIэгъухэри гум рихьыгъэх. Новороссийскэ къикIыгъэ зэшъхьэгъусэхэу Боровковхэм апэрэ чIыпIэр афагъэшъошагъ. Сергейрэ Анастасиерэ къызэрэтаIуагъэу, текIоныгъэр Мыекъуапэ къызэрэщыдахыгъэм рэгушхох. Зичэзыу зэIукIэгъухэм ахэлажьэхэ ашIоигъу. Гум исурэт зытешIыхьэгъэ шIухьафтынхэр, щытхъу тхылъхэр спортсменхэм аратыжьыгъэх.
— Тэхъутэмыкъое, Мыекъопэ районхэм чанэу зыкъагъэлъэгъуагъ, — къытиIуагъ Адыгэ Республикэм спорт ориентированиемкIэ ифедерацие ипащэу Олег Агеевым. — ЯтIонэрэ едзыгъом хэхьэрэ зэIукIэгъухэр жъоныгъокIэ мазэм и 22-м Мыекъуапэ щыкIощтых.
Сурэтым итхэр: зэшъхьэгъусэхэу Боровковхэр, Олег Агеевыр.