Мыекъуапэ волейболымкIэ изэIухыгъэ зэнэкъокъу командэ 17 хэлэжьагъ. Адыгэ къэралыгъо университетымрэ Мыекъопэ къэралыгъо технологическэ университетымрэ зэIукIэгъухэр ащыкIуагъэх.
Бзылъфыгъэхэр команди 6 хъущтыгъэх. «Пенсионнэ фондым» апэрэ чIыпIэр къыдихыгъ. Тренерэу Е. Кешишьянрэ зэхэщэкIо купым хэтэу А. Къулэмрэ къызэрэтаIуагъэу, ешIэгъухэм ахэлэжьагъэхэм зэнэкъокъур ашIогъэшIэгъоныгъ. Псауныгъэр агъэпытэнымкIэ, языгъэпсэфыгъо уахътэ гум шIукIэ къинэжьынымкIэ ащ фэдэ зэIукIэгъухэр ящыкIагъэх.
ЯтIонэрэ чIыпIэр МГТУ-м ыхьыгъ. Тренерэу Р. Къошкыр япащэу пшъашъэхэр финалым нэсыгъэх. ТекIоныгъэм пэблэгъагъэх, пчъагъэр 2:2-у едзыгъуи 4-р аухыгъ. КIэух зэIукIэгъум «Пенсионнэ фондыр» щытекIуагъ. Ящэнэрэ чIыпIэр кIэлэцIыкIу-ныбжьыкIэ спорт еджапIэу N 1-м фагъэшъошагъ.
Хъулъфыгъэ командэхэр купитIоу гощыгъагъэх. Я 2-рэ купым Джэджэ районым апэрэ чIыпIэр къыщыдихыгъ, «Вертикалыр» ятIонэрэ, «Фыщтыр» ящэнэрэ хъугъэх.
Апшъэрэ купым щешIэгъэ хъулъфыгъэхэм IэпэIэсэныгъэ дэгъу къагъэлъэгъуагъ. Спортым лъэпкъхэр зэрэзэфищэхэрэр зэIукIэгъухэм нафэ къыщыхъугъ. Бразилием, Гурыт Азием ихэгъэгухэм, Украинэм, Урысыем ишъолъырхэм ащыщхэр ешIапIэм щызэнэкъокъугъэх.
Апэрэ чIыпIэм икъыдэхын фэгъэхьыгъэ кIэух ешIэгъум командэу «Псауныгъэр» «Мары» зыфиIорэм щыIукIагъ, 3:0-у текIуагъ. Къошкыр, Шопиныр, Тюриныр нахь къахэщыгъэх. Гурыт Азием щыщ студентхэр, тиреспубликэ щапIугъэхэр «Мары» зыфиIорэм хэтыгъэх.
— Адыгеим тыщеджэ,сэнэхьат щызэтэгъэгъоты, — къытаIуагъ «Марым» щешIэхэрэм. — Зэнэкъокъур зэхэзыщагъэхэм тафэраз, ныбджэгъукIэхэр тиIэ хъугъэх. Псауныгъэм игъэпытэнкIэ ащ фэдэ зэIукIэгъухэр тищыкIагъэх.
Мыекъуапэ инароднэ депутатхэм я Совет итхьаматэу Джармэкъо Азмэт, къалэм иадминистрацие физкультурэмрэ спортымрэкIэ икомитет ипащэу Дмитрий Щербаневыр хагъэунэфыкIырэ чIыпIэхэр къыдэзыхыгъэмэ афэгушIуагъэх, кубокхэр, щытхъу тхылъхэр аратыжьыгъэх.
— Спорт лъэпкъ зэфэшъхьафхэмкIэ зэнэкъокъухэр мыгъэ зэхэтщэщтых, ГТО-м ишапхъэхэр игъэкъугъэнхэмкIэ зэIукIэгъухэр тиIэщтых, — яIофыгъохэм тащегъэгъуазэ Дмитрий Щербаневым. — Наркоманием пэшIуекIорэ спорт зэнэкъокъухэр, пIуныгъэм епхыгъэ пчыхьэзэхахьэхэр зэхэтщэщтых.
Сурэтхэм арытхэр: хагъэунэфыкIырэ чIыпIэхэр къыдэхыгъэнхэм ахэлэжьагъэхэр.